ಚೀನಾಕ್ಕೆ ಹತ್ತಿ ಜವಳಿ ರಫ್ತಿನಲ್ಲಿ ಭಾರಿ ಕುಸಿತ

ಹಿಂದಿನ ವರ್ಷದ ಮೊದಲ ತ್ರೈಮಾಸಿಕದಲ್ಲಿ ಭಾರತದಿಂದ ಚೀನಾಕ್ಕೆ ರಫ್ತಾದ ಹತ್ತಿಯ ಜವಳಿ ಉತ್ಪನ್ನಗಳ ಮೊತ್ತವು ₹ 2,601 ಕೋಟಿ ಆಗಿತ್ತು. ಈ ಬಾರಿ ಅದು ₹ 676 ಕೋಟಿಗೆ ಇಳಿದಿದೆ ಎಂದು ಹತ್ತಿ ಜವಳಿ ರಫ್ತು ಉತ್ತೇಜನಾ ಮಂಡಳಿಯ ಅಂಕಿ–ಅಂಶಗಳು ಹೇಳುತ್ತವೆ.

‘ಭಾರತದಿಂದ ರಫ್ತಾದ ಉತ್ಪನ್ನಗಳನ್ನು ಚೀನಾದ ಬಂದರುಗಳಲ್ಲಿ ಅಧಿಕಾರಿಗಳು ಆಮೂಲಾಗ್ರವಾಗಿ ಪರಿಶೀಲಿಸುವ, ಅಲ್ಲಿ ಉತ್ಪನ್ನಗಳನ್ನು ಇಳಿಸಲು ವಿಳಂಬ ಮಾಡಿದ ನಿದರ್ಶನಗಳು ವರದಿಯಾಗಿವೆ. ಇದು ಕೂಡ ರಫ್ತು ಪ್ರಮಾಣ ಕಡಿಮೆ ಆಗಲು ಕಾರಣ’ ಎಂದು ಪ್ರೀಮಿಯರ್ ಮಿಲ್ಸ್ ಪ್ರೈವೇಟ್ ಲಿಮಿಟೆಡ್‌ನ ವ್ಯವಸ್ಥಾಪಕ ನಿರ್ದೇಶಕ ಕೆ.ವಿ. ಶ್ರೀನಿವಾಸನ್ ತಿಳಿಸಿದರು.

ಚೀನಾದಿಂದ ಆಮದಾಗುವ ಜವಳಿ ಉತ್ಪನ್ನಗಳಿಗೆ ಪರ್ಯಾಯವನ್ನು ಹುಡುಕಿಕೊಳ್ಳುವುದು, ಚೀನಾದ ಕೆಲವು ವಸ್ತುಗಳಿಗೆ ಹೆಚ್ಚುವರಿ ತೆರಿಗೆ ವಿಧಿಸುವ ಕ್ರಮಗಳು ಭಾರತದಿಂದ ಚೀನಾಕ್ಕೆ ರಫ್ತಾಗುವ ವಸ್ತುಗಳ ಮೇಲೆಯೂ ಪರಿಣಾಮ ಉಂಟುಮಾಡಬಹುದು ಎಂದು ಅವರು ಹೇಳಿದರು.

‌ಕೊರೊನಾ ವೈರಾಣುವಿನಿಂದಾಗಿ ಪೂರೈಕೆ ವ್ಯವಸ್ಥೆಯಲ್ಲಿ ವ್ಯತ್ಯಾಸ ಉಂಟಾಯಿತು. ಇದು ಕೂಡ ಮೊದಲ ತ್ರೈಮಾಸಿಕದಲ್ಲಿ ರಫ್ತು ಕಡಿಮೆ ಆಗಲು ಕಾರಣ. ‘ಹತ್ತಿ ಜವಳಿ ಉತ್ಪನ್ನಗಳ ರಫ್ತಿನ ಮೇಲೆ ಈ ವರ್ಷ ಕೊರೊನಾದಿಂದಾಗಿ ಏಟು ಬೀಳುವುದು ಖಚಿತ. ಜವಳಿ ಉತ್ಪನ್ನಗಳಿಗೆ ಗ್ರಾಹಕರಿಂದ ಬೇಡಿಕೆ ಕಡಿಮೆ ಆಗಿರುವುದರ ಪರಿಣಾಮವಾಗಿ, ಜವಳಿ ಕಂಪನಿಗಳು ತಮ್ಮ ಸಾಮರ್ಥ್ಯದ ಶೇಕಡ 50ರಿಂದ 70ರಷ್ಟನ್ನು ಮಾತ್ರ ಬಳಕೆ ಮಾಡಿಕೊಳ್ಳುತ್ತಿವೆ’ ಎಂದು ಶ್ರೀನಿವಾಸನ್ ತಿಳಿಸಿದರು.