ನವದೆಹಲಿ: ಪ್ರಸಕ್ತ ಹಣಕಾಸು ವರ್ಷದ ಏಪ್ರಿಲ್–ಜೂನ್‌ ಅವಧಿಯಲ್ಲಿ ಈಕ್ವಿಟಿಗಳಲ್ಲಿ ಆಗಿರುವ ವಿದೇಶಿ ನೇರ ಬಂಡವಾಳ ಹೂಡಿಕೆಯು (ಎಫ್‌ಡಿಐ) ಶೇ 6ರಷ್ಟು ಇಳಿಕೆ ಕಂಡಿದ್ದು, ₹1.32 ಲಕ್ಷ ಕೋಟಿ ಆಗಿದೆ ಎಂದು ಕೈಗಾರಿಕಾ ಉತ್ತೇಜನ ಮತ್ತು ಆಂತರಿಕ ವ್ಯಾಪಾರ ಇಲಾಖೆ (ಡಿಪಿಐಐಟಿ) ಹೇಳಿದೆ.
ಹಿಂದಿನ ಹಣಕಾಸು ವರ್ಷದ ಇದೇ ಅವಧಿಯಲ್ಲಿ ಈಕ್ವಿಟಿಗಳಲ್ಲಿ ₹1.39 ಲಕ್ಷ ಕೋಟಿ ಹೂಡಿಕೆ ಆಗಿತ್ತು. ಒಟ್ಟಾರೆ ಎಫ್‌ಡಿಐ ಒಳಹರಿವು ₹1.79 ಲಕ್ಷ ಕೋಟಿಯಿಂದ ₹1.77 ಲಕ್ಷ ಕೋಟಿಗೆ ಇಳಿಕೆ ಆಗಿದೆ.
ಅತಿ ಹೆಚ್ಚು ಹೂಡಿಕೆ ಮಾಡಿರುವ ದೇಶಗಳ ಸಾಲಿನಲ್ಲಿ ಸಿಂಗಪುರ ಮೊದಲ ಸ್ಥಾನದಲ್ಲಿದೆ. ಮಾರಿಷಸ್‌, ಯುಎಇ, ಯುಎಸ್‌ಎ, ನೆದರ್ಲೆಂಡ್ಸ್‌ ಮತ್ತು ಜಪಾನ್‌ ನಂತರದ ಸ್ಥಾನದಲ್ಲಿವೆ.
ಕಂಪ್ಯೂಟರ್‌ ಸಾಫ್ಟ್‌ವೇರ್‌ ಮತ್ತು ಹಾರ್ಡ್‌ವೇರ್‌ ವಲಯದಲ್ಲಿ ಗರಿಷ್ಠ ₹27,860 ಕೋಟಿ ಹೂಡಿಕೆ ಆಗಿದೆ. ಸೇವೆಗಳ ವಲಯದಲ್ಲಿ ₹20,696 ಕೋಟಿ ಹೂಡಿಕೆ ಆಗಿದೆ. ರಾಸಾಯನಿಕ, ವಾಹನ ಉದ್ಯಮ, ಮೂಲಸೌಕರ್ಯ ಚಟುವಟಿಕೆಗಳ ಮೇಲೆಯೂ ಬಂಡವಾಳ ಹೂಡಿಕೆ ಆಗಿದೆ.
