ನವದೆಹಲಿ: ಏಪ್ರಿಲ್‌ನಿಂದ ಸೆಪ್ಟೆಂಬರ್‌ವರೆಗಿನ ಹೊಸ ಹಣಕಾಸು ವರ್ಷದ ಮೊದಲಾರ್ಧದಲ್ಲಿ ಕೇಂದ್ರ ಸರ್ಕಾರವು ₹ 4.88 ಲಕ್ಷ ಕೋಟಿ ಮೊತ್ತದ ಸಾಲ ಸಂಗ್ರಹಿಸಲಿದೆ.
‘ಕೊರೊನಾ–2’ ವೈರಸ್‌ ಸಾಂಕ್ರಾಮಿಕವಾಗಿ ಹರಡುವುದನ್ನು ತಡೆಗಟ್ಟಲುಆರಂಭಿಸಿರುವ ಸಮರಕ್ಕೆ ಅಗತ್ಯವಾದ ಹಣಕಾಸು ಸಂಪನ್ಮೂಲ ಒಟ್ಟುಗೂಡಿಸುವ ಉದ್ದೇಶಕ್ಕೆ ಈ ಸಾಲ ಮಾಡಲಾಗುತ್ತಿದೆ’ ಎಂದು ಹಣಕಾಸು ವ್ಯವಹಾರಗಳ ಕಾರ್ಯದರ್ಶಿ ಅತನು ಚಕ್ರವರ್ತಿ ಹೇಳಿದ್ದಾರೆ.
ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್‌ ಅವರು ಮಂಡಿಸಿದ್ದ ಬಜೆಟ್‌ನಲ್ಲಿ 2020–21ನೇ ಹಣಕಾಸು ವರ್ಷಕ್ಕೆ ಒಟ್ಟು ಸಾಲದ ಪ್ರಮಾಣವು ₹ 7.8 ಲಕ್ಷ ಕೋಟಿ ಇರಲಿದೆ ಎಂದು ತಿಳಿಸಿದ್ದರು. ಇದು 2019–20ನೇ ಹಣಕಾಸು ವರ್ಷದ ₹ 7.1 ಲಕ್ಷ ಕೋಟಿಗಿಂತ ಹೆಚ್ಚಿಗೆ ಇತ್ತು. ಒಟ್ಟಾರೆ ಸಾಲವು ಹಳೆ ಸಾಲಗಳ ಮರುಪಾವತಿಯನ್ನೂ ಒಳಗೊಂಡಿರಲಿದೆ.
