ನವದೆಹಲಿ: ನಕಲಿ ಇನ್‌ವಾಯ್ಸ್‌ ಸೃಷ್ಟಿಸಿ ಜಿಎಸ್‌ಟಿ ಇನ್‌ಪುಟ್ ಟ್ಯಾಕ್ಸ್ ಕ್ರೆಡಿಟ್‌ (ಐಟಿಸಿ) ವಂಚಿಸುತ್ತಿದ್ದ 23 ಕಂಪನಿಗಳ ಜಾಲವನ್ನು ಜಿಎಸ್‌ಟಿ ಅಧಿಕಾರಿಗಳು ಭೇದಿಸಿದ್ದಾರೆ. ₹ 551 ಕೋಟಿ ಮೌಲ್ಯದ ನಕಲಿ ಇನ್‌ವಾಯ್ಸ್‌ ಸೃಷ್ಟಿಸುವ ಮೂಲಕ ₹ 91 ಕೋಟಿ ಮೊತ್ತದ ಐಟಿಸಿ ವಂಚನೆ ಎಸಗಿರುವುದನ್ನು ಪತ್ತೆ ಮಾಡಿದ್ದಾರೆ.
ದೆಹಲಿ ಪೂರ್ವ ವಿಭಾಗದ ಕೇಂದ್ರ ಸರಕು ಮತ್ತು ಸೇವಾ ತೆರಿಗೆ (ಸಿಜಿಎಸ್‌ಟಿ) ಆಯುಕ್ತರ ಕಚೇರಿಯ ಅಧಿಕಾರಿಗಳು ಈ ವಂಚನೆ ಪ್ರಕರಣವನ್ನು ಭೇದಿಸಿದ್ದಾರೆ ಎಂದು ಹಣಕಾಸು ಸಚಿವಾಲಯವು ಪ್ರಕಟಣೆಯಲ್ಲಿ ತಿಳಿಸಿದೆ.
ಗಿರಿಧರ್ ಎಂಟರ್‌ಪ್ರೈಸಸ್‌, ಅರುಣ್‌ ಸೇಲ್ಸ್‌, ಅಕ್ಷಯ್‌ ಟ್ರೇಡರ್ಸ್‌, ಪದ್ಮಾವತಿ ಎಂಟರ್‌ಪ್ರೈಸಸ್‌ ಮತ್ತು ಇತರೆ 19 ಕಂಪನಿಗಳು ಈ ವಂಚನೆಯ ಜಾಲದಲ್ಲಿ ತೊಡಗಿಕೊಂಡಿವೆ.
ದಿನೇಶ್ ಗುಪ್ತ, ಶುಭಂ ಗುಪ್ತ, ವಿನೋದ್‌ ಜೈನ್‌ ಮತ್ತು ಯೋಗೇಶ್ ಗೋಯೆಲ್‌ ಎನ್ನುವವರು ನಕಲಿ ಇನ್‌ವಾಯ್ಸ್‌ ಮಾರಾಟ ಮಾಡುತ್ತಿದ್ದರು. ಈ ಮೂವರು ಆರೋಪಿಗಳು ತಮ್ಮ ತಪ್ಪನ್ನು ಒಪ್ಪಿಕೊಂಡಿದ್ದಾರೆ ಎಂದು ಸಚಿವಾಲಯ ತಿಳಿಸಿದೆ.
