ಬೆಂಗಳೂರು: ಸರ್ಕಾರಿ ಸ್ವಾಮ್ಯದ ತೈಲೋತ್ಪನ್ನ ಮಾರಾಟ ಸಂಸ್ಥೆಯಾಗಿರುವ ಹಿಂದೂಸ್ತಾನ್‌ ಪೆಟ್ರೋಲಿಯಂ ಕಾರ್ಪೊರೇಷನ್‌ (ಎಚ್‌ಪಿಸಿಎಲ್‌), ಗ್ರಾಹಕರ ಬಳಕೆಗಾಗಿ 5 ಕೆ.ಜಿ ಅಡುಗೆ ಅನಿಲ ಸಿಲಿಂಡರ್‌ (ಎಲ್‌ಪಿಜಿ) ‘ಅಪ್ಪು’ ಮಾರುಕಟ್ಟೆಗೆ ಪರಿಚಯಿಸಿದೆ.
ಕಾಲೇಜ್‌ ವಿದ್ಯಾರ್ಥಿಗಳು, ಪೇಯಿಂಗ್‌ ಗೆಸ್ಟ್‌ನಲ್ಲಿ ವಾಸಿಸುವವರು, ವಲಸೆ ಕಾರ್ಮಿಕರು, ಬೀದಿ ಬದಿ ಮಾರಾಟಗಾರರಿಗೆ ನೆರವಾಗಲು ಈ ಚಿಕ್ಕ ಗಾತ್ರದ ಎಲ್‌ಪಿಜಿ ಸಿಲಿಂಡರ್‌ ಪರಿಚಯಿಸಲಾಗಿದೆ.
ಶಾಶ್ವತ ಎಲ್‌ಪಿಜಿ ಸಂಪರ್ಕಕ್ಕಿಂತ ಈ ಸಿಲಿಂಡರ್‌ ಖರೀದಿಸುವುದು ಸುಲಭವಾಗಿದೆ. ಬೆಂಗಳೂರಿನಲ್ಲಿನ ಎಚ್‌ಪಿ ಅಡುಗೆ ಅನಿಲ ವಿತರಕರು ಮತ್ತು ಆಯ್ದ ಪೆಟ್ರೋಲ್‌ ಬಂಕ್‌ಗಳಲ್ಲಿ ಗುರುತಿನ ಯಾವುದಾದರೂ ದಾಖಲೆ ಸಲ್ಲಿಸಿ ಇದನ್ನು ಖರೀದಿಸಬಹುದು.
ಈ ಸಿಲಿಂಡರ್‌ ಬಳಕೆ ಮತ್ತು ಮಾರಾಟ ಉತ್ತೇಜಿಸಲು ಸಂಸ್ಥೆಯು, ‘ಅಪ್ಪು ಖರೀದಿಸಿ, 1 ಲೀಟರ್‌ ಪೆಟ್ರೋಲ್‌ ಉಚಿತ ಪಡೆಯಿರಿ’ ಆರಂಭಿಕ ಕೊಡುಗೆಯನ್ನೂ ಪ್ರಕಟಿಸಿದೆ.
