ನವದೆಹಲಿ: 2022-23ಕ್ಕೆ ಭಾರತದ ಆರ್ಥಿಕತೆ ಬೆಳವಣಿಗೆ ಅಂದಾಜು ಶೇಕಡ 7ರಷ್ಟು ದಾಖಲಿಸುವ ನಿರೀಕ್ಷೆಯಿದೆ ಎಂದು ಕೇಂದ್ರ ಸರ್ಕಾರ ಮಾಹಿತಿ ನೀಡಿದೆ. ಕಳೆದ ವರ್ಷ ಶೇಕಡ 8.7ರಷ್ಟಿತ್ತು.
ಉತ್ಪಾದನಾ ವಲಯದ ಕಳಪೆ ಪ್ರದರ್ಶನವೇ ಇದಕ್ಕೆ ಮುಖ್ಯ ಕಾರಣ ಎಂದು ರಾಷ್ಟ್ರೀಯ ಸಾಂಖ್ಯಿಕ ಕಚೇರಿ (ಎನ್ಎಸ್ಒ) ಶುಕ್ರವಾರ ಹೇಳಿದೆ.
ಎನ್ಎಸ್ಒ ಬಿಡುಗಡೆ ಮಾಡಿರುವ ದತ್ತಾಂಶದ ಪ್ರಕಾರ 2022-23ರಲ್ಲಿ ಭಾರತದ ಒಟ್ಟು ಆಂತರಿಕ ಉತ್ಪನ್ನವು (ಜಿಡಿಪಿ) ಅಂದಾಜು 157.60 ಲಕ್ಷ ಕೋಟಿ ಏರಿಕೆ ಕಾಣಲಿದೆ. ಹಿಂದಿನ ವರ್ಷದ ಜಿಡಿಪಿ ಅಂದಾಜು 147.36 ಲಕ್ಷ ಕೋಟಿ.
ಕಳೆದ ವರ್ಷದ ಶೇಕಡ 8.7ರಷ್ಟು ಜಿಡಿಪಿಗೆ ಹೋಲಿಸಿದರೆ 2022-23ರ ಅವಧಿಯಲ್ಲಿ ಶೇಕಡ 7ರಷ್ಟು ಬೆಳವಣಿಗೆ ಹೊಂದಲಿದೆ ಎಂದು ಅಂದಾಜಿಸಿರುವುದಾಗಿ ಎನ್ಎಸ್ಒ ಹೇಳಿದೆ.
ಉತ್ಪಾದನಾ ವಲಯದಲ್ಲಿ ಶೇಕಡ 1.6ರಷ್ಟು ಬೆಳವಣಿಗೆಯನ್ನು ಅಂದಾಜಿಸಲಾಗಿದೆ. ಕಳೆದ ವರ್ಷ ಶೇಕಡ 9.9ರಷ್ಟಿತ್ತು.