ಲಂಡನ್: ಕೋವಿಡ್–19 ವೈರಸ್ನಿಂದಾಗಿ ಜಾಗತಿಕ ತೈಲ ಬೇಡಿಕೆಯು 2020ರಲ್ಲಿ ಭಾರಿ ಪ್ರಮಾಣದಲ್ಲಿ ಇಳಿಕೆ ಕಾಣಲಿದೆ ಎಂದು ಅಂತರರಾಷ್ಟ್ರೀಯ ಇಂಧನ ಸಂಸ್ಥೆ (ಐಇಎ) ಅಭಿಪ್ರಾಯಪಟ್ಟಿದೆ.
ಸೌದಿ ಅರೇಬಿಯಾವು ದರದಲ್ಲಿ ಇಳಿಕೆ ಮಾಡುವ ಮೂಲಕ ಮಾರುಕಟ್ಟೆಯಲ್ಲಿತೈಲ ದರ ಸಮರಕ್ಕೆ ಚಾಲನೆ ನೀಡಿದೆ. ಇದರಿಂದಾಗಿತೈಲ ದರದಲ್ಲಿ ಭಾರಿ ಇಳಿಕೆ ಕಾಣುತ್ತಿದೆ. ಹೀಗಾಗಿ ಬೇಡಿಕೆಯಲ್ಲಿ ಪರಿಷ್ಕರಣೆ ಮಾಡಲಾಗಿದೆ ಎಂದು ತಿಳಿಸಿದೆ.
2020ರಲ್ಲಿ ಒಂದು ದಿನದ ತೈಲ ಬೇಡಿಕೆಯು 90 ಸಾವಿರ ಬ್ಯಾರಲ್ಗಳಷ್ಟು ಕಡಿಮೆ ಇರಲಿದ್ದು, ಒಟ್ಟಾರೆ ಬೇಡಿಕೆಯು 9.99 ಕೋಟಿ ಬ್ಯಾರಲ್ಗಳಷ್ಟಿರಲಿದೆ ಎಂದು ತಿಳಿಸಿದೆ. 2009ರ ನಂತರ ಬೇಡಿಕೆಯು ಈ ಪ್ರಮಾಣದಲ್ಲಿ ಕುಸಿತ ಕಂಡಿದೆ.
‘ಕೋವಿಡ್ನಿಂದಾಗಿ ಸರಕು ಮತ್ತು ಸೇವೆಗಳ ಸಾಗಣೆಯಷ್ಟೇ ಅಲ್ಲದೆ, ಜನರು ಸಹ ಬೇರೆ ದೇಶಗಳಿಗೆ ಪ್ರಯಾಣ ಮಾಡುವುದನ್ನು ನಿಲ್ಲಿಸಿದ್ದಾರೆ. ಇದರಿಂದಾಗಿ ತೈಲ ಮಾರುಕಟ್ಟೆಯ ಮೇಲೆ ಹೆಚ್ಚಿನ ಹಾನಿ ಆಗುತ್ತಿದೆ’ ಎಂದು ಐಇಎ ಕಾರ್ಯನಿರ್ವಾಹಕ ನಿರ್ದೇಶಕ ಫತಿಹ್ ಬಿರೋಲ್ ಹೇಳಿದ್ದಾರೆ.
ತೈಲ ದರ ಕುಸಿತ ಸೌದಿ ಅರೇಬಿಯಾ ದೇಶವು ದರ ಸಮರಕ್ಕೆ ಮುಂದಾಗಿರುವುದರಿಂದ ಸೋಮವಾರ ಕಚ್ಚಾ ತೈಲ ದರ ಶೇ 30ರಷ್ಟು ಕುಸಿತ ಕಂಡಿತು.
ಮಲ್ಟಿ ಕಮಾಡಿಟಿ ಎಕ್ಸ್ಚೇಂಜ್ನಲ್ಲಿಮಾರ್ಚ್ನಲ್ಲಿ ಪೂರೈಕೆ ಮಾಡುವ ಕಚ್ಚಾ ತೈಲ ದರ ಶೇ 30ರಷ್ಟು ಇಳಿಕೆಯಾಗಿ ಬ್ಯಾರಲ್ಗೆ ₹ 2,216ಕ್ಕೆ ತಲುಪಿದೆ.
ಏಪ್ರಿಲ್ನಲ್ಲಿ ಪೂರೈಕೆ ಮಾಡುವ ತೈಲ ದರ ಬ್ಯಾರಲ್ಗೆ ಶೇ 28.03ರಷ್ಟು ಕಡಿಮೆಯಾಗಿದ್ದು, ₹ 2,308ಕ್ಕೆ ತಲುಪಿದೆ.
ಉತ್ಪಾದನೆ ಕಡಿತ ಮಾಡುವ ಕುರಿತಾದ ಒಪೆಕ್–ರಷ್ಯಾ ಸಂಧಾನ ಮಾತುಕತೆ ವಿಫಲವಾಗಿದೆ. ಇದರಿಂದಾಗಿ,ಕೋವಿಡ್ ವೈರಸ್ ವಿರುದ್ಧದ ಸಮರವು ತೈಲ ರಫ್ತು ಸಮರವಾಗಿ ಬದಲಾಗುತ್ತಿದೆ ಎಂದು ತಜ್ಞರು ವಿಶ್ಲೇಷಣೆ ಮಾಡಿದ್ದಾರೆ.
ಅಂಕಿ– ಅಂಶಗಳು
90 ಸಾವಿರ ಬ್ಯಾರಲ್:2020ರಲ್ಲಿ ದಿನದ ಬೇಡಿಕೆಯಲ್ಲಿ ಆಗಲಿರುವ ಇಳಿಕೆ
10 ಲಕ್ಷ ಬ್ಯಾರೆಲ್: ಒಟ್ಟಾರೆ ಬೇಡಿಕೆಯಲ್ಲಿ ಆಗಲಿರುವ ಇಳಿಕೆ
21 ಲಕ್ಷ ಬ್ಯಾರಲ್:2021ರಲ್ಲಿ ದಿನದ ಬೇಡಿಕೆಯಲ್ಲಿ ಆಗಲಿರುವ ಏರಿಕೆ