ಪಿಎಫ್‌: ಶೇ 75 ರಷ್ಟು ಹಣ ಪಡೆಯಲು ಅವಕಾಶ

ನವದೆಹಲಿ (ಪಿಟಿಐ): ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆಯ (ಇಪಿಎಫ್‌ಒ) ಚಂದಾದಾರರು ನಿರುದ್ಯೋಗಿಯಾದ ಒಂದು ತಿಂಗಳ ಬಳಿಕ ತಮ್ಮ ಖಾತೆಯಲ್ಲಿನ ಶೇ 75 ರಷ್ಟು ಹಣ ವಾಪಸ್‌ ಪಡೆಯುವ ಆಯ್ಕೆಯನ್ನು ಕಲ್ಪಿಸಲಾಗಿದೆ.

ನಿರುದ್ಯೋಗಿಯಾದ ಎರಡು ತಿಂಗಳ ಬಳಿಕ ಖಾತೆಯಲ್ಲಿ ಉಳಿದಿರುವ  ಶೇ 25 ರಷ್ಟು ಹಣ ವಾಪಸ್‌ ಪಡೆಯುವ ಆಯ್ಕೆಯನ್ನೂ ನೀಡಿದೆ.

ಚಂದಾದಾರರು ಎರಡೂ ಆಯ್ಕೆಗಳಲ್ಲಿಯೂ ಬೇರೆ ಉದ್ಯೋಗ ಸಿಗುವವರೆಗೂ ತಮ್ಮ ಖಾತೆಯನ್ನು ಹಾಗೆಯೇ ಉಳಿಸಿಕೊಳ್ಳಲು ಅವಕಾಶ ನೀಡಲಾಗಿದೆ. 

‘1952ರ ಇಪಿಎಫ್‌ಒನ ಹೊಸ ನಿಯಮದ ಅನ್ವಯ ಚಂದಾದಾರರಿಗೆ ಈ ಆಯ್ಕೆಗಳನ್ನು ನೀಡಲಾಗಿದೆ’ ಎಂದು ಸಂಘಟನೆಯ ಕೇಂದ್ರೀಯ ಧರ್ಮದರ್ಶಿ ಮಂಡಳಿ ಅಧ್ಯಕ್ಷ ಸಂತೋಷ್ ಕುಮಾರ್ ಗಂಗ್ವಾರ್‌ ತಿಳಿಸಿದ್ದಾರೆ.

ಇಪಿಎಫ್‌ಒ ಇಟಿಎಫ್‌ ಹೂಡಿಕೆಯು ಮೇ ತಿಂಗಳ ಅಂತ್ಯಕ್ಕೆ ₹ 47,431 ಕೋಟಿಗೆ ತಲುಪಿದೆ. ಇದು ಶೀಘ್ರವೇ ₹ 1 ಲಕ್ಷ ಕೋಟಿಯನ್ನೂ ದಾಟಲಿದೆ ಎಂದು ಅವರು ಹೇಳಿದ್ದಾರೆ.

ಇಟಿಎಫ್‌ ಹೂಡಿಕೆ ಮಿತಿ ಹೆಚ್ಚಳ ಕುರಿತು ನಿರ್ಧಾರಕ್ಕೆ ಬರುವುದನ್ನು ಸಭೆ ಮುಂದೂಡಿದೆ.