ಟಾಟಾ ಸ್ಟೀಲ್: ಎಲ್ಲಿಂದ ಬೇಕಿದ್ದರೂ ಕೆಲಸ

‘ವಿಶ್ವಾಸ ಮತ್ತು ಫಲಿತಾಂಶವನ್ನು ಆಧರಿಸಿದ ಕೆಲಸದ ಸಂಸ್ಕೃತಿ’ಯ ಕಡೆ ಸಾಗುತ್ತಿರುವುದಾಗಿ ಕಂಪನಿ ಹೇಳಿದೆ. ಹೊಸ ನೀತಿಯ ಅನ್ವಯ, ನಿರ್ದಿಷ್ಟ ಸ್ಥಳದಿಂದಲೇ ಕೆಲಸ ಮಾಡಬೇಕಾದ ಅನಿವಾರ್ಯತೆಯನ್ನು ಹೊಂದಿದ್ದ ಅಧಿಕಾರಿಗಳು ಕೂಡ ಇನ್ನು ಮನೆಯಿಂದಲೇ ಕೆಲಸ ಮಾಡಬಹುದು. ಅವರು ವರ್ಷದಲ್ಲಿ ಎಷ್ಟು ದಿನ ಬೇಕಿದ್ದರೂ ಮನೆಯಿಂದ ಕೆಲಸ ಮಾಡಬಹುದು ಎಂದು ಕಂಪನಿ ಸ್ಪಷ್ಟಪಡಿಸಿದೆ.

ಸಾಂಕ್ರಾಮಿಕದ ಪರಿಸ್ಥಿತಿ ತಿಳಿಗೊಂಡ ನಂತರ ಹೊಸ ನೀತಿಯು ಅಧಿಕಾರಿಗಳಿಗೆ ತಮ್ಮ ಇಷ್ಟದ ಊರಿಗೆ ಸ್ಥಳಾಂತರಗೊಳ್ಳುವ ಅವಕಾಶವನ್ನು ನೀಡಲಿದೆ. ಅವರು ದೇಶದ ಯಾವುದೇ ಸ್ಥಳದಿಂದಲಾದರೂ ಕೆಲಸ ನಿರ್ವಹಿಸಬಹುದು. ಈ ನೀತಿಯನ್ನು ಒಂದು ವರ್ಷದ ಅವಧಿಗೆ ಪರೀಕ್ಷಾರ್ಥವಾಗಿ ಚಾಲ್ತಿಯಲ್ಲಿ ಇರಿಸಲಾಗುವುದು. ನಂತರ ಇದು ಎಷ್ಟು ಪರಿಣಾಮಕಾರಿ ಎಂಬುದನ್ನು ಪರಿಶೀಲಿಸಲಾಗುವುದು.

ಬದಲಾವಣೆಗಳಿಗೆ ಹೊಂದಿಕೊಳ್ಳುವ ಹೊಸ ಕೆಲಸದ ಸಂಸ್ಕೃತಿಯು, ಹೊಸ ತಲೆಮಾರಿಗೆ ಅಗತ್ಯವಿರುವಂತಹ ಕೆಲಸದ ಸ್ಥಳವನ್ನು ಸೃಷ್ಟಿಸಬೇಕೆಂಬ ಸಂಸ್ಥೆಯ ಉದ್ದೇಶವನ್ನು ಹೇಳುತ್ತಿದೆ ಎಂದು ಕಂಪನಿಯ ಮಾನವ ಸಂಪನ್ಮೂಲ ನಿರ್ವಹಣಾ ವಿಭಾಗದ ಉಪಾಧ್ಯಕ್ಷ ಸುರೇಶ್ ದತ್ ತ್ರಿಪಾಠಿ ಹೇಳಿದ್ದಾರೆ.

ಕಚೇರಿಯ ಆವರಣದಲ್ಲಿ ನಿರ್ದಿಷ್ಟ ಅವಧಿಗೆ ಕೆಲಸ ಮಾಡಿದರೆ ಮಾತ್ರ ಉತ್ಪಾದಕತೆ ಹೆಚ್ಚಿರುತ್ತದೆ ಎಂಬ ಸಾಂಪ್ರದಾಯಿಕ ಆಲೋಚನೆಯಿಂದ ದೂರ ಸರಿಯಲು ಕೋವಿಡ್–19 ಸಾಂಕ್ರಾಮಿಕವು ನೆರವಾಗಿದೆ. ಬೇರೆ ಬೇರೆ ಸ್ಥಳಗಳಿಂದ ಕೆಲಸ ಮಾಡುವ ವಿಚಾರವಾಗಿ ಇದ್ದ ಕೆಲವು ಅಪನಂಬಿಕೆಗಳನ್ನು ದೂರ ಮಾಡಿದೆ ಎಂದು ಅವರು ಹೇಳಿದ್ದಾರೆ.

ಹೊಸ ಕೆಲಸದ ನೀತಿಯು ವೈಯಕ್ತಿಕ ಜೀವನ ಹಾಗೂ ಕಚೇರಿ ಕೆಲಸದ ನಡುವೆ ಒಳ್ಳೆಯ ಸಮತೋಲನ ಸಾಧಿಸಲು ನೆರವಾಗುತ್ತದೆ. ಎಲ್ಲಿ ನೆಲೆ ನಿಲ್ಲಬೇಕು ಎಂಬ ವಿಚಾರದಲ್ಲಿ ಮುಕ್ತವಾಗಿ ತೀರ್ಮಾನ ಕೈಗೊಳ್ಳಲು ಸಹಾಯ ಮಾಡುತ್ತದೆ ಎಂದೂ ತ್ರಿಪಾಠಿ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.