ವಿಪ್ರೊ: ಷೇರು ಮರುಖರೀದಿ ಯೋಜನೆಗೆ ಒಪ್ಪಿಗೆ

ಪ್ರತಿ ಷೇರಿಗೆ ₹ 400ರಂತೆ 23.75 ಕೋಟಿ ಷೇರುಗಳನ್ನು ಮರುಖರೀದಿಸಲು ನಿರ್ದೇಶಕರ ಮಂಡಳಿ ಒಪ್ಪಿಗೆ ನೀಡಿದೆ ಎಂದು ವಿಪ್ರೊ ಮಂಗಳವಾರ ಷೇರುಪೇಟೆಗೆ ಮಾಹಿತಿ ನೀಡಿದೆ.

ಮಂಗಳವಾರದ ವಹಿವಾಟಿನ ಅಂತ್ಯದಲ್ಲಿ ಕಂಪನಿಯ ಷೇರಿನ ಬೆಲೆ ಬಿಎಸ್‌ಇನಲ್ಲಿ ₹ 375.5ರಷ್ಟಾಗಿದೆ. ಇದಕ್ಕಿಂತ ಶೇಕಡ 6.4ರಷ್ಟು ಹೆಚ್ಚಿನ ಬೆಲೆಗೆ ಷೇರು ಮರುಖರೀದಿ ನಡೆಯಲಿದೆ.

ಕಂಪನಿಯ ಪ್ರವರ್ತಕರು ಮತ್ತು ಪ್ರವರ್ತಕರ ಸಮೂಹದ ಸದಸ್ಯರು ಈ ಪ್ರಕ್ರಿಯೆಯಲ್ಲಿ ಭಾಗವಹಿಸಲಿದ್ದಾರೆ. ಅಕ್ಟೋಬರ್‌ 9ರವರೆಗಿನ ಮಾಹಿತಿಯ ಪ್ರಕಾರ ಪ್ರವರ್ತಕರು ಮತ್ತು ಪ್ರವರ್ತಕರ ಸಮೂಹದ ಸದಸ್ಯರು ಕಂಪನಿಯಲ್ಲಿ ಶೇ 74.02ರಷ್ಟು ಷೇರು ಪಾಲು ಹೊಂದಿದ್ದಾರೆ. ಉದ್ದೇಶಿತ ಮರುಖರೀದಿ ಯೋಜನೆಗೆ ಷೇರುದಾರರ ಅನುಮತಿ ಪಡೆಯಲಾಗುವುದು ಎಂದು ಕಂಪನಿ ತಿಳಿಸಿದೆ. ಹಿಂದಿನ ವರ್ಷ ಕಂಪನಿಯು 32.31 ಕೋಟಿ ಷೇರುಗಳನ್ನು ಮರು ಖರೀದಿ ಮಾಡಿತ್ತು.

ನಿವ್ವಳ ಲಾಭ ಇಳಿಕೆ: ಸೆಪ್ಟೆಂಬರ್‌ 30ಕ್ಕೆ ಕೊನೆಗೊಂಡ ತ್ರೈಮಾಸಿಕದಲ್ಲಿ ವಿಪ್ರೊ ನಿವ್ವಳ ಲಾಭ ಶೇ 3.4ರಷ್ಟು ಇಳಿಕೆಯಾಗಿದ್ದು, ₹2,465.7 ಕೋಟಿಗಳಿಗೆ ತಗ್ಗಿದೆ. ಹಿಂದಿನ ವರ್ಷದ ಇದೇ ಅವಧಿಯಲ್ಲಿ ಕಂಪನಿಯು ₹ 2,552.7 ಕೋಟಿ ನಿವ್ವಳ ಲಾಭ ಗಳಿಸಿತ್ತು. ಸೆಪ್ಟೆಂಬರ್‌ ತ್ರೈಮಾಸಿಕಕ್ಕೆ ಕಂಪನಿಯ ವರಮಾನ ₹ 15,114.5 ಕೋಟಿ ಆಗಿದೆ.