ಪ್ರಶ್ನೋತ್ತರ: ತೆರಿಗೆ ಉಳಿಸುವ ಅವಕಾಶವಿದೆಯೇ?

ಈಗಾಗಲೇ ಪ್ರಶ್ನೆಯಲ್ಲಿ ತಿಳಿಸಿರುವಂತೆ ನೀವು ಸಾರ್ವಜನಿಕ ವಲಯ ಕಂಪನಿಯೊಂದರಲ್ಲಿ ಸೇವೆ ಸಲ್ಲಿಸುತ್ತಿದ್ದೀರಿ. ನಿಮಗೆ ಸಿಗಲಿರುವ ಬಹುತೇಕ ಎಲ್ಲ ಮೊತ್ತಗಳು ತೆರಿಗೆ ಮುಕ್ತ ಆಗಿರುವವೇ ಆಗಿವೆ. ನಿಮ್ಮ ಈ ಮೊತ್ತವನ್ನು ನಿಗದಿತ ಯೋಜನೆಗಳಲ್ಲಿ ಹೂಡಿಕೆ ಮಾಡಿ ಆದಾಯ ತೆರಿಗೆ ಉಳಿತಾಯಕ್ಕೆ ಅವಕಾಶ ಇದೆ.

ನಿಮ್ಮ ಸೇವೆ ಸಾರ್ವಜನಿಕ ವಲಯದ ಕಂಪನಿಯಲ್ಲಾದ ಕಾರಣ ನಿಮಗೆ ಸಿಗುವ ಮೊತ್ತವನ್ನು ಪ್ರತ್ಯೇಕವಾದ ಯೋಜನೆಯಲ್ಲಿ ಹೂಡಿಕೆ ಮಾಡುವ ಅವಕಾಶ ಇದೆ. ನಿವೃತ್ತಿಗೆ ಸಂಬಂಧಿಸಿ ಸಿಗುವ ಮೊತ್ತವನ್ನು ಮೂರು ತಿಂಗಳ ಒಳಗೆ ಸ್ಟೇಟ್ ಬ್ಯಾ೦ಕ್ ಆಫ್‌ ಇಂಡಿಯಾ ಅಥವಾ ಇತರೆ ರಾಷ್ಟ್ರೀಕೃತ ಬ್ಯಾ೦ಕ್‌ನಲ್ಲಿ ಸಾರ್ವಜನಿಕ ವಲಯದ ಕಂಪನಿಯ ಉದ್ಯೋಗಿಗಳ ನಿವೃತ್ತಿಯ ಠೇವಣಿ ಯೋಜನೆಯಲ್ಲಿ ತೊಡಗಿಸಿ.

ಈ ಯೋಜನೆಯ ಠೇವಣಿಗೆ ಸಿಗುವ ಬಡ್ಡಿಗೆ ಸೆಕ್ಷನ್ 10(15)(iv) ಅಡಿ ಸಂಪೂರ್ಣ ತೆರಿಗೆ ವಿನಾಯಿತಿ ಸಿಗುತ್ತದೆ. ಆ ಠೇವಣಿಯನ್ನು ಮೂರು ವರ್ಷ ಕಾಲ ಹಿಂಪಡೆಯುವಂತಿಲ್ಲ. ಅಲ್ಲಿಯ ತನಕ ಬಡ್ಡಿಗೆ ತೆರಿಗೆ ಇರುವುದಿಲ್ಲ. ಇದಕ್ಕೆ ಅಗತ್ಯವಾಗಿ ನಿಮ್ಮ ಕಂಪನಿ ಸಾರ್ವಜನಿಕ ವಲಯದ ಕಂಪನಿ ಎಂಬುದಾಗಿ ಹಾಗೂ ನಿಮಗೆ ಸಿಕ್ಕಿದ ಮೊತ್ತ ನಿವೃತ್ತಿಗೆ ಸಂಬಂಧಿಸಿದ್ದಾಗಿದೆ ಎಂದು ದೃಢೀಕರಿಸಿರುವ ಕಂಪನಿಯ ಪ್ರಮಾಣ ಪತ್ರ ಪಡೆದುಕೊಳ್ಳಿ. ರಿಟರ್ನ್ಸ್ ಸಲ್ಲಿಸುವಾಗ ವಿನಾಯಿತಿ ಆದಾಯದಲ್ಲಿ ಈ ಬಡ್ಡಿ ಮೊತ್ತ  ಘೋಷಿಸಬೇಕು. ಇತರೆ ಕಡೆ ಎಲ್ಲೇ ಹೂಡಿಕೆ ಮಾಡಿದರೂ ಸಿಗುವ ಬಡ್ಡಿಗೆ ತೆರಿಗೆ ಇದೆ ಎಂಬುದನ್ನು ಗಮನಿಸಿ.

ನೀವು ಪ್ರಶ್ನೆಯಲ್ಲಿ ತಿಳಿಸಿರುವಂತೆ ಈಗಾಗಲೇ ಖಾಸಗಿ ಸಂಸ್ಥೆಯೊಂದರಲ್ಲಿ ಉದ್ಯೋಗಿಯಾಗಿದ್ದು, ವೇತನ ಆದಾಯವಲ್ಲದೆ ಕೃಷಿ ಭೂಮಿಯಿಂದ ವಿವಿಧ ಕೃಷಿ ಚಟುವಟಿಕೆಗಳಿಗೆ ಸಂಬಂಧಿಸಿದ ಆದಾಯವೂ ಇದೆ ಎಂಬುದನ್ನು ಉಲ್ಲೇಖಿಸಿದ್ದೀರಿ.

ನೀವು ಹೊಸ ತೆರಿಗೆ ಪದ್ಧತಿ ಅನುಸರಿಸುತ್ತಿದ್ದು, ನಿಮ್ಮ ವೇತನ ಆದಾಯ ಗರಿಷ್ಠ ಆದಾಯ ವಿನಾಯಿತಿ ಮಿತಿಯಾದ ₹3 ಲಕ್ಷಕ್ಕಿಂತ ಅಧಿಕ ಇದೆ. ಕೃಷಿ ಆದಾಯವೂ ₹5 ಲಕ್ಷಕ್ಕಿಂತ ಮೇಲ್ಪಟ್ಟಿರುವುದರಿಂದ ನಿಮ್ಮ ವಾರ್ಷಿಕ ರಿಟರ್ನ್ಸ್ ಸಲ್ಲಿಸುವಾಗ ಕೃಷಿ ಆದಾಯ ಮೊತ್ತವನ್ನೂ  ಅದರಲ್ಲಿ ಪರಿಗಣಿಸಬೇಕಾಗುತ್ತದೆ. ಮುಂದೆ ಅನೇಕ ವರ್ಷದ ಕೃಷಿ ಆದಾಯ ಒಟ್ಟಾಗಿ ನಿಮ್ಮ ಬ್ಯಾಂಕ್ ಖಾತೆಯಲ್ಲಿ ಜಮಾ ಆದಾಗ ಹಾಗೂ ಅವೆಲ್ಲಾ ನಗದು ರೂಪದಲ್ಲೇ ಇರುವ ಕಾರಣ ಅದರ ಮೂಲದ ಬಗ್ಗೆ ಪ್ರಶ್ನೆ ಬರದಂತೆ ಇಂತಹ ಆದಾಯ ಘೋಷಣೆಯು ಕಾನೂನು ಪರಿಧಿಯಲ್ಲಿ ಅನಿವಾರ್ಯ. ರಿಟರ್ನ್ಸ್ ಸಲ್ಲಿಕೆಗೆ ನಿಮ್ಮ ಸ್ಥಳೀಯ ತೆರಿಗೆ ಸಲಹೆಗಾರರನ್ನು ಸಂಪರ್ಕಿಸಿ.

ಕೃಷಿಗೆ ಸಂಬಂಧಿಸಿದ ಆದಾಯ ಯಾವುದು ಎಂಬುದನ್ನು ಆದಾಯ ತೆರಿಗೆ ಸೆಕ್ಷನ್ 2(1ಎ) ಯಲ್ಲಿ ಹೇಳಲಾಗಿದೆ. ಇದಕ್ಕೆ ಸಂಬಂಧಿಸಿದ ವಿನಾಯಿತಿಗಳನ್ನು ಸೆಕ್ಷನ್ 10(1) ರಲ್ಲಿ ಹೇಳಲಾಗಿದೆ. ನಿಮ್ಮ ಎಲ್ಲ ಆದಾಯಗಳೂ ವಿನಾಯಿತಿ ಪರಿಧಿಯಲ್ಲೇ ಇವೆ. ಇನ್ನು ನಿಮ್ಮ ಕೃಷಿಗೆ ಸಂಬಂಧಪಟ್ಟ ಲೆಕ್ಕಪತ್ರದ ನಿರ್ವಹಣೆ ಬಗ್ಗೆ ಹೇಳುವುದಾದರೆ, ಇದು ವಾಣಿಜ್ಯ ವ್ಯವಹಾರದ ಪರಿಮಿತಿಯಲ್ಲಿ ಇಲ್ಲ. ಹಾಗಾಗಿ, ಯಾವುದೇ ಲೆಕ್ಕಪತ್ರ ತಪಾಸಣೆಯ ಅಗತ್ಯ ಇಲ್ಲ. ಆದರೆ, ನೀವು ಘೋಷಿಸುವ ಕೃಷಿ ಆದಾಯ ಸಂದೇಹಾಸ್ಪದವಾಗದ ರೀತಿ ಇರಲಿ. ಇದಕ್ಕಾಗಿ ಬೇಕಾದ ಮಾಹಿತಿ ಹಾಗೂ ದಿನವಹಿ ಲೆಕ್ಕ ಇಟ್ಟುಕೊಳ್ಳಿ.

ದೊಡ್ಡ ಮೊತ್ತದ ವ್ಯವಹಾರವನ್ನು ಯಾವತ್ತೂ ಬ್ಯಾಂಕ್ ಮೂಲಕವೇ ನಡೆಸಿ. ಯಾವುದೇ ಸಂದರ್ಭದಲ್ಲಿ ಒಂದೇ ಮಾರಾಟಕ್ಕೆ ಸಂಬಂಧಿಸಿ ₹2 ಲಕ್ಷಕ್ಕಿಂತ ಅಧಿಕ ಮೊತ್ತವನ್ನು ಪಡೆಯದಿರಿ. ಕೃಷಿ ವ್ಯವಹಾರಕ್ಕಾಗಿ ಪ್ರತ್ಯೇಕವಾದ ಬ್ಯಾಂಕ್ ಖಾತೆ ನಿರ್ವಹಿಸಿ ಮಾಹಿತಿ ಇರಿಸುವುದು ಪಾರದರ್ಶಕತೆ ದೃಷ್ಟಿಯಲ್ಲಿ ಉತ್ತಮ ನಡೆ ಆಗಿದೆ.