ಉದ್ಯಮದ ಹೊಸ ಬೆಳಕು ‘ಎಲ್ಇಡಿ’

ಯಶಸ್ಸಿನ ಹಿಂದೆ...
ಎಲ್ಇಡಿ ಲೈಟಿಂಗ್ ಉದ್ಯಮದ ಈ ಯಶಸ್ಸಿನ ಹಿಂದೆ ಹಲವು ಕಾರಣಗಳಿ­ರುವುದನ್ನು ಗುರುತಿಸಬಹುದು. ಎಲ್‌ಇಡಿ  ಉಪಕರಣಗಳ ಬೆಲೆಯಲ್ಲಿ ಗಮನಾರ್ಹ ಇಳಿಕೆ(ಶೇ 25ರಷ್ಟು) ಕಂಡುಬಂದಿರುವುದು ಮುಖ್ಯ ಕಾರಣ.

ಎಲ್ಇಡಿ ಚಿಪ್ ಹಾಗೂ ವಿದ್ಯುಚ್ಚಕ್ತಿ ಕ್ಷೇತ್ರದ ತಾಂತ್ರಿಕ ಪ್ರಗತಿ ಮತ್ತಿತರ ಕಾರಣಗಳಿಂದಾಗಿ ಸಾಮಾನ್ಯ ವಿದ್ಯುತ್‌ ದೀಪಗಳು ಮತ್ತು ಬೀದಿದೀಪಗಳಂತಹ ಪರಿಕರಗಳ ಬೆಲೆಯೂ ಇಳಿಮುಖವಾಗಿದೆ. ಆಕರ್ಷಕ ಬಣ್ಣ, ಹೊಸ ವಿನ್ಯಾಸ, ನವೀನ ತಂತ್ರಜ್ಞಾನದಿಂದಲೂ ಎಲ್ಇಡಿ ಉತ್ಪನ್ನಗಳು ಜನರ ಗಮನ ಸೆಳೆಯುತ್ತಿವೆ. ಗ್ರಾಹಕರ ಮೆಚ್ಚುಗೆ, ವಿಶ್ವಾಸಕ್ಕೂ ಪಾತ್ರವಾಗಿರುವ ಈ ದೀಪಗಳು, ಬೇರಾವುದೇ ವಿದ್ಯುತ್‌ ದೀಪಗಳಿಗಿಂತಲೂ ಹೆಚ್ಚು ಜೀವಿತಾವಧಿ ಹೊಂದಿವೆ.

ಈ ಹಿಂದೆ ಬಳಕೆಯಲ್ಲಿದ್ದ ತಂತ್ರಜ್ಞಾನದಡಿಯೇ ತಯಾರಾದ ವಿದ್ಯುತ್‌ ದೀಪಗಳಿಗೆ ಹೋಲಿಸಿದರೆ ಎಲ್ಇಡಿ ದೀಪ ಮತ್ತು ಉಪಕರಣಗಳು ಶೇ 50ರವರೆಗೂ ವಿದ್ಯುತ್‌ ಉಳಿತಾಯ ಮಾಡುತ್ತವೆ. ಇಲ್ಲಿ ಬೆಳಕಿನ ಬಣ್ಣ, ತೀವ್ರತೆ ಮತ್ತು ಬೆಳಕು ಹರಿಯಬೇಕಾದ ದಿಕ್ಕಿನಲ್ಲಿ ನಿಯಂತ್ರಣಕ್ಕೆ ಅವಕಾಶವಿರುವುದನ್ನೂ ಕಾಣಬಹುದು. ಇದು ಬೆಳಕಿನ ವ್ಯವಸ್ಥೆಯಲ್ಲಿ ವೈವಿಧ್ಯ ಮತ್ತು ಭಿನ್ನ ವಿನ್ಯಾಸಗಳನ್ನೂ ಸಾಧ್ಯವಾಗಿಸಬಲ್ಲದಾಗಿದೆ.
ರಸ್ತೆಗಳಲ್ಲಿ ಪಾದಚಾರಿಗಳು ಮತ್ತು ವಾಹನಗಳ ರಾತ್ರಿ ಸಂಚಾರಕ್ಕೆ ಅಗತ್ಯವಾದಷ್ಟು ಪ್ರಖರ ಬೆಳಕನ್ನು ಹೊರಾಂಗಣ ಎಲ್ಇಡಿ ಉಪಕರಣಗಳು ಒದಗಿಸಬಲ್ಲವಾಗಿವೆ.

ಶೈಕ್ಷಣಿಕ ಸಂಸ್ಥೆಗಳಲ್ಲಿ ವಿದ್ಯಾರ್ಥಿಗಳ ವ್ಯಾಸಂಗಕ್ಕೆ ಅನುಕೂಲಕರ­ವಾದ ರೀತಿ  ಅಳವಡಿಸಲು, ಚತುರ ನಿಯಂತ್ರಣ ವ್ಯವಸ್ಥೆ ಇರುವಂತೆ ಎಲ್‌ಇಡಿ ದೀಪಗಳನ್ನು ವಿನ್ಯಾಸಗೊಳಿಸಲಾಗಿದೆ. ಅಲ್ಲದೇ, ಕಟ್ಟಡದ ಗಾತ್ರ–ಆಕಾರ ಮತ್ತು ಅಗತ್ಯಗಳಿಗೆ ತಕ್ಕಂತೆ ಕ್ರಿಯಾತ್ಮಕವಾಗಿ ಬೆಳಕಿನ ಮಟ್ಟವನ್ನೂ ಬದಲಿಸಬಹುದಾಗಿದೆ. ಬೆಡ್ ರೂಮ್‌, ಬಾತ್ ರೂಮ್‌, ರೀಡಿಂಗ್ ರೂಮ್‌, ಕಿಚನ್, ಹಾಲ್ ಹೀಗೆ ಮನೆಯ ಕೋಣೆಗಳ ಸ್ವಭಾವಕ್ಕೆ ತಕ್ಕಂತೆ ದೀಪಗಳ ಬಣ್ಣ, ವಿನ್ಯಾಸಗಳನ್ನು ಆಯ್ಕೆ ಮಾಡಿಕೊಳ್ಳಬಹುದು. ಮಾತ್ರವಲ್ಲ, ಉತ್ತಮವಾಗಿ ವಿನ್ಯಾಸಗೊಳಿಸಿದ ಈ ಎಲ್ಇಡಿ ಉತ್ಪನ್ನಗಳು ಸಾಮಾನ್ಯ ದೀಪಗಳಿಗಿಂತ ಹೆಚ್ಚು ಕಾಲ ಬಾಳಿಕೆ ಬರುತ್ತವೆ. ಸ್ಮಾರ್ಟ್ ನಿಯಂತ್ರಣ ವ್ಯವಸ್ಥೆ ಅಳವಡಿಸಿದರಂತೂ ಎಲ್‌ಇಡಿ ಉಪಕರಣಗಳ ಬಾಳಿಕೆ ಅವಧಿ ದೀರ್ಘವಾಗಿರಲಿದೆ.

ಯಶಸ್ಸಿಗೆ ಕಾರಣ
ವಿವಿಧ ರೂಪ, ಆಕಾರ ಹಾಗೂ ಬಣ್ಣಗಳಲ್ಲಿ ಲಭ್ಯವಿರುವ ಎಲ್ಇಡಿ ದೀಪಗಳು ನಿಮ್ಮ ಮನೆಯ ಯಾವುದೇ ಜಾಗವನ್ನು ಅಲಂಕರಿಸಬಹುದು.
ಎಲ್ಇಡಿ ದೀಪಗಳು ಗಾಜು, ಫಿಲ್ಮೆಂಟ್‌, UV ಲೈಟ್‌ ಅಥವಾ ಮರ್ಕ್ಯುರಿ(ಪಾದರಸ) ಹೊಂದಿರುವುದಿಲ್ಲ. ಹಾಗಾಗಿ, ಪ್ರಕಾಶಮಾನ ದೀಪಗಳಿಗಿಂತ ಶೇ 85ರಷ್ಟು ಕಡಿಮೆ ವಿದ್ಯುತ್ ಬಳಸಿಕೊಂಡು ಹೆಚ್ಚಿನ ಬೆಳಕು ನೀಡುತ್ತವೆ.

ಪ್ರಕಾಶಮಾನ ಲ್ಯಾಂಪಿಗೆ(ICLs) ಹೋಲಿಸಿದಾಗ ಎಲ್ಇಡಿ ತಂತ್ರಜ್ಞಾನ ಪರಿಣಾಮಕಾರಿ ಮತ್ತು ಪರಿಸರ ಸ್ನೇಹಿ ಎಂದು ಗುರುತಿಸಲಾಗಿದೆ.
ಎಲ್ಇಡಿ ದೀಪ ಬೆಳಕು ನೀಡುವಾಗ ಉಷ್ಣಾಂಶ ಉತ್ಪಾದಿಸಿ­ದರೂ ಅದನ್ನು ವಾತಾವರಣಕ್ಕೆ ಬಿಡುಗಡೆ ಮಾಡುವುದಿಲ್ಲ.

ದೇಶದ ಸದ್ಯದ ಎಲ್ಲ ಬಗೆ ವಿದ್ಯುತ್‌ ದೀಪಗಳ ಮಾರುಕಟ್ಟೆ ಗಾತ್ರ  ₨9600 ಕೋಟಿಗಳಷ್ಟಿದೆ. ಎಲ್ಇಡಿ ಲೈಟಿಂಗ್ ಉದ್ಯಮದ ಪಾಲು ಸುಮಾರು ₨1000 ಕೋಟಿ ಎಂದು ಅಂದಾಜು ಮಾಡಲಾಗಿದೆ. ದೇಶದ ಎಲ್ಇಡಿ ಮಾರುಕಟ್ಟೆ 2014ರ ವೇಳೆಗೆ ಅಂದಾಜು ಶೇ 54ರಷ್ಟು ವೃದ್ಧಿ ಕಾಣುವು ನಿರೀಕ್ಷೆ ಇದೆ.

ಸವಾಲು–ಸಮಸ್ಯೆ
ಇಷ್ಟೆಲ್ಲ ಅನುಕೂಲ ಮತ್ತು ಲಾಭ  ಇರುವ ಎಲ್ಇಡಿ ಉಪಕರಣಗಳು ಈವೇಳೆಗೆ ಮನೆಗಳಲ್ಲಿ, ಬೀದಿದೀಪಗಳಲ್ಲಿ, ವಾಣಿಜ್ಯ ಕ್ಷೇತ್ರಗಳಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಕಾಣಿಸಿಕೊಳ್ಳಬೇಕಿತ್ತು. ಆದರೆ ಬಳಕೆ ಪ್ರಮಾಣ ಶೇ 30ಕ್ಕೂ ಕಡಿಮೆ ಇದೆ. ಇದಕ್ಕೆ ಅದರದೇ ಆದ ಕೆಲವು ಮಿತಿಗಳಿದ್ದು, ಉದ್ಯಮದ ಬೆಳವಣಿಗೆಗೆ ತಡೆಗೋಡೆ­ಯಾಗಿವೆ.
ಎಲ್ಇಡಿ ಉಪಕರ ಣಗಳ ಉತ್ಪಾದನಾ ವೆಚ್ಚ, ಬೇಡಿಕೆ ಹಾಗೂ ಪೂರೈಕೆ ಬಗೆಗಿನ ಕಾಯ್ದೆಗಳ ಬಗ್ಗೆ ಉದ್ಯಮ ಕ್ಷೇತ್ರದಲ್ಲಿ ಹೆಚ್ಚಿನ ತಿಳಿವಳಿಕೆ ಇಲ್ಲದಿರುವುದು, ಗುಣಮಟ್ಟದ ಉತ್ಪನ್ನ ತಯಾರಿಕೆಯಲ್ಲಿ ತೊಡಕು ಇರುವುದೂ ಸೇರಿದಂತೆ ಅನೇಕ ಸವಾಲುಗಳು ಈ ಉದ್ಯಮದ ಹಾದಿಗೆ ಅಡ್ಡವಾಗಿವೆ. ಎಲ್ಲಕ್ಕಿಂತಲೂ ಮುಖ್ಯವಾಗಿ ಪ್ರಸ್ತುತ ಮಾರುಕಟ್ಟೆ ಎಲ್ಇಡಿ ಉತ್ಪನ್ನಗಳಿಗೆ ಸಿದ್ಧವಾಗಿದೆಯೇ ಮತ್ತು ಇಂತಹ ಉತ್ಪನ್ನಗಳ ತಾರ್ಕಿಕ ವಿವರಣೆ ಏನು ಎಂಬುದನ್ನೂ ಗಮನಿಸಬೇಕಿದೆ.

ಸರ್ಕಾರದ ಬೆಂಬಲ
ಸರ್ಕಾರದ ಪ್ರೋತ್ಸಾಹದಾಯಕ ನೀತಿಯಿಂದಾಗಿ 2018ರ ವೇಳೆಗೆ ದೇಶದ ಎಲ್ಇಡಿ ಲೈಟಿಂಗ್ ಮಾರುಕಟ್ಟೆ 8 ಪಟ್ಟು ಅಂದರೆ 127.90 ಕೋಟಿ ಅಮೆರಿಕನ್‌ ಡಾಲರ್‌ಗಳಷ್ಟು (₨7930 ಕೋಟಿಗಳಷ್ಟು) ಬೆಳವಣಿಗೆ ಕಾಣಲಿದೆ ಎಂದು ಅಂದಾಜು ಮಾಡಲಾಗಿದೆ.
ವಿದ್ಯುತ್‌ ಉಳಿತಾಯ ದೃಷ್ಟಿಯಿಂದ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಎಲ್ಇಡಿ ದೀಪಗಳ ಮಾರುಕಟ್ಟೆ ಬೆಲೆಯನ್ನು ಇನ್ನಷ್ಟು ಇಳಿಸುವ ಪ್ರಯತ್ನ ನಡೆಸಿವೆ. ಕೇಂದ್ರ ಸರ್ಕಾರ, ಎಲ್‌ಇಡಿ ದೀಪಗಳಿಗೆ ಅಗತ್ಯವಾದ ಚಿಪ್ ತಯಾರಿಕೆ ಘಟಕಗಳನ್ನು ದೇಶದಲ್ಲಿಯೇ ಆರಂಭಿಸುವುದಕ್ಕೆ ಪ್ರೋತ್ಸಾಹ ನೀಡಲು ಯೋಜಿಸಿದೆ. ಅಲ್ಲದೇ, ಎಲ್ಇಡಿ ಉತ್ಪನ್ನಗಳಿಗೆ ಮೌಲ್ಯವರ್ಧಿತ ತೆರಿಗೆ (ವ್ಯಾಟ್‌) ಕಡಿಮೆ ಮಾಡುವ ಮೂಲಕವೂ ಎಲ್ಇಡಿ ಉತ್ಪನ್ನಗಳಿಗೆ ಪ್ರೋತ್ಸಾಹ ನೀಡಲಾಗುತ್ತಿದೆ.

ನಗರಗಳಲ್ಲಿ ಎಲ್ಇಡಿ ಬೀದಿ ದೀಪ ಅಳವಡಿಕೆಯ ಪ್ರಾಯೋಗಿಕ ಯೋಜನೆಗಳಿಗೆ ಕೇಂದ್ರ ಸರ್ಕಾರ ಧನಸಹಾಯವನ್ನೂ ಮಾಡುತ್ತಿದೆ. ಎಲ್ಇಡಿಗೆ ಅತ್ಯುತ್ತಮ ಮಾರುಕಟ್ಟೆ ಒದಗಿಸಿಕೊಟ್ಟು ವಿದ್ಯುತ್ ತಯಾರಿಕೆ ಉದ್ಯಮವನ್ನು ಬೆಂಬಲಿಸುವುದು ಸರ್ಕಾರದ ಚಿಂತನೆಯಾಗಿದೆ.
ಮುಂದಿನ ಐದು ವರ್ಷಗಳಲ್ಲಿ ರಸ್ತೆ ದೀಪಗಳಲ್ಲಿ ಶೇ 42ರಷ್ಟು ಎಲ್‌ಇಡಿ ದೀಪಗಳೇ ಇರಲಿವೆ. ರೈಲ್ವೆ ಸಹ ತನ್ನ ವಿದ್ಯುತ್‌ ಉಪಕರಣಗಳಲ್ಲಿ ಶೇ 62ರಷ್ಟು ಎಲ್‌ಇಡಿಗೆ ಆದ್ಯತೆ ನೀಡಲಿದೆ. ಕೈಗಾರಿಕೆಗಳಲ್ಲಿಯೂ ಶೇ 48ರಷ್ಟು ಮತ್ತು ವಾಣಿಜ್ಯ ಕೇಂದ್ರಗಳಲ್ಲಿ ಶೇ 39ರಷ್ಟು ಹಾಗೂ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ವಿವಿಧ ಇಲಾಖೆಗಳಲ್ಲಿ ಶೇ 40ರಷ್ಟು ಎಲ್ಇಡಿ ಉತ್ಪನ್ನಗಳಿಗೆ ಬೇಡಿಕೆ ಬರಲಿದೆ ಎಂಬುದು ಉದ್ಯಮದ ನಿರೀಕ್ಷೆಯಾಗಿದೆ.

ಭವಿಷ್ಯ-ಅವಕಾಶ
ಎಲ್ಇಡಿ ಲೈಟಿಂಗ್ ಉದ್ಯಮ ಆಶಾದಾಯಕ ವೃತ್ತಿ ಆಯ್ಕೆಗಳಲ್ಲಿ ಒಂದಾಗಿ ಹೊರಹೊಮ್ಮುತ್ತಿದೆಯೇನೊ ನಿಜ. ಆದರೆ ಇಲ್ಲಿ ಅಗತ್ಯವಿರುವ ಪ್ರತಿಭೆಗಳ ಕೊರತೆ ಇರುವುದೂ ಅಷ್ಟೇ ಸತ್ಯ.

ಎಲ್ಇಡಿ ಲೈಟಿಂಗ್ ಉತ್ಪನ್ನಗಳು ದೇಶದಲ್ಲಿ ಸರ್ವೇಸಾಮಾನ್ಯ ಎನ್ನುವಷ್ಟರ ಮಟ್ಟಿಗೆ ಬಳಕೆಗೆ ಬರಲು ಇನ್ನೂ ಸ್ವಲ್ಪ ಸಮಯ ಹಿಡಿಯಬಹುದು. ಆದರೆ ಈಗಾಗಲೇ ಹಲವು ಅಂತರರಾಷ್ಟ್ರೀಯ ಕಂಪೆನಿಗಳು ಭಾರತದ ಎಲ್‌ಇಡಿ ಉದ್ಯಮ ಕ್ಷೇತ್ರದತ್ತ ಮುಖ ಮಾಡಿವೆ. ಇದೇ ಕಾರಣವಾಗಿ ವಿಪ್ರೊ ಮತ್ತು ಫಿಲಿಪ್ಸ್ನಂತಹ ಕಂಪೆನಿಗಳೂ ಎಲ್‌ಇಡಿ ಕ್ಷೇತ್ರದಲ್ಲಿ ಹೆಚ್ಚಿನ ಹೂಡಿಕೆ ಮಾಡಲು ಸಜ್ಜಾಗುತ್ತಿವೆ.

ಹೊಸ ಕಂಪೆನಿಗಳು ಎಲ್‌ಇಡಿ ಲೈಟಿಂಗ್‌ ಉಪಕರಣ ತಯಾರಿಕೆ ಆರಂಭಿಸಿ ದಾಗ ತಂತ್ರಜ್ಞಾನ ಅಭಿವೃದ್ಧಿ ವಿಭಾಗಕ್ಕೇ ಶೇ 30ರಷ್ಟು ಉದ್ಯೋಗಿಗಳ ಅಗತ್ಯ ಬೀಳಲಿದೆ. ಜತೆಗೆ ಉಪಕರಣಗಳ ತಯಾರಿಕೆ ವಿಭಾಗದಲ್ಲೂ ಹೆಚ್ಚಿನ ಉದ್ಯೋಗಾವಕಾಶ ಸೃಷ್ಟಿಯಾಗಲಿವೆ.

ಎಂಜಿನಿಯರಿಂಗ್ ವಿದ್ಯಾರ್ಥಿಗಳಷ್ಟೇ ಅಲ್ಲ, ಡಿಪ್ಲೊಮಾ ಪೂರೈಸಿದವರೂ ಇಲ್ಲಿ ಹೆಚ್ಚಿನ ಅವಕಾಶ ಪಡೆಯಬಹುದು. ಆದರೆ, ಕ್ರಿಯಾಶೀಲ ಮನಸ್ಸು ಹಾಗೂ ತಂತ್ರಜ್ಞಾನದಲ್ಲಿ ನಾವಿನ್ಯತೆ ತೋರಬಲ್ಲ ಸಾಮರ್ಥ್ಯ ಅಗತ್ಯ.

ಎಂಜಿನಿಯರಿಂಗ್ ಕಾಲೇಜುಗಳಲ್ಲಿ ಎಲ್ಇಡಿ ತಂತ್ರಜ್ಞಾನ ಬೋಧನೆಗೆ ಒತ್ತು ನೀಡದೇ ಇರುವುದೇ ಈ ವಲಯ ಇಂದು ಪ್ರತಿಭೆಗಳ ಕೊರತೆ ಎದುರಿಸಲು ಕಾರಣ ಎಂಬ ಅಭಿಪ್ರಾಯವಿದೆ.

ಈ ಕೊರತೆ ನೀಗಿಸಲು ಮತ್ತು ಎಲ್ಇಡಿ ಉದ್ಯಮ ಕ್ಷೇತ್ರಕ್ಕೆ ಸಮರ್ಥ ಮಾನವ ಸಂಪನ್ಮೂಲವನ್ನು ಒದಗಿಸಲು ಕೆಲವು ಖಾಸಗಿ ಶಿಕ್ಷಣ ಸಂಸ್ಥೆಗಳು ಎಲ್ಇಡಿ ತಂತ್ರಜ್ಞಾನ ಕುರಿತ ಪ್ರತ್ಯೇಕ ಮತ್ತು ವಿಶೇಷವಾದ ಡಿಪ್ಲೊಮಾ ಕೋರ್ಸ್‌ ಆರಂಭಿಸಲು ಮುಂದಾಗಿವೆ. ಬೋಧನಾ ಶುಲ್ಕ ₨25,000ದಿಂದ ₨40,000ದವರೆಗೂ ಇರಲಿದೆ.

ಕಡಿಮೆ ಬಂಡವಾಳ ಎಲ್‌ಇಡಿ’ ಘಟಕ
ಎಲ್ಇಡಿ ಲೈಟಿಂಗ್ ವೃತ್ತಿಜೀವನ ಎಂದರೆ ಹೆಸರಾಂತ ಕಂಪೆನಿಯಲ್ಲಿ ಎಂಜಿನಿಯರಿಂಗ್ ಅಥವಾ ಇನ್ನಾವುದೇ ವಿಭಾಗದಲ್ಲಿ ಕೆಲಸ ಮಾಡುವುದಷ್ಟೆ ಅಲ್ಲ. ಉದ್ಯಮಿಯಾಗಲು, ಚಿಕ್ಕದಾಗಿ ಕಂಪೆನಿ ಆರಂಭಿಸಲೂ ಈ ವಲಯದಲ್ಲಿ ವಿಪುಲ ಅವಕಾಶಗಳಿವೆ. ‘ಮೈಕ್ರೊ ಎಲ್‌ಇಡಿ ಪ್ರಾಜೆಕ್ಟ್’ ಆರಂಭ ದೊಡ್ಡ ಸವಾಲೇನೂ ಅಲ್ಲ. ಅತ್ಯಂತ ಕಡಿಮೆ ಬಂಡವಾಳ ಹೂಡಿ, ಚಿಕ್ಕ ಜಾಗದಲ್ಲಿ ಎಲ್‌ಇಡಿ ಕಂಪೆನಿ ಸ್ಥಾಪಿಸಬಹುದು. ಸುಮಾರು ₨50,000ದಿಂದ ₨10 ಲಕ್ಷದವರೆಗಿನ  ಬಂಡವಾಳ ಹಾಗೂ ಕೇವಲ 300 ಚದರಡಿ ಜಾಗದಲ್ಲಿ ಎಲ್‌ಇಡಿ ಘಟಕ ಆರಂಭಿಸಬಹುದು.

ಮನೆಯಲ್ಲೇ ತಯಾರಿಕೆ
1ರಿಂದ 5 ವಾಟ್ ಸಾಮರ್ಥ್ಯದ ಎಲ್‌ಇಡಿ ಸೋಲಾರ್ ಲೈಟಿಂಗ್ ಉಪಕರಣಗಳನ್ನು ಮನೆಯಲ್ಲಿಯೂ ತಯಾರಿಸಬಹುದು. 1 ವಾಟ್ ಎಲ್ಇಡಿ ಬಲ್ಬ್, ಬಲ್ಬ್ ಹೋಲ್ಡರ್, ಬ್ಯಾಟರಿ ಇನ್ವರ್ಟರ್, ರಿಚಾರ್ಜಬಲ್ ಬ್ಯಾಟರಿ, ಸೋಲಾರ್ ಪ್ಯಾನಲ್ ಮೊದಲಾದ ಸಾಮಗ್ರಿಗಳನ್ನು ಜೋಡಣೆ ಮಾಡುವ ಮೂಲಕ ಎಲ್‌ಇಡಿ ಲೈಟಿಂಗ್ ಯುನಿಟ್‌ ತಯಾರಿಸಿ ಮಾರಾಟ ಮಾಡಬಹುದು. 1 ವಾಟ್‌ ಸೋಲಾರ್ ಎಲ್‌ಇಡಿ ಲೈಟ್ ಸುಮಾರು ₨7000 ಆಗುತ್ತದೆ. ಇದರ ತಯಾರಿಕೆ ಮಾರಾಟದಲ್ಲಿ ಸಾಕಷ್ಟು ಲಾಭ ಗಳಿಸಬಹುದು.

ವಿದ್ಯುತ್ ಕೊರತೆ ಎದುರಿಸುತ್ತಿರುವ ಗ್ರಾಮೀಣ ಪ್ರದೇಶಗಳು ಈ ಸೋಲಾರ್ ದೀಪಗಳಿಗೆ ಪ್ರಮುಖ ಮಾರುಕಟ್ಟೆಯಾಗಿವೆ. 

ಸುನಿಲ್ ನಲವಡೆ, ನಿಯಂತ್ರಕರು, ಹುಬ್ಬಳ್ಳಿ ಸಿಟಿ ಇ-ಗ್ರೂಪ್