ಇತ್ತೀಚೆಗೆ ಹೀಬ್ರು ಬೈಬಲ್‌ ಸುದ್ದಿಗೆ ಕಾರಣವಾಗಿದೆ. ಇದುವರೆಗೂ ಈ ಭಾಷೆಯ ಗ್ರಂಥ ಇಂಗ್ಲಿಷಿಗೆ ಅನುವಾದವಾಗಿರುವುದೆಲ್ಲ ಹಲವರು ವಿದ್ವಾಂಸರ ಮೂಲಕ; ಎಂದರೆ ವಿದ್ವಾಂಸರ ತಂಡ ಸಾಮೂಹಿಕವಾಗಿ ಅನುವಾದದ ಕಾರ್ಯವನ್ನು ಮಾಡಿತ್ತು. ಆದರೆ ಇದೇ ಮೊದಲ ಬಾರಿಗೆ ಒಬ್ಬರೇ ವ್ಯಕ್ತಿ ಸ್ವತಂತ್ರವಾಗಿ ಹೀಬ್ರು ಬೈಬಲನ್ನು ಇಂಗ್ಲಿಷಿಗೆ ಅನುವಾದಿಸಿದ್ದಾರೆ. ಈ ಸಾಧನೆಯನ್ನು ಮಾಡಿದವರೇ ರಾಬರ್ಟ್‌ ಆಲ್ಟರ್‌; ಬರ್ಕ್‌ಲೀಯ ‘ಯೂನಿವರ್ಸಿಟಿ ಆಫ್‌ ಕ್ಯಾಲಿಫೋರ್ನಿಯಾ’ದ ಈ ಬೈಬಲ್‌ ವಿದ್ವಾಂಸ, ಇಪ್ಪತ್ತೊಂದು ವರ್ಷಗಳ ಸತತ ಪರಿಶ್ರಮದ ಮೂಲಕ ಅನುವಾದವನ್ನು ಪೂರ್ಣಗೊಳಿಸಿದ್ದಾರೆ. 1997ರಲ್ಲಿ ಆರಂಭವಾದ ಅನುವಾದ ಮುಕ್ತಾಯವಾದದ್ದು 2018ರಲ್ಲಿ. ಆಲ್ಟರ್‌ ಅವರಿಗೆ ಈಗ 85 ವರ್ಷಗಳು. ಜಗತ್ತಿನ ವಿದ್ವತ್‌ವಲಯ ಅವರ ಈ ಅಪೂರ್ವಕಾರ್ಯವನ್ನು ಕೊಂಡಾಡುತ್ತಿದೆ. ಈಗ ಜನಪ್ರಿಯವಾಗಿರುವ ಬೈಬಲ್‌ ಅನುವಾದಗಳಲ್ಲಿರುವ ಹಲವು ದೋಷಗಳನ್ನು ಆಲ್ಟರ್‌ ಅವರ ಅನುವಾದ ಗುರುತಿಸಿದೆ. ಕೆಲವರು ಅವರ ಅನುವಾದವನ್ನೂ ಪ್ರಶ್ನಿಸುತ್ತಿದ್ದಾರೆನ್ನಿ!
