ಬೆರಗಿನ ಬೆಳಕು: ವಿಪರೀತದ ಆಸೆ

ವಾಚ್ಯಾರ್ಥ: ಬದುಕಿಗೆ ದೊರೆತ ಸುಖ ಮಿತಿ ಇಲ್ಲದ್ದೇನಲ್ಲ. ಆದರೆ ಚಪಲತೆಯಿಂದ, ಆಸೆಯಿಂದ ಕಣ್ಣನ್ನು ಆ ಕಡೆಗೆ ಈ ಕಡೆಗೆ ಚಲಿಸುತ್ತಿದ್ದರೆ ದೊರೆ ಯುವುದು ಒಂದೇ ಫಲ. ಅದು ಇರುವ ಪರಿಸ್ಥಿತಿಯ ನಷ್ಟ.ವಿಪರೀತದಆಸೆಎಂದಿಗೂ ವಿಫಲವೆ.

ವಿವರಣೆ: ಪುರಾಣ, ಇತಿಹಾಸ ಮತ್ತು ವರ್ತಮಾನಗಳನ್ನು ಸೂಕ್ಷ್ಮವಾಗಿ ಗಮನಿಸಿದರೆ ಮಹಾ ಮಹಾ ಶಕ್ತಿಶಾಲಿಗಳು, ಎತ್ತರಕ್ಕೆ ಏರಬಹುದಾಗಿದ್ದವರು ದೊಪ್ಪನೆ ಕೆಳಗೆ ಬಿದ್ದು ತಮ್ಮ ಜೀವಿತದಲ್ಲಿ ಶಕ್ತಿಹೀನವಾಗಿ, ಅವಮಾನಿತರಾಗಿದ್ದನ್ನು ಕಾಣಬಹುದು. ಮಹಾ ಶಕ್ತಿಶಾಲಿಯಾಗಿದ್ದ ಯಯಾತಿಗೆ ಭೋಗದ ಅಪೇಕ್ಷೆ. ತನ್ನ ಕಾಮಾಪೇಕ್ಷೆಯನ್ನು ತೀರಿಸಿಕೊಳ್ಳಲು ಮಗನಿಂದಲೇ ಯೌವನವನ್ನು ಪಡೆಯುತ್ತಾನೆ. ಭೋಗದಿಂದ ಭೋಗವನ್ನು ಗೆಲ್ಲುವುದು ಅಸಾಧ್ಯವೆಂದು ತಿಳಿದು ಮಗನಿಗೆ ಯೌವನವನ್ನು ಮರಳಿಸುತ್ತಾನೆ. ಅತಿ ಕಾಮದ ಅಪೇಕ್ಷೆ ಯಯಾತಿಯನ್ನು ಹಣ್ಣು ಮಾಡಿತು. ಗ್ರೀಕ್ ಪುರಾಣಗಳಲ್ಲಿ ಬರುವ ರಾಜ ಮಿಡಾಸ್‌ನ ಕಥೆ ರೋಚಕವಾದದ್ದು. ದೇವಕರುಣೆಯಿಂದ ವರ ಪಡೆದವ ಮಿಡಾಸ್. ತಾನು ಅಪರಿಮಿತ
ಶ್ರೀಮಂತನಾಗಬೇಕೆಂದುಕೊಂಡು, ಮುಟ್ಟಿದ್ದೆಲ್ಲ ಬಂಗಾರವಾಗಲಿ ಎಂಬ ವರ ಕೇಳಿದ. ಈ ಅತಿಯಾಸೆ ಒಳ್ಳೆಯದನ್ನು ಮಾಡಿತೆ? ಆತ ಕುಡಿಯಬೇಕೆಂದಿದ್ದ ನೀರು, ತಿನ್ನಬೇಕೆಂದಿದ್ದ ಹಣ್ಣು, ಆಹಾರಗಳು ಚಿನ್ನವಾದವು. ಅವನನ್ನು ಪ್ರೀತಿಯಿಂದ ಓಡಿಬಂದು ತಬ್ಬಿದ ಮಗಳು ಕೂಡ ಚಿನ್ನದ ವಿಗ್ರಹವಾದಳು. ಅವನ ಜೀವನದಲ್ಲಿ ಸಂತೋಷ ಕರಗಿ ಹೋಯಿತು. ಇಡೀ ಜಗತ್ತಿನ
ಮೇಲೆ ತನ್ನ ಅಧಿಕಾರವನ್ನು ಚಲಾಯಿಸಬೇಕೆಂಬ ಮಹಾತ್ವಾಕಾಂಕ್ಷೆಯಿಂದ ಹೊರಟ ಹಿರಣ್ಯಕಶಿಪುವಿಗೆ ಏನಾಯಿತೆಂಬುದು ಎಲ್ಲರಿಗೂ ತಿಳಿದದ್ದೇ. ಪ್ರಪಂಚದಲ್ಲಿ ಶಾಶ್ವತವಾದ ಮನ್ನಣೆಯನ್ನು ಪಡೆಯಲೆಂದು ಗುರುಗಳ ವೇಷ ಧರಿಸಿ, ಕೆಲಕಾಲ ಜನರನ್ನು ತಮ್ಮ ಮಾತಿನಿಂದ, ಆಕರ್ಷಣೆಗಳಿಂದ ಮರುಳು ಮಾಡಿ, ನಂತರ, ಅವರ ಕಣ್ಣಿನಲ್ಲಿ ಚಿಕ್ಕವರಾಗಿ, ಜೈಲು ಸೇರಿಯೋ, ಕೊಲೆಯಾಗಿಯೋ ಮರೆಯಾದವರ ಕಥೆಗಳು ಅನೇಕವಿವೆ. ನಮ್ಮ ಅಪೇಕ್ಷೆಗಳಿಗೆ ಮಿತಿ ಇಲ್ಲ. ಅದು ದೇಹಕಾಮವಾಗಬಹುದು, ಅಧಿಕಾರವಾಗಬಹುದು, ಖ್ಯಾತಿಯಾಗಬಹುದು, ಚಿರಂಜೀವಿತ್ವವಾಗಬಹುದು, ಹಣವಾಗಬಹುದು. ಮನುಷ್ಯ ಜೀವನದಲ್ಲಿ ಎಲ್ಲವನ್ನೂ ಒಂದು ಹದದಲ್ಲಿ ಬಳಸಲು ಸಾಧ್ಯವಿದೆ. ಆದರೆ ಅದು ಮಿತವಾದದ್ದು ಎಂಬ ಅರಿವು ಇರುವವರೆಗೆ ಎಲ್ಲವೂ ಚೆನ್ನ. ಕಗ್ಗ ಅದನ್ನು ಒತ್ತಿ ಹೇಳುತ್ತದೆ.

ಜೀವನಕ್ಕೆ ದೊರೆಯುವ ಸುಖ ಅಮಿತವಾದದ್ದಲ್ಲ. ಆದರೆ ಅತಿಯಾಸೆಯಿಂದ ದೃಷ್ಟಿ ಯನ್ನು ಆಚೀಚೆ ತಿರುಗಿಸುತ್ತ, ಅಸಾಧ್ಯವಾದುದಕ್ಕೆ ಕೈಚಾಚಿದರೆ ಆಗುವುದು ಏನು? ಅಮಿತವಾದದ್ದು ದೊರೆಯುವುದಿಲ್ಲ ಮತ್ತು ಇರುವಷ್ಟು ಸುಖವೂ ಕಳೆದುಹೋಗುತ್ತದೆ. ವಿಪರೀತದಆಸೆ ಎಂದಿಗೂಸಫಲವಾಗದು.