ಗುರು ಪೂರ್ಣಿಮೆ: ಧಮ್ಮಚಕ್ಕಪವತ್ತನಸುತ್ತ

‘ಭಗವಾನ್ ಬುದ್ಧರು 2609 ವರ್ಷಗಳ ಹಿಂದೆ ಸಾರನಾಥದಲ್ಲಿ, ಜಿಂಕೆವನದಲ್ಲಿ ಧಮ್ಮಚಕ್ಕಪವತ್ತನ ಸುತ್ತವನ್ನು ಉಪದೇಶಿಸಿದರು. ಈ ಧಮ್ಮೋಪದೇಶ ಮಾಡಿದ್ದರಿಂದಲೇ ಈ ಆಷಾಢ ಪೂರ್ಣಿಮೆಯನ್ನು ಗುರುಪೂರ್ಣಿಮೆ ಮತ್ತು ಧಮ್ಮದಿವಸವೆಂದು ಆಚರಿಸುತ್ತೇವೆ. ಇದು ಚಾತುರ್ಮಾಸ್ಯದ ಮೊಟ್ಟಮೊದಲನೆಯ ದಿನವಾಗಿದ್ದು, ಮೂರು ತಿಂಗಳು ‘ವರ್ಷವಾಸ’ ಅಂದರೆ ಭಿಕ್ಖುಗಳು ಒಂದೇ ಸ್ಥಳದಲ್ಲಿ ಇದ್ದು ಧ್ಯಾನ ಸಾಧನೆಯಲ್ಲಿ ತೊಡಗಿಕೊಳ್ಳುತ್ತಾರೆ. ಹಾಗೆಯೇ ಗೃಹಸ್ಥರು ಕೂಡ ಈ ವರ್ಷವಾಸದ ಸಮಯದಲ್ಲಿ ಬಹಳಷ್ಟು ಸಮಯವನ್ನು ಧ್ಯಾನಭ್ಯಾಸ, ವಿಹಾರಗಳಿಗೆ ಹೋಗಿ ಸಂಘದಾನ ಮಾಡುವುದು, ಧಮ್ಮೋಪದೇಶವನ್ನು ಕೇಳುವುದು ಮುಂತಾದ ಧಮ್ಮಕಾರ್ಯದಲ್ಲಿ ತೊಡಗಿಸಿಕೊಳ್ಳುತ್ತಾರೆ. ಜೀವನದಲ್ಲಿ ನಾವು ಕೇವಲ ಹಣವನ್ನು ಗಳಿಸಿ ಅಥವಾ ಕುಟುಂಬವನ್ನು ನಡೆಸಿ ಅದರಲ್ಲಿಯೇ ಅಂತ್ಯವಾಗಬಾರದು. ಈ ಎಲ್ಲ ಚಟುವಟಿಕೆಗಳ ನಡುವೆ ನಮ್ಮ ಮನಸ್ಸನ್ನು ಬೆಳೆಸುವುದಕ್ಕೆ ಸಹಾಯಕಾರಿ ಆಗಬೇಕು, ಮನಸ್ಸನ್ನು ಬೆಳೆಸುತ್ತಾ ಬೋಧಿಯೆಡೆಗೆ ಸಾಗಬೇಕು – ಇದು ನಮ್ಮ ಜೀವನದ ಮುಖ್ಯ ಗುರಿಯಾಗಿರಬೇಕು.