ದತ್ತಾತ್ರೇಯ: ದಾರಿ–ಗುರಿ

ಈ ಕೃತಿಯ ರಚನೆಗೆ ಕಾರಣವೇನೆಂದು ಲೇಖಕರು ಹೀಗೆ ತಿಳಿಸಿದ್ದಾರೆ:

‘ವೇದಮತದಲ್ಲಿ ಅಲ್ಲಲ್ಲಿ ಕಾಣುವ ಸಕಲ ಭೇದಗಳನ್ನೂ ಸಮನ್ವಯಕ್ಕೆ ತರುವ ಸಮದರ್ಶನದ ಸಾಕಾರರೂಪವೇ ದತ್ತಾತ್ರೇಯ. ಮತ್ತು ಆತನ ಈ ಉಪದೇಶವನ್ನು ಜೀನನ್ಮುಕ್ತಗೀತೆಯೂ ಅವಧೂತಗೀತೆಯೂ ಒಳಗೊಂಡಿದೆ. ಈ ಉಭಯಗೀತೆಗಳನ್ನು ಮೂಲದೊಡನೆ ಕೊಡುವುದೂ ಅವುಗಳ ತಾತ್ಪರ್ಯವನ್ನೂ ಆಶಯವನ್ನೂ ಯಥಾಶ್ರುತವಾಗಿ ನೀಡಿ ವೇದಮತದ ಬೆಳಕಿನಲ್ಲಿ ವ್ಯಾಖ್ಯಾನಮಾಡುವುದೂ ನನ್ನ ಉದ್ದೇಶವಾಗಿದೆ. ಈಗ ಜನರು ಅಧಿಕಾರಕ್ಕೂ ಸುಖಲಾಭ–ಲೋಭಗಳಿಗೂ ಒಳಗಾಗಿ ಜೀವನದ ಪರಮಾರ್ಥ ಪರಮಮೌಲ್ಯಗಳ ಬಗ್ಗೆ ತೀರ ಅಜ್ಞಾನದಲ್ಲಿರುವುದರಿಂದ ಅವರ ಗಮನಕ್ಕೆ ಈ ಕೃತಿಯನ್ನು ತಂದದ್ದಾದರೆ – ಅವರು ತಮ್ಮ ಅಭ್ಯುದಯ ಪ್ರಯತ್ನದ ಜೊತೆಗೆ ನಿಃಶ್ರೇಯಸಿದ್ಧಿಯ ಕಡೆಗೂ ತಿರುಗುವುದಕ್ಕೆ ಸಹಾಯವಾಗುವುದೆಂದು ನಾನು ಎದೆಯಾರ ನಂಬಿದ್ದೇನೆ.’