ಲೋಕಸಭಾ ಚುನಾವಣೆ | ಅಭ್ಯರ್ಥಿಗಳ, ನಾಯಕರ ಹೃದಯ ಬಡಿತ ಜೋರು

ಮತಯಂತ್ರಗಳನ್ನು ಸೇರಿದ್ದ 13 ಲಕ್ಷ ಮತದಾರರ ತೀರ್ಮಾನ ಮಂಗಳವಾರ ಮಧ್ಯಾಹ್ನದ ವೇಳೆಗೆ ಬಹಿರಂಗವಾಗಲಿದೆ. ಅಲ್ಲಿಯವರೆಗೆ ಲೆಕ್ಕಾಚಾರಗಳು ಮುಂದುವriಯುತ್ತಲೇ ಇರುತ್ತವೆ.

ಮತದಾನದ ನಂತರ ಅಭ್ಯರ್ಥಿಗಳು ಗೆಲುವಿನ ಒಂದು ಲೆಕ್ಕ ಹಾಕಿಕೊಂಡು ತಾವೇ ಗೆಲ್ಲುವುದಾಗಿ ಸಮಾಧಾನ ಪಟ್ಟುಕೊಂಡಿದ್ದರು. 7ನೇ ಹಂತದ ಮತದಾನ ಮುಕ್ತಾಯದ ನಂತರ ವಿವಿಧ ಸಂಸ್ಥೆಗಳು ನಡೆಸಿರುವ ಮತಗಟ್ಟೆಗಳ ಸಮೀಕ್ಷೆಗಳು ಹೃದಯ ಬಡಿತವನ್ನು ತೀವ್ರಗೊಳಿಸಿವೆ.

ರಾಜ್ಯದಲ್ಲಿ ಬಿಜೆಪಿ ಹೆಚ್ಚಿನ ಸ್ಥಾನಗಳಲ್ಲಿ ಗೆಲ್ಲಲಿದೆ ಎಂದು ಬಹಳಷ್ಟು ಸಂಸ್ಥೆಗಳು ಹೇಳಿರುವುದರಿಂದ ಬಿಜೆಪಿ ಅಭ್ಯರ್ಥಿ ಹಾಗೂ ನಾಯಕರು ಸ್ವಲ್ಪ ಸಮಾಧಾನ ತಂದಿದ್ದು, ನಿಟ್ಟುಸಿರು ಬಿಟ್ಟಿದ್ದಾರೆ. ಅದರಲ್ಲೂ ಕೆಲವು ಸಂಸ್ಥೆಗಳು ಬಾಗಲಕೋಟೆಯಲ್ಲಿ ಬಿಜೆಪಿ ಗೆಲ್ಲಲಿದೆ ಎಂದು ಹೇಳಿರುವುದರಿಂದ ಹಲವು ನಾಯಕರು ಸಾಮಾಜಿಕ ಜಾಣದಲ್ಲಿ ‘ಫಲಿತಾಂಶ ಬಂದಾಗಿದೆ, ಮತ ಎಣಿಕೆಯಷ್ಟೇ ಬಾಕಿ ಉಳಿದಿದೆ’ ಎಂದು ಸಂಭ್ರಮ ಪಡುತ್ತಿದ್ದಾರೆ.

ಪ್ರಧಾನಿ ನರೇಂದ್ರ ಮೋದಿ ಪ್ರಧಾನಿಯಾಗಬೇಕು ಎನ್ನುವ ಅಂಶ, ಮೋದಿಯ ಹವಾ ಮತ್ತೆ ಕೈಹಿಡಿಯಲಿದೆ ಎನ್ನುವುದು ಬಿಜೆಪಿ ನಾಯಕರ ಆತ್ಮವಿಶ್ವಾಸಕ್ಕೆ ಪ್ರಬಲ ಕಾರಣವಾಗಿದೆ. ವಿಧಾನಸಭೆಯಲ್ಲಿ ಸೋತಿದ್ದರೂ ಸಹ ಪ್ರಧಾನಿಗೆ ಮೋದಿ ಜನರ ಆಯ್ಕೆಯಾಗಿದೆ. ಆದ್ದರಿಂದ ಗೆಲುವು ಸಿಗಲಿದೆ. ಐದನೇ ಬಾರಿಗೆ ಪಿ.ಸಿ. ಗದ್ದಿಗೌಡರ ಗೆದ್ದು ಹೊಸ ದಾಖಲೆ ಬರೆಯಲಿದ್ದಾರೆ ಎಂಬುದು ಅವರ ವಿಶ್ವಾಸವಾಗಿದೆ.

ಮತಗಟ್ಟೆ ಸಮೀಕ್ಷೆಗಳನ್ನು ‘ಗ್ಯಾರಂಟಿ’ ಪ್ರಭಾವ ಸುಳ್ಳಾಗಿಸಲಿದೆ. ಮಹಿಳಾ ಮತದಾರರು ಹಿಂದೆಂದಿಗಿಂತ ಹೆಚ್ಚಿನ ಒಲವನ್ನು ಕಾಂಗ್ರೆಸ್‌ನಡೆಗೆ ತೋರಿಸಿದ್ದಾರೆ ಎಂಬುದು  ಎಂಬುದು ಕಾಂಗ್ರೆಸ್‌ ನಾಯಕರ ಲೆಕ್ಕಾಚಾರ. ಸತತ ನಾಲ್ಕು ಸೋಲುಗಳ ಸುಳಿಯಿಂದ ಈ ಬಾರಿ ಹೊರಬರಲಿದ್ದೇವೆ ಎಂಬುದು ಅವರ ಅನಿಸಿಕೆ.

ಲೋಕಸಭಾ ಕ್ಷೇತ್ರದಲ್ಲಿ ಕಾಂಗ್ರೆಸ್‌ನ ಐವರು ಶಾಸಕರಿದ್ದರು. ಆರಂಭದಲ್ಲಿ ಅಪಸ್ವರಗಳಿದ್ದರೂ, ಕೊನೆಯಲ್ಲಿ ಒಗ್ಗಟ್ಟಿನಿಂದ ಕೆಲಸ ಮಾಡಿದ್ದೇವೆ. ಸಚಿವ ಶಿವಾನಂದ ಪಾಟೀಲ, ತಮ್ಮ ಪುತ್ರಿ ಸಂಯುಕ್ತಾ ಪಾಟೀಲ ಗೆಲುವಿಗೆ ತಮ್ಮ ರಾಜಕೀಯ ಅನುಭವ ಧಾರೆ ಎರೆದಿದ್ದಾರೆ. ಇದು ಗೆಲುವಿನ ದಡ ಸೇರಿಸಲಿದೆ ಎಂಬ ಮಾತುಗಳು ಕೇಳಿ ಬರುತ್ತಿವೆ.

ಕ್ಷೇತ್ರಯ ವ್ಯಾಪ್ತಿಯ ಮತಗಟ್ಟೆ, ವಿಧಾನಸಭಾವಾರು ಲೆಕ್ಕಚಾರ ಹಾಕಿ ಗೆಲುವು ತಮ್ಮದೇ ಎನ್ನುವುದು ಎರಡೂ ಪಕ್ಷಗಳ ನಾಯಕರ ಅಭಿಪ್ರಾಯವಾಗಿದೆ. ಅದಕ್ಕೆ ಇನ್ನೂ 24 ಗಂಟೆಗಳಷ್ಟೇ ಕಾಯಬೇಕಿದೆ.

ಗೆಲುವಿನ ಚರ್ಚೆ ಮತ್ತೆ ತೀವ್ರ ಮತಗಟ್ಟೆ ಸಮೀಕ್ಷೆ ಬಗ್ಗೆ ವಿಭಿನ್ನ ವ್ಯಾಖ್ಯಾನ ಮತ ಎಣಿಕೆಗೆ ದಿನವಷ್ಟೇ ಬಾಕಿ