ಜೋಳದ ಫಸಲಿನ ಚಿಗುರು ತಿಂದು 12 ಕುರಿಗಳು ಸಾವು

ತಿಮ್ಮಲಾಪುರ ಗ್ರಾಮದ ಕುರಿಗಾಯಿಗಳಾದ ಪ್ರಕಾಶ, ನಿಂಗಪ್ಪ, ಮಲ್ಲಿ ಅವರಿಗೆ ಸೇರಿದ್ದ ತಲಾ ನಾಲ್ಕರಂತೆ ಒಟ್ಟು 12 ಕುರಿಗಳು ಮೃತಪಟ್ಟಿವೆ.

‘ಈ ಬಾರಿ ಮಳೆಯ ಕೊರತೆಯಿಂದ ಜಾನುವಾರುಗಳಿಗೆ ಮೇವಿನ ಕೊರತೆಯಿದ್ದು, ಮೇಯಿಸಲು ಗ್ರಾಮದ ಹೊರವಲಯದ ಕಾಲುವೆಯ ಬಳಿಯ ಗುಡ್ಡಕ್ಕೆ ತೆರಳಲಾಗಿತ್ತು. ಗುಡ್ಡದ ಪಕ್ಕದಲ್ಲಿನ ಜಮೀನಿನಲ್ಲಿನ  ಹಸರಿನ ಮೇವು ಕಂಡ ತಕ್ಷಣ ಕುರಿಗಳು ಓಡಿಹೋಗಿ ಜೋಳದ ಫಸಲಿನ ಚಿಗುರು ತಿಂದು ಹೊಟ್ಟೆ  ಉಬ್ಬರದಿಂದ ಮೃತಪಟ್ಟಿವೆ. ಸರ್ಕಾರ ಸೂಕ್ತ ಪರಿಹಾರ ನೀಡಿದರೆ ಅನುಕೂಲವಾಗುತ್ತದೆ’ ಎಂದು ಕುರಿಗಾಯಿ ಪ್ರಕಾಶ್ ಹೇಳಿದರು.

‘ಕುರಿಗಳು ಮೃತಪಟ್ಟ ಸ್ಥಳಕ್ಕೆ ನಮ್ಮ ಇಲಾಖೆಯ ಸಿಬ್ಬಂದಿ ತೆರಳಿ, ಮೃತಪಟ್ಟ ಎಲ್ಲ ಕುರಿಗಳ  ಪರೀಕ್ಷೆ ನಡೆಸಿದ್ದಾರೆ. ಕುರಿಗಾಯಿಗಳಿಂದ ಸರ್ಕಾರದ ಪರಿಹಾರಕ್ಕಾಗಿ ಅಗತ್ಯ ದಾಖಲೆಗಳನ್ನು ಪಡೆದು ಒಂದು ಕುರಿಗೆ ₹5000 ಪರಿಹಾರ ನೀಡಲು ಸೂಕ್ತ ಕ್ರಮವಹಿಸಲಾಗುವುದು’ ಎಂದು ಸಿದ್ಧಮ್ಮನಹಳ್ಳಿ ಗ್ರಾಮದ ಪಶುಚಿಕಿತ್ಸಾ ಕೇಂದ್ರದ ವೈದ್ಯಾಧಿಕಾರಿ ಡಾ.ಪ್ರದೀಪ್ ಪ್ರತಿಕ್ರಿಯಿಸಿದರು.