ಜೋಳದ ಕಣಜವಾದ ಭತ್ತದ ನಾಡು 'ಸಿರುಗುಪ್ಪ'

ತಾಲ್ಲೂಕಿನ ಕೆಲ ಹೋಬಳಿಗಳಲ್ಲಿ ಜೋಳದ ಸುಗ್ಗಿ ಆರಂಭವಾಗಿದೆ. ಮಳೆ ಕೊರತೆಯಿಂದಾಗಿ ಮೊದಲು ನಾಟಿ ಮಾಡಿದ್ದ ಭತ್ತ, ಮೆಣಸಿನ ಕಾಯಿ ಬೆಳೆ ನಾಶ ಮಾಡಿ ನಂತರ ಜೋಳ ಬಿತ್ತಿದ್ದ ರೈತರಿಗೆ ಬರದ ಮಧ್ಯೆಯೂ ಮುತ್ತಿನಂಥ ಬಿಳಿ ಜೋಳದ ಬೆಳೆ ಕೈಗೆ ಬಂದಿರುವುದು ರೈತರಿಗೆ ಸಂತಸ ತಂದಿದೆ.

ತಾಲ್ಲೂಕಿನ ಬಹುತೇಕ ನೀರಾವರಿ ಪ್ರದೇಶದ ಕರೂರು, ಬಲಕುಂದಿ, ಮೈಲಾಪುರ, ತಾಳೂರು, ಊಳೂರು, ಉತ್ತನೂರು, ಶಾಲಿಗನೂರು, ಬಗ್ಗೂರು, ಕರ್ಚಿಗನೂರು, ಮುದೇನೂರು, ಕೆ. ಬೆಳಗಲ್ಲು, ತೆಕ್ಕಲಕೋಟೆ ಸೇರಿದಂತೆ ವೇದಾವತಿ ನದಿ (ಹಗರಿ) ಪಾತ್ರ ಹಾಗೂ ಒಣ ಬೇಸಾಯದ ನೆಲದಲ್ಲಿ ಬಿತ್ತಿದ್ದ ಜೋಳ ಉತ್ತಮ ಫಸಲಾಗಿದೆ.

ಈ ನಡುವೆ ತೆನೆಗಟ್ಟಿ ಇರುವ ಎರೆ ನೆಲದಲ್ಲಿ ಹಿಂಡು-ಹಿಂಡು ಗಿಣಿ ಮತ್ತಿತರ ಹಕ್ಕಿಗಳ ಕಾಟ ಹೆಚ್ಚಾಗಿದೆ. ನಸುಕಿಗೆ ಎದ್ದು ಹೊಲಕ್ಕೆ ಹೋಗಿ ರೈತರು ಹಕ್ಕಿಗಳನ್ನು ಓಡಿಸಿ ತೆನೆ ರಕ್ಷಿಸಿಕೊಳ್ಳುತ್ತಿದ್ದಾರೆ.

ಬರದಿಂದ ಮೇವಿಲ್ಲದೆ ದನಗಳಿಗೆ ಹೇಗೋ? ಎಂದು ಕಂಗೆಟ್ಟಿದ್ದ ರೈತರಿಗೆ ಜೋಳದ ದಂಟು ವರದಾನವಾಗಿದೆ. ದನಕರು ಇಲ್ಲದ ರೈತರು ಸಪ್ಪೆ ಮಾರಾಟ ಮಾಡಲು ಮುಂದಾಗಿದ್ದಾರೆ. ಒಟ್ಟಾರೆ ಬರದಲ್ಲೂ ಬಂದ ಜೋಳ ಸುಗ್ಗಿ ಸಂತಸ ತಂದಿದೆ.

ಮಳೆಯಾಶ್ರಿತ ಭೂಮಿಯಲ್ಲಿ ಜೋಳ ಬೆಳೆದಿರುವ ತೆಕ್ಕಲಕೋಟೆ ರೈತ ನರಸಿಂಹ 'ಮೊದಲು ಮೆಣಸಿನ ಕಾಯಿ ಹಾಕಿದ್ದೆ ಸಾರ್, ಮಳೆ ಕೈಕೊಡ್ತು ಬೆಳೆ ಕೆಡಿಸಿ ಮತ್ತೆ ಜೋಳ ಬಿತ್ತಿದೆ. ಈಗ ಜೋಳ ಕೈ ಹಿಡಿಯಬಹುದು' ಎಂದು ಹೇಳಿದರು.