ಕಥೆಗಾರ ರಾಜಶೇಖರ ನೀರಮಾನ್ವಿ ನಿಧನ

ರಾಯಚೂರು ಜಿಲ್ಲೆಯ ನೀರಮಾನ್ವಿ ಗ್ರಾಮದ ರಾಜಶೇಖರ ಅವರು ಬಳ್ಳಾರಿಯ ವೀರಶೈವ ಪದವಿ ಕಾಲೇಜಿನಲ್ಲಿ ಭೂಗರ್ಭಶಾಸ್ತ್ರದ ಪ್ರಾಧ್ಯಾಪಕರಾಗಿ, ನಿವೃತ್ತರಾಗಿದ್ದರು. ಗೋಕಾಕ್ ಚಳವಳಿ, ಜೆಪಿ ಚಳವಳಿ ಮತ್ತು ವಾಟಾಳ್ ಚಳವಳಿಗಳಲ್ಲಿ ಭಾಗವಹಿಸಿದ್ದರು.

1978ರಲ್ಲಿ ಪ್ರಕಟವಾದ ನೀರಮಾನ್ವಿ ಅವರ ‘ಹಂಗಿನ ಅರಮನೆಯ ಹೊರಗೆ’ ಮೊದಲ ಕಥಾ ಸಂಕಲನಕ್ಕೆ ಅದೇ ವರ್ಷ  ಕರ್ನಾಟಕ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಸಿಕ್ಕಿತ್ತು. 1990ರಲ್ಲಿ ಅವರ ‘ಕರ್ಪೂರದ ಕಾಯದಲ್ಲಿ’ ಎರಡನೇ ಕಥಾ ಸಂಕಲನವನ್ನು ಬಳ್ಳಾರಿಯ ಲೋಹಿಯಾ ಪ್ರಕಾಶನ ಪ್ರಕಟಿಸಿತು. ಪ್ರಕಾಶನ ಅಸ್ತಿತ್ವಕ್ಕೆ ಬರಲೂ ಕಾರಣವಾಯಿತು. ನೀರಮಾನ್ವಿ ಅವರಿಗೆ ಸಾಹಿತ್ಯ ಅಕಾಡೆಮಿ, ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ, ಬೆಟಗೇರಿ ಕೃಷ್ಣ ಶರ್ಮ ಪ್ರಶಸ್ತಿ ಸಂದಿವೆ.

‘ನೀರಮಾನ್ವಿ ಅವರು ಬರೆದಿದ್ದು ಕಡಿಮೆ. ಎರಡು ಕಥಾ ಸಂಕಲನ ಮತ್ತು 12 ಕತೆಗಳನ್ನು ಮಾತ್ರ ಬರೆದರು. ಅವರ ಕಥೆಗಳು ದೇಶದ 8 ಭಾಷೆಗಳಿಗೆ ಅನುವಾದಗೊಂಡಿವೆ’ ಎಂದು ಲೋಹಿಯಾ ಪ್ರಕಾಶನದ ಮುಖ್ಯಸ್ಥ ಸಿ. ಚನ್ನಬಸಣ್ಣ ತಿಳಿಸಿದರು.