ವ್ಯಾಲಿ ವಾದ ಸರಣಿ | ಮೂರು ಹಂತ ಏಕೆ ಬೇಕು? ಎರಡು ಹಂತ ಸಾಕು..

ಕೆರೆಗಳಿಗೆ ನೀರು ತುಂಬಿಸುವ ಅವಳಿ ವ್ಯಾಲಿ ಯೋಜನೆಯ ಪರಿಕಲ್ಪನೆ ಚೆನ್ನಾಗಿದೆ. ಹೂಳು ತುಂಬಿರುವ ಕೆರೆಗಳಿಗೆ ಶುದ್ಧೀಕರಿಸಿದ ನೀರು ಹರಿಸಿದರೆ ಏನು ಪ್ರಯೋಜನ?

ಕೆರೆಯಲ್ಲಿರುವ ಕೊಳಕು, ಹೂಳು ತೆಗೆಯದೆ ಎರಡು ಮತ್ತು ಮೂರನೇ ಹಂತದ ಶುದ್ಧೀಕರಣ ಅನಗತ್ಯ. ಮೊದಲು ಕೆರೆ ಹೂಳು ತೆಗೆಸಿ  ನೀರಿನ ಸಂಗ್ರಹಣಾ ಸಾಮರ್ಥ್ಯ ಹೆಚ್ಚಿಸಬೇಕು. ನಂತರ ರಾಷ್ಟ್ರೀಯ ಹಸಿರು ನ್ಯಾಯಪೀಠದ (ಎನ್‌ಜಿಟಿ) ಮಾರ್ಗಸೂಚಿಯಂತೆ ಮಲೀನ ನೀರನ್ನು ಶುದ್ಧೀಕರಣ ಮಾಡಬೇಕು.

ಮೊದಲ ಹಂತದಲ್ಲಿಯೇ ಪರಿಪೂರ್ಣವಾಗಿ ಶುದ್ಧೀಕರಿಸಿದ ನೀರನ್ನು ನಾಲೆಗೆ ಹರಿಸಿದರೆ ಸಾಕು. ನಾಲೆಯಲ್ಲಿ ಹರಿಯುವ ಈ ನೀರಿಗೆ ಕೈಗಾರಿಕಾ ತ್ಯಾಜ್ಯ, ಕೊಳಚೆ ನೀರು ಸೇರುವುದರಿಂದ ಕೆರೆ ಸೇರುವ ಮೊದಲು ಎರಡನೇ ಹಂತದ ಶುದ್ಧೀಕರಣ ಕಡ್ಡಾಯ. ನಂತರ ಕೆರೆಗಳಿಗೆ ನೀರು ಹರಿಸಿದರೆ ಕೆರೆ ಪರಿಸರ, ಆರೋಗ್ಯ ಉತ್ತಮವಾಗಿರುತ್ತದೆ. ಈ ಯೋಜನೆಯೂ ಫಲಕಾರಿಯಾಗುತ್ತದೆ.

ಕೊಳಚೆ ನೀರು ತುಂಬಾಅಪಾಯಕಾರಿ. ಅಂಥ ನೀರನ್ನು ದೊಡ್ಡ ಮಟ್ಟದಲ್ಲಿ ಶುದ್ಧೀಕರಣ ಮಾಡುತ್ತಾರೆ ಎಂದರೆ ಅದು ಎಷ್ಟು  ಪರಿಣಾಮಕಾರಿಯಾಗಿರುತ್ತದೆ ಎಂಬುವುದೇ ಈಗ ಎಲ್ಲರ ಮುಂದಿರುವ ಪ್ರಶ್ನೆ ಮತ್ತು ಸಂಶಯ!

ಅನೇಕ ಕಂಪನಿಗಳು, ವಿಲ್ಲಾ, ಅಪಾರ್ಟ್‌ಮೆಂಟ್‌ಗಳು ಕೇವಲ ತೋರ್ಪಡಿಕೆಗೆ ಮಾತ್ರ ಎಸ್‌ಟಿಪಿ ಪ್ಲಾಂಟ್‌ ಹಾಕಿರುತ್ತಾರೆ. ಗುಣಮಟ್ಟ ಇರುವುದಿಲ್ಲ. ಹಾಗಾಗಿ ಈ ರೀತಿ ಹರಿಯುವ ನೀರನ್ನು ಶುದ್ಧೀಕರಿಸಿ ಬಳಸುವುದು ಅಪಾಯಕಾರಿ.

ಒಮ್ಮೆ ಪರಿಣಾಮಕಾರಿಯಾಗಿ ನೀರು ಶುದ್ಧೀಕರಣ ಮಾಡದೆ ಬಿಟ್ಟರೆ ಅದು ಎಲ್ಲರ ಮೇಲೂ ತುಂಬಾ ಪರಿಣಾಮ ಬೀರುತ್ತದೆ. ಶುದ್ಧೀಕರಿಸಿದ ನೀರು ನಾಲೆಗಳಲ್ಲಿ ಹರಿಯುವಾಗ ಮೋರಿ ನೀರು, ಕೈಗಾರಿಕಾ ತ್ಯಾಜ್ಯ, ಪ್ಲಾಸ್ಟಿಕ್‌, ಕೊಳಕು ಸೇರಿ ಕೊನೆಗೆ ಮಲೀನ ನೀರು ಕೆರೆ ಒಡಲು ಸೇರುತ್ತದೆ. ಇದರಿಂದ ಕೆರೆಗಳ ಪರಿಸರ ಮತ್ತು ಆರೋಗ್ಯ ನಾಶವಾಗುತ್ತದೆ.

ಒಂದು ಕೆರೆಗೆ ನೀರು ಹರಿಸಿದರೆ ಅದು ತುಂಬಿದ ನಂತರ ಮತ್ತೊಂದು ಕೆರೆಯನ್ನು ಸೇರುತ್ತದೆ. ತ್ಯಾಜ್ಯ, ಪ್ಲಾಸ್ಟಿಕ್‌ ತುಂಬಿದ ನೀರನ್ನು ಹೂಳು ತುಂಬಿರುವ ಕೆರೆಗೆ ಹರಿಸಿದರೆ ಏನು ಲಾಭ? ಎಷ್ಟು ಬಾರಿ ನೀರು ಶುದ್ಧೀಕರಿಸಿದರೆ ಏನು ಪ್ರಯೋಜನ?

ಕೆರೆಯಲ್ಲಿ ನೀರು ನಿಲ್ಲಲು, ಗಾಳಿಯಾಡಲು ಅವಕಾಶ ಮಾಡದೆ ಕೆರೆಗೆ ನೀರು ತುಂಬಿಸಿದರೆ ವ್ಯರ್ಥ. ಹೂಳು ತೆಗೆಯದೆ, ಕೆರೆ ನೀರು ಸಂಗ್ರಹಣಾ ಸಾಮರ್ಥ್ಯ ಹೆಚ್ಚಳ ಮಾಡದೆ ನೀರು ಹರಿಸಿದರೆ ಏನು ಪ್ರಯೋಜನವಾಗುತ್ತೆ? ಕೇವಲ ಒಂದು ಕಡೆಯಿಂದ ಮತ್ತೊಂದು ಕಡೆಗೆ ನೀರು ಹರಿಯುತ್ತದೆ ಅಷ್ಟೇ. ಜತೆಗೆ ಕೆರೆ ನೀರಿಗೆ ಕೈಗಾರಿಕಾ ತ್ಯಾಜ್ಯ, ಪ್ಲಾಸ್ಟಿಕ್‌, ಅಪಾಯಕಾರಿ ರಾಸಾಯನಿಕ ಧಾತುಗಳು ಸೇರಿ ಕೆರೆ ಪರಿಸರ ನಾಶವಾಗುತ್ತದೆಯೋ ಹೊರತು ಏನು ಪ್ರಯೋಜನವಿಲ್ಲ.

ಏಕೆಂದರೆಮಳೆ ನೀರು ಬೇರೆ, ಶುದ್ಧೀಕರಿಸಿದ ಕೊಳಚೆ ನೀರು ಬೇರೆ. ಮಳೆ ನೀರು ಶುದ್ಧವಾದ ನೀರು. ಅದರಲ್ಲಿ ಯಾವುದೇ ಅಪಾಯಕಾರಿ ರಾಸಾಯನಿಕ ಅಂಶಗಳು ಇರುವುದಿಲ್ಲ. ಎರಡು ತಿಂಗಳು ಬಿಸಿಲು ಕಾದು ಮಣ್ಣು ಕೆಳಗಡೆ ಕೂತು,ನೀರು ತಿಳಿಯಾಗಿ ಉತ್ತಮ ಪರಿಸರ ನಿರ್ಮಾಣವಾಗುತ್ತದೆ. ನೀರಿನಲ್ಲಿದ್ದ ಹುಳು, ಹುಪ್ಪಟೆಗಳನ್ನು ಮೀನು, ಪಕ್ಷಿಗಳು ತಿಂದು ನೈಸರ್ಗಿಕವಾಗಿ ಸ್ವಚ್ಛ ಮಾಡುತ್ತವೆ.

ಆದರೆ, ಕೊಳಚೆ ನೀರು ಹಾಗಲ್ಲ. ಶುದ್ಧೀಕರಣಕ್ಕೆ ಫ್ಲೋರಿನ್‌, ಕ್ಲೋರಿನ್‌ ಮುಂತಾದ ರಾಸಾಯನಿಕ ಬಳಸುತ್ತಾರೆ. ಕ್ಲೋರಿನ್‌  ವಿಷಕ್ಕೆ ಸಮ. ಇದು ಕೇವಲ ನೀರಿನಲ್ಲಿರುವ ಕೆಟ್ಟ ಬ್ಯಾಕ್ಟೀರಿಯಾ, ವೈರಾಣುಗಳನ್ನು ಮಾತ್ರವಲ್ಲ, ಒಳ್ಳೆಯ ಬ್ಯಾಕ್ಟೀರಿಯಾಗಳನ್ನೂ ಕೊಲ್ಲುತ್ತದೆ. 

ಮಣ್ಣಿನ ಒಂದು ಚದರ ಇಂಚಿನಲ್ಲಿ 3.60 ಲಕ್ಷ ಸೂಕ್ಷ್ಮಾಣು ಜೀವಿಗಳು ಇರುತ್ತವೆ. ಕೊಳಚೆ ನೀರು ಹರಿಯುವ ಕಡೆ ಮಣ್ಣಿನಲ್ಲಿರುವ ಈ ಸೂಕ್ಷ್ಮಾಣು ಜೀವಿಗಳು ಸಾವನ್ನಪ್ಪುತ್ತವೆ. ಇದರಿಂದ ಅಂತರ್ಜಲವೂ ಕುಸಿಯುತ್ತದೆ ಹಾಗೂ ಬೆಳೆಯೂ ನಾಶವಾಗುತ್ತದೆ.

ಮಲೀನವಾದ ನೀರನ್ನು ಶುದ್ಧೀಕರಿಸಿದ ನಂತರವೂ ಆ ನೀರಿನಲ್ಲಿ ನೈಟ್ರೊ ಆಕ್ಸೈಡ್‌ ಅಂಶ ಇದ್ದೇ ಇರುತ್ತದೆ. ಮಣ್ಣಿನಲ್ಲಿ ಎಷ್ಟು ಪ್ರಮಾಣದಲ್ಲಿ ಆಕ್ಸೈಡ್‌ಗಳು ಇರಬೇಕೋ ಅಷ್ಟು ಪ್ರಮಾಣದಲ್ಲಿದ್ದರೆ ಉತ್ತಮ. ನೀರಿನಲ್ಲಿ ನೈಟ್ರೋಜನ್, ಪೊಟ್ಯಾಷಿಯಂ, ಫಾಸ್ಪರಸ್‌, ಸಲ್ಫರ್‌ನಂತಹ ರಾಸಾಯನಿಕ, ಭಾರಲೋಹದ ಅಂಶಗಳು ಹೆಚ್ಚಾಗಿರುತ್ತವೆ. ಇವು ಮಣ್ಣಿನ ಫಲವತ್ತತೆ ನಾಶ ಮಾಡುತ್ತವೆ. ಅಲ್ಲದೆ ಸೂಕ್ಷ್ಮಾಣು ಜೀವಿಗಳನ್ನು ಕೊಲ್ಲುತ್ತದೆ. ಅಂತರ್ಜಲ ಮಟ್ಟ ಕುಸಿಯಲು ಕಾರಣವಾಗುತ್ತದೆ. ಈ ನೀರು ಬಳಸಿ ಬೆಳೆಯುವ ಬೆಳೆ, ತರಕಾರಿ, ಸೊಪ್ಪು, ಹಣ್ಣುಗಳ ಗುಣಮಟ್ಟದ ಮೇಲೆ ದುಷ್ಪರಿಣಾಮವಾಗುತ್ತದೆ. 

ಈ ಹಿಂದೆ ಮಳೆ ನೀರಿನಿಂದ ಕೆರೆಗಳು ತುಂಬಿ ಪ್ರಾಣಿ, ಪಕ್ಷಿ, ಮೀನುಗಳಿಗೆ ಶುದ್ಧ ನೀರು ಸಿಗುತ್ತಿದ್ದರಿಂದ ಪರಿಸರ ಉತ್ತಮವಾಗಿತ್ತು. ಆದರೆ ಆ ಕೆರೆಗೆ ಅಶುದ್ಧ ನೀರು ಹರಿಸಿದರೆ ಕೆರೆಯ ಪರಿಸರ, ಆರೋಗ್ಯವೂ ನಾಶವಾಗುತ್ತದೆ. ಜತೆಗೆ ಕೃಷಿ, ಪಶು, ಪಕ್ಷಿಗಳಿಗೂ ತೊಂದರೆಯಾಗುತ್ತದೆ.