ದೇವನಹಳ್ಳಿ: ಇಲ್ಲಿನ ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಅಕ್ರಮವಾಗಿ ಟ್ರೆಡ್‌ ಮಿಲ್‌ ಮೂಲಕ ಚಿನ್ನ ಕಳ್ಳ ಸಾಗಣೆ ಮಾಡುತ್ತಿದ್ದ ಪ್ರಕರಣ ಬೆಳಕಿಗೆ ಬಂದಿದ್ದು, ಆರೋಪಿಯಿಂದ ₹2.45 ಕೋಟಿ ಮೌಲ್ಯದ ಚಿನ್ನವನ್ನು ಕಸ್ಟಮ್ಸ್ ಅಧಿಕಾರಿಗಳು ವಶಕ್ಕೆ ಪಡೆದಿದ್ದಾರೆ.
ಕಸ್ಟಮ್ಸ್ ಗುಪ್ತಚರ ದಳದ ಖಚಿತ ಮಾಹಿತಿ ಮೇರೆಗೆ ದುಬೈನಿಂದ ಬೆಂಗಳೂರಿಗೆ ಕಳುಹಿಸಲಾಗಿದ್ದ 5 ಎಚ್‌ಪಿಯ ಟ್ರೆಡ್‌ ಮಿಲ್‌ನಲ್ಲಿ 4.72 ಕೆ.ಜಿ ತೂಕದ ಚಿನ್ನವನ್ನು ಕಳ್ಳ ಸಾಗಣೆ ಮಾಡಲಾಗುತ್ತಿತ್ತು.
ಟ್ರೆಡ್‌ ಮಿಲ್‌ನ ಕಬ್ಬಿಣದ ಸರಳುಗಳ ಒಳಗೆ ಚಿನ್ನ ಇರಿಸಿ ರಫ್ತು ಮಾಡಲಾಗಿದೆ.
ಟ್ರೆಡ್‌ ಮಿಲ್‌ ಅನ್ನು ಬೆಂಗಳೂರಿಗೆ ರಫ್ತು ಮಾಡಿದ್ದ ವ್ಯಕ್ತಿ ಹಾಗೂ ಅದನ್ನು ಇಲ್ಲಿ ಪಡೆಯಲು ಮುಂದಾಗಿದ್ದ ವ್ಯಕ್ತಿ ಕುರಿತು ಅನುಮಾನ ವ್ಯಕ್ತವಾದ ಹಿನ್ನೆಲೆಯಲ್ಲಿ ಏರ್‌ ಕಾರ್ಗೋ ಕಮಿಷನರೇಟ್‌ ವಿಭಾಗದಿಂದ ಕಾರ್ಯಾಚರಣೆ ನಡೆಸಿದಾಗ ಚಿನ್ನ ಕಳ್ಳ ಸಾಗಣೆ ಮಾಡುತ್ತಿರುವುದು ತಿಳಿದುಬಂದಿದೆ.
ಟ್ರೆಡ್‌ ಮಿಲ್‌ ಆಮದು ಮಾಡಿಕೊಳ್ಳುತ್ತಿದ್ದ ವ್ಯಕ್ತಿಯನ್ನು ಕಸ್ಟಮ್ಸ್ ಅಧಿಕಾರಿಗಳು ಬಂಧಿಸಿ ನ್ಯಾಯಾಂಗ ವಶಕ್ಕೆ ಒ‍ಪ್ಪಿಸಿದ್ದಾರೆ.
