ಗೌಂಡವಾಡದಲ್ಲಿ ಗುಂಪು ಸಂಘರ್ಷ: ಆಸ್ಪತ್ರೆಯಲ್ಲಿ ಪತಿ ಶವ, ಮನೆಯಲ್ಲಿ ಪತ್ನಿ ನರಳಾಟ

'ಸತೀಶ... ಮಲಾಪನ್ ಗಿವೂನ್ ಜಾವಾ (ಸತೀಶ ನನ್ನನ್ನೂ ಕರೆದುಕೊಂಡು ಹೋಗು)' ಎಂದು ಕೂಗುತ್ತ ಸ್ನೇಹಾ ಅವರು ರಸ್ತೆಯಲ್ಲಿ ಹೊರಳಾಡಿದರು. ಮನೆಯಿಂದ ಆಸ್ಪತ್ರೆಯ ಕಡೆಗೆ ಓಡಲು ಮುಂದಾದರು. ಆಗ ನೆರವಿಗೆ ಬಂದ ಕುಟುಂಬದ ಇತರ ಸದಸ್ಯರು ಅವರನ್ನು ಸಂಬಾಳಿಸಲು ಪರದಾಡಬೇಕಾಯಿತು.

ಸತೀಶ ಪಾಟೀಲ ಧರಿಸುತ್ತಿದ್ದ ಚಪ್ಪಲಿ, ಬೈಕ್ ಮುಟ್ಟಿದ ಸ್ನೇಹಾ ಕಣ್ಣೀರಾದರು. ಮನೆಯ ಮುಂದೆಯೇ ಸತೀಶ ಅವರನ್ನು ಮಾರಕಾಸ್ತ್ರಗಳಿಂದ ಹೊಡಿದಿದ್ದು, ರಕ್ತದ ಕಲೆಗಳನ್ನು ಕಂಡು ಪತ್ನಿ ಮಮ್ಮಲ ಮರುಗಿದರು.

ಓದಿ...ಬೆಳಗಾವಿ: ಬೂದಿಮುಚ್ಚಿದ ಕೆಂಡ ಗೌಂಡವಾಡ, ಬಂಧನ ಭೀತಿಯಿಂದ ಗ್ರಾಮ ತೊರೆದ ಪುರುಷರು

ವಿಮಾನದ ಮೂಲಕ ತಾಯಿ ಕರೆಸಲು ವ್ಯವಸ್ಥೆ
ಕೊಲೆಯಾದ ಸತೀಶ ಅವರ ತಾಯಿ ನಳಿನಿ ಅವರು ಕೆಲ ದಿನಗಳ ಹಿಂದೆ ವಿಶಾಖಪಟ್ಟಣಕ್ಕೆ ತೆರಳಿದ್ದಾರೆ. ಸಂಬಂಧಿಯೊಬ್ಬರ ಬಾಣಂತನಕ್ಕೆ ತೆರಳಿದ್ದ ಅವರನ್ನು ವಿಮಾನದ ಮೂಲಕ ಕರೆಸಲು ಸಂಬಂಧಿಕರು ಸಿದ್ಧತೆ ಮಾಡಿದ್ದಾರೆ.

ವಿಶಾಖಪಟ್ಟಣದಿಂದ ಭಾನುವಾರ ಬೆಳಿಗ್ಗೆ ಹೊರಟ ನಳಿನಿ ಅವರು ಹೈದರಾಬಾದ್ ವರೆಗೆ ರಸ್ತೆ ಮೂಲಕ ಬರಲಿದ್ದಾರೆ. ಅಲ್ಲಿಂದ ಮಧ್ಯಾಹ್ನ 3.45ಕ್ಕೆ ಬಿಡುವ ವಿಮಾನದ ಮೂಲಕ ಅವರನ್ನು ಬೆಳಗಾವಿಗೆ ಕರೆತರಲು ವ್ಯವಸ್ಥೆ ಮಾಡಲಾಗಿದೆ.

ಇವನ್ನೂ ಓದಿ..

ಗೌಂಡವಾಡ: ದೇವಸ್ಥಾನ ಜಮೀನು ವಿವಾದ, ಗ್ರಾಮದಲ್ಲಿ ಪರಿಸ್ಥಿತಿ ಉದ್ವಿಗ್ನ

ಬೆಳಗಾವಿ | ಗೌಂಡವಾಡ: 15 ಮಂದಿ ಬಂಧನ, ಗ್ರಾಮದಲ್ಲಿ 200 ಪೊಲೀಸರ ಬಂದೋಬಸ್ತ್