ಶೇ 60ರಷ್ಟು ಮಠಗಳಲ್ಲಿ ಮಹಿಳೆಯರಿಗೇ ಪಟ್ಟ ಸಿಗಲಿ: ಗಂಗಾಂಬಿಕಾ ತಾಯಿ

‘ಭ್ರಷ್ಟಾಚಾರ ಮುಕ್ತ ಸಮಾಜ ನಿರ್ಮಿಸಿ’

‘ಇಂದಿನ ಮಹಿಳೆಯರು ರಾಣಿ ಚನ್ನಮ್ಮ, ಬೆಳವಡಿ ಮಲ್ಲಮ್ಮ, ಕೆಳದಿಯ ಚನ್ನಮ್ಮ ಅವರಂತಹ ಶೂರರಂತೆ ನಾಯಕತ್ವ ಗುಣ ಬೆಳೆಸಿಕೊಳ್ಳಬೇಕು. 12ನೇ ಶತಮಾನದಲ್ಲಿ ಶರಣ– ಶರಣೆಯರು ತಿಳಿಸಿದಂತೆ ಭ್ರಷ್ಟಾಚಾರ ಮುಕ್ತ ಸಮಾಜ ನಿರ್ಮಾಣಕ್ಕೆ ಪ್ರಯತ್ನಿಸಬೇಕು’ ಎಂದು ಮಾಜಿ ಸಚಿವೆ ರಾಣಿ ಸತೀಶ ಅಭಿಪ್ರಾಯಪಟ್ಟರು.

ಮಹಿಳಾ ಸಮಾವೇಶದಲ್ಲಿ ‘ಲಿಂಗಾಯತ ಮಹಿಳೆಯರನ್ನು ಸಾಮಾಜಿಕವಾಗಿ, ಸಾಂಸ್ಕೃತಿಕವಾಗಿ ಮತ್ತು ಧಾರ್ಮಿಕವಾಗಿ ಸಂಘಟಿಸುವಲ್ಲಿ ಮಹಿಳಾ ರಾಜಕಾರಣಿಗಳ ಪಾತ್ರ’ ವಿಷಯ ಕುರಿತು ಉಪನ್ಯಾಸ ನೀಡಿದರು.

‘ಅಧಿಕಾರ, ಅಂತಸ್ತು ಸ್ಥಿರವಲ್ಲ. ನಾವು ಸಾಮಾಜಿಕ ಬದಲಾವಣೆಗಾಗಿ ಮಾಡಿದ ಕೆಲಸಗಳೇ ಶಾಶ್ವತ’ ಎಂದರು.

ಮಾಜಿ ಸಚಿವೆ ಲೀಲಾದೇವಿ ಆರ್.ಪ್ರಸಾದ, ‘ಮಹಿಳೆಯರು ಜಾತ್ರೆ, ಮದುವೆ, ಸಮಾರಂಭಗಳಿಗೆ ಹೋಗುವಂತೆ, ಸಾಮಾಜಿಕ ಕೆಲಸಗಳಲ್ಲೂ ತಮ್ಮನ್ನು ತೊಡಗಿಸಿಕೊಳ್ಳಬೇಕು. ಇದಕ್ಕೆ ಪುರುಷರು ಪ್ರೋತ್ಸಾಹ ನೀಡಬೇಕು’ ಎಂದರು.

ಕಲಬುರಗಿಯ ಮೀನಾಕ್ಷಿ ಬಾಳಿ, ‘ಲಿಂಗಾಯತ ಎಂಬುದು ಕಾಯಕ ತತ್ವದ ಮೇಲೆ ರೂ‍ಪುಗೊಂಡ ಜೀವನ ಪದ್ಧತಿ. ಇದು ದುಡಿದು ತಿನ್ನುವ ಸಂಸ್ಕೃತಿಯೇ ಹೊರತು, ಬೇಡಿ ತಿನ್ನುವುದಲ್ಲ’ ಎಂದರು.

ಬೀದರ್‌ನ ಲಿಂಗಾಯತ ಮಹಾಮಠದ ಅಕ್ಕ ಅನ್ನಪೂರ್ಣ ತಾಯಿ ಅಧ್ಯಕ್ಷತೆ ವಹಿಸಿದ್ದರು. ಚನ್ನಮ್ಮನ ಕಿತ್ತೂರಿನ ರಾಜಗುರು ಸಂಸ್ಥಾನ ಕಲ್ಮಠದ ಮಡಿವಾಳ ರಾಜಯೋಗೀಂದ್ರ ಸ್ವಾಮೀಜಿ ನೇತೃತ್ವ ವಹಿಸಿದ್ದರು‌. ಚೊಂಡಿಯ ಬಸವ ಮಂಟಪದ ವಚನಸಂಸ್ಕೃತಿ ತಾಯಿ, ವೈಷ್ಣವಿ ಕಿವುಡಸಣ್ಣವರ ಇದ್ದರು.