ಹೊಸಪೇಟೆ: ತಪ್ಪಿದ ರೈಲು ದುರಂತ

‘ಜ.18ರಂದು ನಗರದ ರೈಲು ನಿಲ್ದಾಣದ ಪ್ಲಾಟ್‌ಫಾರಂ ಸಂಖ್ಯೆ 4ರಲ್ಲಿ ಕಲ್ಲಿದ್ದಲು ಸಾಗಿಸುವ ಸರಕು ಸಾಗಣೆ ರೈಲು ನಿಂತಿತ್ತು. ಹೀಗಿದ್ದರೂ ಅದೇ ಮಾರ್ಗದ ಹಳಿ ಮೇಲೆ ಸಂಚರಿಸಲು ಇನ್ನೊಂದು ಸರಕು ಸಾಗಣೆ ರೈಲಿಗೆ ಸಿಗ್ನಲ್‌ ಕೊಡಲಾಗಿತ್ತು. ಆದರೆ, ಪ್ಲಾಟ್‌ಫಾರಂನಲ್ಲಿ ರೈಲು ನಿಂತಿದ್ದನ್ನು ಗಮನಿಸಿದ ಮತ್ತೊಂದು ರೈಲಿನ ಎಂಜಿನ್‌ ಚಾಲಕ ರೈಲಿಗೆ ಬ್ರೇಕ್‌ ಹಾಕಿ, ಸಂಭವಿಸಬಹುದಾಗಿದ್ದ ಅನಾಹುತವನ್ನು ಕೂದಲೆಳೆ ಅಂತರದಲ್ಲಿ ತಪ್ಪಿಸಿದ್ದಾರೆ’ ಎಂದು ಖಚಿತ ಮೂಲಗಳು ‘ಪ್ರಜಾವಾಣಿ’ಗೆ ತಿಳಿಸಿವೆ.

ಈ ಘಟನೆಗೆ ಸಂಬಂಧಿಸಿದಂತೆ ರೈಲ್ವೆ ಸುರಕ್ಷತಾ ಅಧಿಕಾರಿಗಳು ಮಂಗಳವಾರ ನಗರ ರೈಲು ನಿಲ್ದಾಣಕ್ಕೆ ಭೇಟಿ ನೀಡಿ ಅಧಿಕಾರಿಗಳಿಂದ ವಿವರಣೆ ಪಡೆದುಕೊಂಡಿದ್ದಾರೆ. ಸಭೆಯ ನಂತರ ಸುದ್ದಿಗಾರರೊಂದಿಗೆ ಮಾತನಾಡಲು ಅಧಿಕಾರಿಗಳು ನಿರಾಕರಿಸಿದ್ದಾರೆ.

ಈ ಕುರಿತು ರೈಲು ನಿಲ್ದಾಣದ ಅಧಿಕಾರಿ ಉಮರ್‌ ಬಾನಿ ಅವರನ್ನು ಸಂಪರ್ಕಿಸಿದಾಗ, ‘ಏನೂ ಆಗಿಲ್ಲ’ ಎಂದಷ್ಟೇ ಪ್ರತಿಕ್ರಿಯಿಸಿದ್ದಾರೆ.