ಯೋಧರ ಕುಟುಂಬಗಳಿಗೆ ಸ್ಥೈರ್ಯ ತುಂಬಿದ ‘ಮಹಿಳಾ ಬೈಕ್ ರ‍್ಯಾಲಿ’

ಬೆಂಗಳೂರು: ಮಹಿಳಾ ಬೈಕರ್‌ಗಳ ‘ಶಿ ಫಾರ್ ಸೊಸೈಟಿ’ ಸಂಸ್ಥೆಯು ಗಣರಾಜ್ಯೋತ್ಸವದ ಅಂಗವಾಗಿ ಗಡಿ ಕಾಯುವ ಯೋಧರ ಕುಟುಂಬಗಳಿಗೆ ಆತ್ಮಸ್ಥೈರ್ಯ ತುಂಬುವ ಉದ್ದೇಶದೊಂದಿಗೆ ಬೆಂಗಳೂರಿನಿಂದ ಕೋಲಾರದವರೆಗೆ ಬೈಕ್ ರ‍್ಯಾಲಿಯನ್ನು ಮಂಗಳವಾರ ಆಯೋಜಿಸಿತ್ತು.

‘ಹೊಸಕೋಟೆ ಟೋಲ್ ಬಳಿ ಇರುವ ಎಂ.ವಿ.ಜೆ.ಕಾಲೇಜು ಆವರಣದಿಂದ ಮಹಿಳಾ ಬೈಕ್‌ ರ‍್ಯಾಲಿ ಆರಂಭವಾಯಿತು. ರ‍್ಯಾಲಿಯಲ್ಲಿ ಒಟ್ಟು 75 ಮಹಿಳೆಯರು ಬೈಕ್‌ ಚಲಾಯಿಸಿದರು. ಕೆಲವು ಪುರುಷರೂ ರ‍್ಯಾಲಿಯಲ್ಲಿ ಭಾಗವಹಿಸಿದ್ದರು. ಬೈಕ್‌ಗಳ ಸಾಲು 1 ಕಿ.ಮೀ ಉದ್ದದವರೆಗೂ ಮುಂದುವರಿದಿತ್ತು. ಸೇನಾ ಸಮವಸ್ತ್ರವನ್ನು ಹೋಲುವ ಟಿ–ಶರ್ಟ್‌ಗಳನ್ನು ಧರಿಸಿದ್ದ ನಾರಿಯರು, 30 ಅಡಿ ಉದ್ದದ ರಾಷ್ಟ್ರಧ್ವಜ ಪ್ರದರ್ಶಿಸಿದರು’ ಎಂದು ಶಿ ಫಾರ್ ಸೊಸೈಟಿ ಸಂಸ್ಥಾಪಕಿ ಹರ್ಷಿಣಿ ವೆಂಕಟೇಶ್ ತಿಳಿಸಿದರು.

‘ಕೋಲಾರದಲ್ಲಿ 5 ಸಾವಿರಕ್ಕೂ ಹೆಚ್ಚು ಯೋಧರ ಕುಟುಂಬಗಳಿವೆ. ಇವರಿಗೆ ವಿದ್ಯುತ್ ಸಮಸ್ಯೆ ಇರುವುದನ್ನು ಮನಗಂಡು ಅಗತ್ಯವಿರುವ ಯೋಧರ ಕುಟುಂಬಗಳಿಗೆ ಸೋಲಾರ್ ಪ್ಯಾನೆಲ್ ಕಿಟ್ ಉಚಿತವಾಗಿ ವಿತರಿಸಿದ್ದೇವೆ’ ಎಂದರು. ಕಾರ್ಗಿಲ್ ಯುದ್ಧದಲ್ಲಿ ಎರಡೂ ಕಾಲುಗಳನ್ನು ಕಳೆದುಕೊಂಡಿರುವ ಕ್ಯಾ.ನವೀನ್ ನಾಗಪ್ಪ, ಸೇನೆಯ ಅಧಿಕಾರಿ ಸ್ವಾತಿ ಬಸೇಡಿಯಾ ಅವರೂ ರ‍್ಯಾಲಿಯಲ್ಲಿ ಭಾಗವಹಿಸಿದ್ದರು.