ಮೆಟ್ರೊಗೆ ರಕ್ಷಣಾ ಇಲಾಖೆ ಜಾಗ: ಚರ್ಚ್‌ಗೆ ನೀಡಿದ್ದ ಪರಿಹಾರ ಹಣ ಮುಟ್ಟುಗೋಲು

ನಗರದ ಹೊಸೂರು ರಸ್ತೆಯ ವೆಲ್ಲಾರ ವೃತ್ತದ ಬಳಿ ಇರುವ ಆಲ್‌ಸೇಂಟ್‌ ಚರ್ಚ್‌ಗೆ ಹೊಂದಿಕೊಂಡಿ ರುವ 7,426.8 ಚದರ ಮೀಟರ್‌ ಜಾಗವನ್ನು ಬಿಎಂಆರ್‌‌ಸಿಎಲ್‌ಗೆ ಹಸ್ತಾಂತರಿಸಲು ಚರ್ಚ್‌ ಒಪ್ಪಂದ ಮಾಡಿಕೊಂಡಿತ್ತು. ಇದಕ್ಕೆ ಪ್ರತಿಯಾಗಿ ₹ 59.29 ಕೋಟಿ ಮೊತ್ತದ ಪರಿಹಾರವನ್ನು ಬಿಎಂಆರ್‌ಸಿಎಲ್,‌ ಚರ್ಚ್‌ಗೆ ನೀಡಿತ್ತು. ಇದು ರಕ್ಷಣಾ ಸಚಿವಾಲಯಕ್ಕೆ ಸೇರಿದ ಜಾಗ. ಇದನ್ನು ಅಕ್ರಮವಾಗಿ ಬಿಎಂಆರ್‌ಸಿಎಲ್‌ಗೆ ಹಸ್ತಾಂತರಿಸಲಾಗಿದೆ ಎಂದು ಅಶೋಕನಗರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿತ್ತು.

‘ದೂರಿನ ಅನ್ವಯ ತನಿಖೆ ನಡೆಸಿದಾಗ ಈ ಜಾಗವನ್ನು ರಕ್ಷಣಾ ಇಲಾಖೆಯು ಚರ್ಚ್‌ಗೆ ಭೋಗ್ಯಕ್ಕೆ ನೀಡಿತ್ತು. ಧಾರ್ಮಿಕ ಚಟುವಟಿಕೆಗಳನ್ನು ನಡೆಸಲಷ್ಟೇ ಇದನ್ನು ಬಳಸಬೇಕು ಎಂದು ಷರತ್ತು ಹಾಕಲಾಗಿತ್ತು. ಇದರ ಹೊರತಾಗಿ ಚರ್ಚ್‌ಗೆ ಜಾಗದ ಮೇಲೆ ಬೇರೆ ಯಾವ ಹಕ್ಕೂ ಇಲ್ಲ ಎಂಬುದು ತನಿಖೆಯಿಂದ ಗೊತ್ತಾಯಿತು. ಹೀಗಾಗಿ ಈ ಜಾಗದ ಹಸ್ತಾಂತರಕ್ಕೆ ಪ್ರತಿಯಾಗಿ ನೀಡಿದ್ದ ಪರಿಹಾರದ ಹಣ ಮತ್ತು ಅದಕ್ಕೆ ಸಂದಾಯವಾಗಿದ್ದ ಬಡ್ಡಿಯನ್ನು ಮುಟ್ಟುಗೋಲು ಹಾಕಿಕೊಳ್ಳಲಾಗಿದೆ. ತನಿಖೆ ಮುಂದುವರಿದಿದೆ’ ಎಂದು ಜಾರಿ ನಿರ್ದೇಶನಾಲಯವು ತಿಳಿಸಿದೆ.