ಬೆಂಗಳೂರು: 'ಬೆಂಗಳೂರು ನಗರ ಪೊಲೀಸ್' ಹೆಸರಿನಲ್ಲಿ ನಕಲಿ ಫೇಸ್ಬುಕ್ ಖಾತೆ ತೆರೆದಿದ್ದ ಆರೋಪಿಯನ್ನು ಸಿಸಿಬಿ ಪೊಲೀಸರು ಬಂಧಿಸಿದ್ದಾರೆ.
ಮಲ್ಲೇಶ್ವರದ ನಿವಾಸಿ ಪಂಕಜ್ ಕುಮಾರ್ ಬಚಾವತ್ (40) ಬಂಧಿತ ಆರೋಪಿ.
ಫೇಸ್‍ಬುಕ್‍ನಲ್ಲಿ 'ಬೆಂಗಳೂರು ಸಿಟಿ ಪೊಲೀಸ್' ಹೆಸರಿನ ಗುಂಪೊಂದನ್ನು ರಚಿಸಿ, ಅದರ ಅಡ್ಮಿನ್ ಆಗಿದ್ದ. ಈತ ಯಾವುದೇ ಪೋಸ್ಟ್ ಹಾಕುತ್ತಿರಲಿಲ್ಲ. ಆದರೆ, ಈ ಗುಂಪಿನಲ್ಲಿದ್ದ ಕೆಲ ಸದಸ್ಯರು ಅವಹೇಳನಕಾರಿ ಹಾಗೂ ದ್ವೇಷ ಬಿತ್ತುವ ಪೋಸ್ಟ್ ಗಳನ್ನು ಹಾಕುತ್ತಿದ್ದರು.
2019ರಲ್ಲಿ ಆರೋಪಿ ವಿರುದ್ಧ ದೂರು ದಾಖಲಾಗಿದ್ದು, ಪೊಲೀಸರು ಹುಡುಕಾಟ ನಡೆಸುತ್ತಿದ್ದರು.
ಜನರಿಗೆ ಸಹಾಯ ಮಾಡಲು ಫೇಸ್‍ಬುಕ್‍ನಲ್ಲಿ ಗ್ರೂಪ್ ರಚಿಸಿದ್ದಾಗಿ ಆರೋಪಿಯು ಪೊಲೀಸ್ ವಿಚಾರಣೆ ವೇಳೆ ಹೇಳಿದ್ದಾನೆ.
