ಮಂಗಳವಾರ, 19 ಮಾರ್ಚ್ 2024
×
ADVERTISEMENT
ಈ ಕ್ಷಣ :
ADVERTISEMENT
ADVERTISEMENT

ಮದುವೆಯಾಗದ್ದಕ್ಕೆ ಪ್ರಿಯಕರನ ಮರ್ಮಾಂಗ ಕತ್ತರಿಸಿದ್ದ ವೈದ್ಯೆಗೆ 10 ವರ್ಷ ಜೈಲು

Last Updated 15 ಡಿಸೆಂಬರ್ 2019, 5:45 IST
ಅಕ್ಷರ ಗಾತ್ರ

ಬೆಂಗಳೂರು: ತನ್ನನ್ನು ಬಿಟ್ಟು ಬೇರೆ ಹುಡುಗಿ ಜೊತೆ ಮದುವೆಯಾದ ಎಂಬ ಕಾರಣಕ್ಕೆ ಸ್ನೇಹಿತನ ಮರ್ಮಾಂಗವನ್ನೇ ಕತ್ತರಿಸಿ ಕೊಲೆಗೆ ಯತ್ನಿಸಿದ್ದ ವೈದ್ಯೆ ಡಾ. ಸೈಯಿದಾ ಅಮಿನಾ ನಹೀಮ್ (32) ಎಂಬಾಕೆಗೆ 10 ವರ್ಷಗಳ ಕಠಿಣ ಕಾರಾಗೃಹ ಶಿಕ್ಷೆ ವಿಧಿಸಲಾಗಿದೆ.

ಕೋರಮಂಗಲ ಠಾಣೆ ವ್ಯಾಪ್ತಿಯಲ್ಲಿ 2008ರಲ್ಲಿ ನಡೆದಿದ್ದ ಪ್ರಕರಣದ ವಿಚಾರಣೆ ನಡೆಸಿದ 61ನೇ ಸಿಸಿಎಚ್‌ ನ್ಯಾಯಾಧೀಶ ವಿದ್ಯಾಧರ ಶಿರಹಟ್ಟಿ ಅವರು ಶುಕ್ರವಾರ ಈ ಆದೇಶ ಹೊರಡಿಸಿದ್ದಾರೆ. ಸಂತ್ರಸ್ತನ ಪರ ಪಬ್ಲಿಕ್ ಪ್ರಾಸಿಕ್ಯೂಟರ್ ಶೈಲಜಾ ಕೃಷ್ಣ ನಾಯಕ ವಾದಿಸಿದ್ದರು.

‘ಅಪರಾಧಿ ಸೈಯಿದಾ ಅಮಿನಾ ನಹೀಮ್ ಕೋರಮಂಗಲ 8ನೇ ಹಂತದ ‘ಬಿ’ ಮೈನ್‌ನಲ್ಲಿ ಮಿಸ್ವಾಕ್ ಹೆಸರಿನ ಡೆಂಟಲ್ ಕ್ಲಿನಿಕ್‌ ನಡೆಸುತ್ತಿದ್ದರು. ಅದೇ ಕ್ಲಿನಿಕ್‌ನಲ್ಲೇ ಸ್ನೇಹಿತ ಡಾ. ಮೀರ್ ಅರ್ಷದ್ ಅಲಿ ಅವರನ್ನು ಕೊಲೆ ಮಾಡಲು ಯತ್ನಿಸಿದ್ದರು. ಆಕೆಯನ್ನು ಬಂಧಿಸಿದ್ದ ಕೋರಮಂಗಲ ಪೊಲೀಸರು ನ್ಯಾಯಾಲಯಕ್ಕೆ ದೋಷಾರೋಪ ಪಟ್ಟಿಸಲ್ಲಿಸಿದ್ದರು’ ಎಂದು ಶೈಲಜಾ ತಿಳಿಸಿದರು.

ಪ್ರಜ್ಞೆ ತಪ್ಪಿಸಿ ಕೃತ್ಯ: ಅಪರಾಧಿ ಸೈಯಿದಾ ಅಮಿನಾ ನಹೀಮ್ ಹಾಗೂ ಮೈಸೂರಿನ ನಿವಾಸಿಯಾದ ವೈದ್ಯ ಡಾ. ಮೀರ್ ಅರ್ಷದ್ ಅಲಿ ನಡುವೆ ಸ್ನೇಹ ಏರ್ಪಟ್ಟಿತ್ತು. ಇಬ್ಬರೂ ಪ್ರೀತಿಸಲಾರಂಭಿಸಿದ್ದರು. ಮದುವೆಯಾಗಲೂ ತೀರ್ಮಾನಿಸಿದ್ದರು. ಅದಕ್ಕೆ ಕುಟುಂಬದವರು ವಿರೋಧ ವ್ಯಕ್ತಪಡಿಸಿದ್ದರು.

ತಮಗೆ ಕ್ಯಾನ್ಸರ್‌ ಇರುವುದಾಗಿ ಹೇಳಿದ್ದಮೀರ್ ಅರ್ಷದ್ ಅಮಿನಾ ಅವರನ್ನು ಮದುವೆ ಆಗಲು ನಿರಾಕರಿಸಿದ್ದರು. ಅದಾಗಿ ಕೆಲ ತಿಂಗಳಿನಲ್ಲೇ ಬೇರೊಬ್ಬ ಯುವತಿಯನ್ನು ಮದುವೆ ಆಗಿದ್ದರು. ಮಾನಸಿಕವಾಗಿ ನೊಂದು ದ್ವೇಷ ಸಾಧಿಸುತ್ತಿದ್ದ ಅಮಿನಾ, ಮೀರ್ ಅರ್ಷದ್ ಅವರನ್ನು ಕೊಲೆ ಮಾಡಲು ಸಂಚು ರೂಪಿಸಿದ್ದರು.

2008ರ ನವೆಂಬರ್ 29ರಂದು ಮೀರ್ ಅರ್ಷದ್ ಹಾಗೂ ಅವರ ಪತ್ನಿಯನ್ನು ಕ್ಲಿನಿಕ್‌ಗೆ ಕರೆಸಿಕೊಂಡಿದ್ದ ಅಪರಾಧಿ ಅವರೊಂದಿಗೆ ಆತ್ಮಿಯವಾಗಿ ಮಾತನಾಡಿದ್ದಳು. ಅವರಿಬ್ಬರಿಗೂ ಮತ್ತು ಬರುವ ಔಷಧಿ ಬೆರೆಸಿದ್ದ ತಂಪು ಪಾನೀಯ ಕುಡಿಸಿ ಪ್ರಜ್ಞೆ ತಪ್ಪಿಸಿದ್ದಳು. ಅದಾದ ನಂತರವೇ ಮೀರ್‌ ಅರ್ಷದ್‌ ಅವರ ಮರ್ಮಾಂಗವನ್ನು ಹರಿತವಾದ ಬ್ಲೇಡ್‌ನಿಂದ ಕತ್ತರಿಸಿ ಗಾಯವನ್ನುಂಟು ಮಾಡಿದ್ದಳು. ರಕ್ತಸ್ರಾವದಿಂದ ಬಳಲುತ್ತಿದ್ದ ಮೀರ್‌ ಅರ್ಷದ್‌ ಅವರನ್ನು ಆಕೆಯೇ ಆಸ್ಪತ್ರೆಗೆ ಸೇರಿಸಿ ಪರಾರಿಯಾಗಿದ್ದಳು.

ಸಂತ್ರಸ್ತನಿಗೆ ₹2 ಲಕ್ಷ ಪರಿಹಾರ

‘ಶಿಕ್ಷೆ ಅನುಭವಿಸುವ ಜೊತೆಗೆಯೇ ಅಪರಾಧಿ ಸೈಯಿದಾ ಅಮಿನಾ ನಹೀಮ್, ಸಂತ್ರಸ್ತ ಮೀರ್‌ ಅರ್ಷದ್ ಅವರಿಗೆ ₹ 2 ಲಕ್ಷ ಪರಿಹಾರ ನೀಡುವಂತೆ ನ್ಯಾಯಾಲಯ ಆದೇಶದಲ್ಲಿ ತಿಳಿಸಿದೆ. ಪರಿಹಾರ ನೀಡದಿದ್ದರೆ ಆಕೆಯ ಆಸ್ತಿಯನ್ನು ಜಪ್ತಿ ಮಾಡುವಂತೆಯೂ ಸೂಚಿಸಿದೆ’ ಎಂದು ಶೈಲಜಾ ಕೃಷ್ಣ ನಾಯಕ ಹೇಳಿದರು.

ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.

ADVERTISEMENT
ADVERTISEMENT
ADVERTISEMENT
ADVERTISEMENT