ಬೆಂಗಳೂರು: ಚಾಮರಾಜಪೇಟೆಯ ಶಾಸಕ ಜಮೀರ್ ಅಹ್ಮದ್ ಅವರು ಬುಧವಾರ ರಾತ್ರಿ ಹೆಲ್ಮೆಟ್ ಧರಿಸದೆ ಸಿಗ್ನಲ್ ಜಂಪ್ ಮಾಡಿ ದ್ವಿಚಕ್ರ ವಾಹನ ಓಡಿಸಿದ್ದಾರೆ. ಇದರ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಬುಧವಾರ ರಾತ್ರಿ ಕಾರ್ಯಕರ್ತರೊಬ್ಬರ ದ್ವಿಚಕ್ರ ವಾಹನ ಪಡೆದುಕೊಂಡು ಖುದ್ದು ಅವರೇ ಓಡಿಸಿದ್ದಾರೆ. ಈ ವೇಳೆ ಅವರು ಹಾಗೂ ಹಿಂಬದಿ ಸವಾರ ಇಬ್ಬರೂ ಹೆಲ್ಮೆಟ್ ಹಾಕಿರಲಿಲ್ಲ.
‘ಏಕಮುಖ ರಸ್ತೆಯಲ್ಲೇ ಶಾಸಕರು ವಾಹನ ಓಡಿಸಿದ್ದಾರೆ. ಸಿಗ್ನಲ್ ಸಹ ಜಂಪ್ ಮಾಡಿ ಸಾರ್ವಜನಿಕರ ಸಂಚಾರಕ್ಕೆ ತೊಂದರೆ ಉಂಟು ಮಾಡಿದ್ದಾರೆ. ಸ್ಥಳದಲ್ಲೇ ಸಂಚಾರ ಪೊಲೀಸರು ಇದ್ದರೂ ಯಾವುದೇ ಕ್ರಮ ಕೈಗೊಂಡಿಲ್ಲ’ ಎಂದು ಸ್ಥಳೀಯರೊಬ್ಬರು ದೂರಿದರು.
ಈ ಬಗ್ಗೆ ಪೊಲೀಸರು, ‘ವಿಡಿಯೊ ಗಮನಿಸಿಲ್ಲ. ಸಂಬಂಧಪಟ್ಟ ಠಾಣೆಯಿಂದ ಮಾಹಿತಿ ಪಡೆದು ಕ್ರಮ ಕೈಗೊಳ್ಳುತ್ತೇವೆ’ ಎಂದರು.