ಅಡುಗೆ ನನ್ನ ನೆಚ್ಚಿನ ಹವ್ಯಾಸ. ನಾನು ಎಲ್ಲಾ ತರದ ಅಡುಗೆಗಳನ್ನು ಮಾಡುತ್ತೇನೆ. ನಮ್ಮೂರು ಉಡುಪಿ. ಹೀಗಾಗಿ ನಾನು ಉಡುಪಿ ಶೈಲಿಯ ಬಹುತೇಕ ಎಲ್ಲಾ ಅಡುಗೆಗಳನ್ನು ಮಾಡುತ್ತೀನಿ. ನಮ್ಮದು ಶುದ್ಧ ಸಸ್ಯಾಹಾರ ಕುಟುಂಬ. ಸಸ್ಯಾಹಾರದಲ್ಲಿ ಆಗಾಗ ಹೊಸ ರುಚಿ ಪ್ರಯೋಗ ಮಾಡುತ್ತಿರುತ್ತೇನೆ.
ನಾನು ಹುಳಿ, ಸಾರು, ಸಾಂಬಾರು, ಪಲ್ಯ, ತಿಂಡಿಗಳು, ಪಲಾವ್‌ಗಳು ಹೀಗೆ ಎಲ್ಲಾ ಬಗೆಯ ಅಡುಗೆಯನ್ನು ಮಾಡುತ್ತೇನೆ. ಹುಳಿಯಲ್ಲಿ ಹತ್ತಕ್ಕೂ ಹೆಚ್ಚು ಬಗೆ, ಬಗೆ ಬಗೆ ತರಕಾರಿ ಪಲ್ಯ, ಸಾಂಬಾರು ಮಾಡುವುದು ಗೊತ್ತು. ನನ್ನ ಅಡುಗೆ ರುಚಿ ಉಂಡವರು ಹೊಗಳುತ್ತಾರೆ. ಅಡುಗೆ ರುಚಿಯಾಗಿದೆ ಎಂದು ಯಾರಾದರೂ ಹೇಳಿದರೆ ಅದೇ ನನಗೇ ದೊಡ್ಡ ಖುಷಿ. ಅಡುಗೆ ಮಾಡುವುದನ್ನು ನಾನು ಕಷ್ಟ ಅಂತ ಅಂದುಕೊಂಡಿದ್ದೇ ಇಲ್ಲ. ಎಂಜಾಯ್‌ ಮಾಡಿಕೊಂಡು, ಖುಷಿ ಖುಷಿಯಾಗಿ ಅಡುಗೆ ಮಾಡಲು ನನಗಿಷ್ಟ.
ನಾನು ಅಡುಗೆ ಮಾಡುವುದನ್ನು ಕಲಿತಿದ್ದು ನನ್ನಮ್ಮ ಪ್ರಿಯಾ ಅವರಿಂದ. ಅವರು ಉಡುಪಿ ಕಡೆಯ ಕೆಲವು ಸಾಂಪ್ರದಾಯಿಕ ಅಡುಗೆಗಳನ್ನು ತುಂಬ ಚೆನ್ನಾಗಿ ಮಾಡುತ್ತಾರೆ. ನನಗೆ ಆ ಅಡುಗೆಗಳೆಲ್ಲ ಬರಲ್ಲ. ಅಮ್ಮನಿಂದ ಕಲಿತುಕೊಳ್ಳಬೇಕು ಎಂಬ ಆಸೆ ಇದೆ. ಅಮ್ಮನ ಹಾಗೇ ಅಡುಗೆ ಮಾಡುವುದನ್ನು ಕಲಿಯುವ ಪ್ರಯತ್ನದಲ್ಲಿದ್ದೇನೆ. ನನ್ನಕ್ಕ ಅಮೆರಿಕದಲ್ಲಿರುವುದರಿಂದ ಅಮ್ಮ ಆಗಾಗ ಅಲ್ಲಿಗೆ ಹೋಗುತ್ತಿರುತ್ತಾರೆ. ಆಗ ಮನೆಯಲ್ಲಿ ಅಡುಗೆ ಮನೆ ಜವಾಬ್ದಾರಿ ನನ್ನದೇ. ಆಗ ಅಪ್ಪನಿಗೆ ಲಂಚ್‌ ಬಾಕ್ಸ್‌ ಹಾಕಿಕೊಟ್ಟು, ನಾನೂ ಬಾಕ್ಸ್‌ ತಗೊಂಡು ಹೋಗುತ್ತೇನೆ.
ನನ್ನ ಮೊದಲ ಅಡುಗೆ ಪ್ರಯೋಗ ನಾನು ಶಾಲೆಗೆ ಹೋಗುತ್ತಿದ್ದಾಗ ಮಾಡಿದ್ದೆ. ಒಂದು ದಿನ ನನ್ನ ಮಾವ ಸಡನ್ನಾಗಿ ಮನೆಗೆ ಬಂದರು. ಅಮ್ಮ ಮನೆಯಲ್ಲಿರಲಿಲ್ಲ. ಊಟದ ಸಮಯ. ಮನೆಯಲ್ಲಿ ಅಮ್ಮ ಒಬ್ಬಳಿಗಾಗುವಷ್ಟು ಅಡುಗೆ ಮಾಡಿ ಹೋಗಿದ್ದರು. ಅಮ್ಮನಿಗೆ ಫೋನ್‌ ಮಾಡಿದೆ. ಅಮ್ಮ ಮಟ್ಟಗುಳ್ಳ (ಉಡುಪಿ ಭಾಗದಲ್ಲಿ ಸಿಗುವ ತರಕಾರಿ) ಅಡುಗೆ ಮನೆಯಲ್ಲಿದೆ. ಅದರಲ್ಲಿ ಹುಳಿ ಮಾಡು ಎಂದರು. ನಾನು ಸಾಮಗ್ರಿ ಎಲ್ಲಾ ಹೊಂದಿಸಿಕೊಂಡು ಹುಳಿ ಮಾಡಿದೆ. ಮಾವ ಬಾಯಿ ಚಪ್ಪರಿಸಿಕೊಂಡು ಊಟ ಮಾಡಿದರು. ಈಗಲೂ ಅವರು ನನ್ನ ಮೊದಲ ಅಡುಗೆಯನ್ನು ಆಗಾಗ ನೆನಪಿಸುತ್ತಿರುತ್ತಾರೆ.
ನಾನು ಹೊರಗಡೆ ಏನೂ ತಿನ್ನಲ್ಲ. ನಾವು ಮನೆಯಲ್ಲಿ ಕುಸುಬುಲಕ್ಕಿ ಅನ್ನ ಉಣ್ಣುವುದು. ಹಾಗಾಗಿ ಚಿತ್ರೀಕರಣಕ್ಕೂ ನಾನು ಮನೆಯಿಂದ ಊಟ ತೆಗೆದುಕೊಂಡು ಹೋಗುತ್ತೇನೆ. ಮೂರು ಜನರಿಗಾಗುವಷ್ಟು ದೊಡ್ಡ ಬಾಕ್ಸ್‌ ತಗೊಂಡೇ ಹೋಗ್ತೀನಿ. ಎಲ್ಲರೂ ಹಂಚಿಕೊಂಡು ತಿನ್ನುತ್ತೇವೆ. ಮನೆಯೂಟ ಅಂದ್ರೆ ಎಲ್ಲರೂ ಇಷ್ಟಪಟ್ಟು ತಿಂತಾರೆ.
ಮಾವು ಕೈರಸ
ಸಾಮಗ್ರಿಗಳು: ತೋತಾಪುರಿ ಮಾವಿನ ಕಾಯಿ –1, ಅರಿಶಿನ– 1/2 ಚಮಚ, ಇಂಗು– 1/4 ಚಮಚ, ಬೆಲ್ಲ– ನಿಂಬೆಹಣ್ಣಿನ ಗಾತ್ರದಷ್ಟು, ಉಪ್ಪು– ರುಚಿಗೆ ತಕ್ಕಷ್ಟು. ಮಸಾಲ ತಯಾರಿಸಲು– ಬ್ಯಾಡಗಿ ಮೆಣಸು– 7, ಉದ್ದಿನ ಬೇಳೆ– 2ಚಮಚ, ಸಾಸಿವೆ– 1 ಚಮಚ, ಕೊತ್ತಂಬರಿ ಬೀಜ– 1 ಚಮಚ, ಮೆಂತ್ಯೆ ಕಾಳು– 1/4 ಚಮಚ, ಇಂಗು– ಚಿಟಿಕೆ, ಅಡುಗೆ ಎಣ್ಣೆ– 1 ಚಮಚ, ತೆಂಗಿನ ಕಾಯಿತುರಿ– 1 ಕಪ್‌. ಒಗ್ಗರಣೆಗೆ– ಕರಿಬೇವು, ಸಾಸಿವೆ, ಉದ್ದಿನ ಬೇಳೆ, ಕೆಂಪು ಮೆಣಸಿನ ಕೋಡು, ಇಂಗು– ಚಿಟಿಕೆ.
ಮಾಡುವ ವಿಧಾನ: ತೋತಾಪುರಿ ಮಾವಿನ ಕಾಯಿಯನ್ನು ಚಿಕ್ಕದಾಗಿ ಹೆಚ್ಚಿಕೊಳ್ಳಿ. ಅದಕ್ಕೆ ಅರಿಶಿನ, ಇಂಗು, ಬೆಲ್ಲ, ಉಪ್ಪು ಹಾಕಿ ಮಿಶ್ರ ಮಾಡಿ ಕಲಸಿಕೊಳ್ಳಬೇಕು. ಬಳಿಕ ಪ್ಯಾನ್‌ಗೆ ಎಣ್ಣೆ ಹಾಕಿ ಮಸಾಲ ಸಾಮಗ್ರಿಗಳನ್ನು ಹುರಿದುಕೊಳ್ಳಬೇಕು. ಕೊನೆಗೆ ಅದಕ್ಕೆ ತೆಂಗಿನ ತುರಿ ಹಾಕಿ ಸ್ವಲ್ಪ ಬಾಡಿಸಿ. ಆ ಮಿಶ್ರಣ ತಣ್ಣಗಾದ ಬಳಿಕ ಮಿಕ್ಸಿಯಲ್ಲಿ ರುಬ್ಬಿಕೊಳ್ಳಬೇಕು. ಈ ರುಬ್ಬಿಕೊಂಡ ಮಿಶ್ರಣವನ್ನು ಕಲಸಿಟ್ಟ ಮಾವಿನ ಮಿಶ್ರಣಕ್ಕೆ ಹಾಕಿ ಚೆನ್ನಾಗಿ ಕಲಸಬೇಕು. ಬಳಿಕ ಅದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ ಕೊನೆಗ ಒಗ್ಗರಣೆ ಕೊಟ್ಟರೆ ಮಾವು ಕೈರಸ ಸಿದ್ಧ. ಇದು ದೋಸೆ, ಇಡ್ಲಿ ಹಾಗೂ ಅನ್ನದ ಜೊತೆ ತಿನ್ನಲು ರುಚಿಯಾಗಿರುತ್ತದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.