ಭಾಲ್ಕಿ | ಕೊಳಚೆ ಸಂಗ್ರಹ; ದುರ್ನಾತಕ್ಕೆ ಬೇಸತ್ತ ಜನರು

ಈ ಪ್ರದೇಶದಲ್ಲಿ ಮನೆಗಳ, ಮಳೆ ನೀರು ಹರಿದು ಹೋಗಲು ಸೂಕ್ತ ಚರಂಡಿ ವ್ಯವಸ್ಥೆ ಇಲ್ಲ. ಮನೆಗಳ ಎದುರೇ ಮಳೆ ನೀರು ಸೇರಿದಂತೆ ಕೊಳಚೆ ನೀರು ಸಂಗ್ರಹವಾಗುತ್ತಿದೆ. ಮಳೆಗಾಲದಲ್ಲಿ ಧಾರಾಕಾರವಾಗಿ ಮಳೆ ಸುರಿದರೆ, ಕೊಳಚೆ ನೀರು ಮನೆಗಳಿಗೆ ನುಗ್ಗುತ್ತದೆ. ಜತೆಗೆ ದಿನದ ಇಪ್ಪತ್ನಾಲ್ಕು ಗಂಟೆ ದುರ್ನಾತ ಬೀರುತ್ತಿದ್ದು, ಮನೆಯಲ್ಲಿದ್ದರೂ ಕಿರಿಕಿರಿಯಾಗುತ್ತಿದೆ ಎಂದು ನಿವಾಸಿಗಳಾದ ಮಹಿಳೆಯರಾದ ಮಹಾದೇವಿ, ಕಲಾವತಿ, ಸುನಿತಾ ಆತಂಕ ವ್ಯಕ್ತಪಡಿಸಿದರು.

ಸಂಜೆಯಾಗುತ್ತಲೇ ಮನೆಗೆ ನುಗ್ಗುವ ಸೊಳ್ಳೆಗಳು ನೆಮ್ಮದಿಯಿಂದ ಬದುಕಲು ಬಿಡುತ್ತಿಲ್ಲ. ಇದು ಸೊಳ್ಳೆಗಳ ಆವಾಸ ಸ್ಥಾನವಾಗಿ ಮಾರ್ಪಟ್ಟಿದ್ದು, ಸಾಂಕ್ರಾಮಿಕ ರೋಗಗಳು ಹರಡುತ್ತಿವೆ. ಕಾಲರಾ, ಮಲೇರಿಯಾ, ಚಿಕೂನ್‌ ಗುನ್ಯ ಸೇರಿದಂತೆ ಇತರ ಸಾಂಕ್ರಾಮಿಕ ರೋಗಗಳ ಅಂಜಿಕೆ ಕಾಡುತ್ತಿದೆ ಎಂದು ಅಳಲು ತೋಡಿಕೊಂಡರು.

ಟವರ್‌ ಹಿಂಭಾಗದಲ್ಲಿಯೂ ನೈರ್ಮಲ್ಯದ ಕೊರತೆಯಿಂದಾಗಿ, ಹಂದಿ, ನಾಯಿಗಳ ಉಪಟಳ ಹೆಚ್ಚಾಗಿದೆ. ಬಡಜನರು ಹೆಚ್ಚಿನ ಸಂಖ್ಯೆಯಲ್ಲಿ ಜೀವನ ಸಾಗಿಸುವ ಈ ಪ್ರದೇಶದಲ್ಲಿ ಜನರ ನೆಮ್ಮದಿಯ ಜೀವನಕ್ಕೆ ಅನುಕೂಲಿಸಲು ಸಂಬಂಧಪಟ್ಟ ಅಧಿಕಾರಿ, ಜನಪ್ರತಿನಿಧಿಗಳು ಸೂಕ್ತ ಯೋಜನೆ, ಪರಿಹಾರ ಮಾರ್ಗೋಪಾಯ ಮಾಡಬೇಕು. ಜತೆಗೆ ಸಿಸಿ ರಸ್ತೆಯಿಲ್ಲ. ಹೀಗಾಗಿ ಸೂಕ್ತ ಚರಂಡಿ ವ್ಯವಸ್ಥೆ, ಸಿ.ಸಿ ರಸ್ತೆ ನಿರ್ಮಾಣಕ್ಕೆ ಮುಂದಾಗಬೇಕು ಎಂದು ಕರ್ನಾಟಕ ರಾಜ್ಯ ರೈತ ಸಂಘದ ಜಿಲ್ಲಾ ಕಾರ್ಯಾಧ್ಯಕ್ಷ ನಾಗಶೆಟ್ಟೆಪ್ಪ ಲಂಜವಾಡೆ ಸೇರಿದಂತೆ ಕಾಲೊನಿ ವಾಸಿಗಳು ಒತ್ತಾಯಿಸುತ್ತಾರೆ.