ಮಾರುಕಟ್ಟೆಯಲ್ಲಿ ಹಿರಿಮೆ ಕಾಯ್ದುಕೊಂಡ ಹಿರೇಕಾಯಿ, ಸ್ವಲ್ಪ ಚೇತರಿಸಿಕೊಂಡ ಟೊಮೆಟೊ

ಸಬ್ಬಸಗಿ ಸೊಪ್ಪಿನ ಬೆಲೆ ಕ್ವಿಂಟಲ್‌ಗೆ ದಿಢೀರ್‌ ₹ 500ರಿಂದ ₹1,000, ಎಲೆಕೋಸು ₹ 200 ರಿಂದ ₹500, ಮೆಂತೆ ಸೊಪ್ಪು, ಕೊತಂಬರಿ, ಹೂಕೋಸು, ಭೆಂಡೆಕಾಯಿ ಹಾಗೂ ಬೀನ್ಸ್‌ ಬೆಲೆ ₹ 500 ವರೆಗೆ ಕುಸಿಯಿತು. ಟೊಮೆಟೊ ಬೆಲೆಯಲ್ಲಿ ಸ್ವಲ್ಪ ಚೇತರಿಸಿಕೊಂಡಿತು.
ಚಿಲ್ಲರೆ ಮಾರುಕಟ್ಟೆಯಲ್ಲಿ ಟೊಮೆಟೊ ಪ್ರತಿ ಕೆಜಿಗೆ ₹8 ರಿಂದ ₹10ಗೆ ಮಾರಾಟವಾದ ಕಾರಣ ಗ್ರಾಹಕರ ಪಾಲಿಗೆ ಅಚ್ಚುಮೆಚ್ಚಿನ ತರಕಾರಿಯಾಗಿ ಗುರುತಿಸಿಕೊಂಡಿತು. ಹೋಟೆಲ್ ಹಾಗೂ ಖಾನಾವಳಿ ಮಾಲೀಕರು ಉತ್ಸಾಹದಿಂದ ಟೊಮೆಟೊ ಖರೀದಿಸಿದರು.

ಬೆಳ್ಳೊಳ್ಳಿ ಬೆಲೆ ಕ್ವಿಂಟಲ್‌ಗೆ ₹ 200 ರಿಂದ ₹500, ಆಲೂಗಡ್ಡೆ ₹ 300 ರಿಂದ ₹400 ವರೆಗೆ ಹೆಚ್ಚಳವಾಯಿತು. ಗುಣಮಟ್ಟದ ಈರುಳ್ಳಿ, ಬದನೆಕಾಯಿ, ಗಜ್ಜರಿ, ಬಿಟ್‌ರೂಟ್ ಬೆಲೆ ಸ್ಥಿರವಾಗಿರುವುದು ಕಂಡು ಬಂದಿತು. ತೊಂಡೆಕಾಯಿ ಹಾಗೂ ಹಿರೇಕಾಯಿ ಮಾರುಕಟ್ಟೆಯಲ್ಲಿ ಹಿರಿಮೆಯನ್ನು ಕಾಯ್ದುಕೊಂಡವು.

ಹೈದರಾಬಾದ್‌ನಿಂದ ಆಲೂಗಡ್ಡೆ, ಹಿರೇಕಾಯಿ, ಈರುಳ್ಳಿ, ಬೆಳ್ಳೊಳ್ಳಿ, ಮೆಂತೆ ಸೊಪ್ಪು ಮಾರುಕಟ್ಟೆಗೆ ಆವಕವಾಗಿವೆ. ಮಹಾರಾಷ್ಟ್ರದ ಸೋಲಾಪುರದ ತೊಂಡೆಕಾಯಿ, ಬೀನ್ಸ್, ಲಾತೂರ್‌ನಿಂದ ಮೆಣಸಿನಕಾಯಿ, ನಾಸಿಕ್‌ನಿಂದ ಗಜ್ಜರಿ,
ಬೀದರ್‌ ತಾಲ್ಲೂಕು, ಚಿಟಗುಪ್ಪ ಹಾಗೂ ಭಾಲ್ಕಿಯಿಂದ ಹೂಕೋಸು, ಕೊತಂಬರಿ, ಕರಿಬೇವು ಹಾಗೂ ಬದನೆಕಾಯಿ ಬಂದಿವೆ.

‘ಮಹಾರಾಷ್ಟ್ರದಲ್ಲಿ ನೀರಾವರಿ ಸೌಲಭ್ಯ ಇರುವ ಜಿಲ್ಲೆಗಳಲ್ಲಿ ರೈತರು ಬೆಳೆದ ತರಕಾರಿ ಈ ಬಾರಿ ಜಿಲ್ಲೆಯ ಸಗಟು ಮಾರುಕಟ್ಟೆಗೆ ಬಂದಿದೆ. ಬಹುತೇಕ ರೈತರು ಒಂದೇ ಬಗೆಯ ತರಕಾರಿ ಬೆಳೆದಿದ್ದಾರೆ. ಹೀಗಾಗಿ ಬಹುತೇಕ ತರಕಾರಿ ಬೆಲೆ ಕುಸಿದಿದೆ’ ಎಂದು ಇಂಡಿಯನ್ ವೆಜಿಟೆಬಲ್ ಶಾಪ್‌ ಮಾಲೀಕ ಅಹ್ಮದ್ ಪಾಷಾ ಹೇಳುತ್ತಾರೆ.

ಬೀದರ್‌ ತರಕಾರಿ ಸಗಟು ಮಾರುಕಟ್ಟೆ

ತರಕಾರಿ(ಪ್ರತಿ ಕ್ವಿಂಟಲ್) ಕಳೆದ ವಾರ ಈ ವಾರ
ಈರುಳ್ಳಿ, 1,000-1,500, 1,200–1,600
ಮೆಣಸಿನಕಾಯಿ, 2,000-2,500, 2,500–3,000
ಆಲೂಗಡ್ಡೆ, 1,500-2,000, 1,800–2,200
ಎಲೆಕೋಸು, 1,000-1,500, 800–1,000
ಬೆಳ್ಳೂಳ್ಳಿ , 2,500-3,000, 3,000–3,200
ಗಜ್ಜರಿ, 2,000-3,000, 2,500–3,000
ಬೀನ್ಸ್‌, 3,000-4,000, 3,000–3,500
ಬದನೆಕಾಯಿ, 3,000-4,000, 3,500–4,000
ಮೆಂತೆ ಸೊಪ್ಪು, 1,000-1,500, 800–1,000
ಹೂಕೋಸು, 2,000-2,400, 1,500–2,000
ಸಬ್ಬಸಗಿ, 3,000-4,000, 2,500–3,000
ಬಿಟ್‌ರೂಟ್‌, 3,500-4,000, 3,000–4,000
ಕರಿಬೇವು, 4,000-5,000, 3,000–4,000
ಕೊತಂಬರಿ, 3,000-4,000, 3,000–3,500
ಟೊಮೆಟೊ, 400- 600, 500–800
ತೊಂಡೆಕಾಯಿ, 2,500-3,000, 3,000–3,400
ಭೆಂಡೆಕಾಯಿ, 3,000-3,500, 2,500–3,000
ಹಿರೇಕಾಯಿ, 3,000-3,500, 3,000–4,000