ಗುರುವಾರ , ಜನವರಿ 21, 2021
24 °C
ನಾಲ್ಕು ದಶಕಗಳ ಕಲಾ ಸೇವೆಗೆ ಸಂದ ಗೌರವ

ಜಾನಪದ ಅಕಾಡೆಮಿ ಪ್ರಶಸ್ತಿಗೆ ಸೋಬಾನೆ ಕಲಾವಿದೆ ಬಿ.ಹೊನ್ನಮ್ಮ ಆಯ್ಕೆ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಚಾಮರಾಜನಗರ: ಸಮೀಪದ ರಾಮಸಮುದ್ರದ ಸೋಬಾನೆ ಕಲಾವಿದೆ ಬಿ.ಹೊನ್ನಮ್ಮ ಅವರು 2020ನೇ ಸಾಲಿನ ಜಾನಪದ ಅಕಾಡೆಮಿಯ ವಾರ್ಷಿಕ ಪ್ರಶಸ್ತಿಗೆ ಆಯ್ಕೆಯಾಗಿದ್ದಾರೆ.

50 ವರ್ಷಗಳಿಂದ ಸೋಬಾನೆ ಪದಗಳನ್ನು ಹಾಡುತ್ತಾ ಬಂದಿರುವ ಹೊನ್ನಮ್ಮ ಅವರದ್ದು, ಕಲಾ ಸೇವೆಯ ಕುಟುಂಬ. ಅವರ ತಾಯಿ ಚಿಕ್ಕಸಿದ್ದಮ್ಮ, ಚಿಕ್ಕಮ್ಮ ಹನುಮಮ್ಮ ಅವರು ಕೂಡ ಸೋಬಾನೆ ಕಲಾವಿದರೇ. 70 ವರ್ಷ ವಯಸ್ಸಿನ ಹೊನ್ನಮ್ಮ ಅವರು ನಾಲ್ಕು ದಶಕಗಳಿಂದ ಸೋಬಾನೆ ಕಲಾವಿದರ ತಂಡದ ಭಾಗವಾಗಿ ಹಾಗೂ ತಮ್ಮದೇ ತಂಡಕಟ್ಟಿಕೊಂಡು ಅಪರೂಪದ ಜನಪದ ಕಲೆಯನ್ನು ಉಳಿಸಿ ಬೆಳೆಸುತ್ತಿದ್ದಾರೆ. 

ತಾಯಿ ಹಾಗೂ ಚಿಕ್ಕಮ್ಮನಿಂದ ಸೋಬಾನೆ ಪದಗಳನ್ನು ಕಲಿತಿರುವ ಹೊನ್ನಮ್ಮ ಅವರು ತಮ್ಮ ನಾಲ್ವರು ಹೆಣ್ಣು ಮಕ್ಕಳಿಗೆ ಹಾಗೂ ತಮ್ಮ ತಂಡದ ಸದಸ್ಯರಿಗೆ ಕಲೆಯನ್ನು ಧಾರೆ ಎರೆಯುತ್ತಿದ್ದಾರೆ. 

ಮದುವೆ, ಗೃಹ ಪ್ರವೇಶ, ನಾಮಕರಣ ಮುಂತಾದ ಶುಭ ಸಮಾರಂಭಗಳಲ್ಲಿ ಸೋಬಾನೆ ಪದಗಳನ್ನು ಹಾಡುತ್ತಾ ಖ್ಯಾತಿ ಗಳಿಸಿರುವ ಹೊನ್ನಮ್ಮ ಅವರಿಗೆ ಮಹದೇಶ್ವರ, ಮಂಟೇಸ್ವಾಮಿ, ಬಿಳಿಗಿರಿರಂಗಸ್ವಾಮಿ, ಶಿವಶರಣೆಶಂಕಮ್ಮ, ಜೋಗುಳಹಾಡು, ಒಡಹುಟ್ಟಿದವರ ಹಾಡು, ತಾಯಮ್ಮನ ಹಾಡು, ಚಾಮುಂಡೇಶ್ವರಿ, ನಂಜುಂಡೇಶ್ವರರ ಕುರಿತ ಹಾಡು, ಬೀಸೋಕಲ್ಲು ಹಾಡುಗಳು ಕರಗತವಾಗಿದೆ. 

‘ಮೂರು ದಿನಗಳಗಳವರೆಗೆ ನಿರಂತರವಾಗಿ ಹಾಡುವಷ್ಟು ಪದಗಳು ನನಗೆ ತಿಳಿದಿದೆ’ ಎಂದು ಹೆಮ್ಮೆಯಿಂದ ಹೇಳಿಕೊಳ್ಳುತ್ತಾರೆ ಹೊನ್ನಮ್ಮ. 

ಒಂಬತ್ತು ವರ್ಷಗಳ ಕಾಲ ಆಕಾಶವಾಣಿ ಕಲಾವಿದರಾಗಿ ಕಾರ್ಯನಿರ್ವಹಿಸಿರುವ ಅವರು, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಸಹಯೋಗದಲ್ಲಿ ಜಿಲ್ಲೆ ಹಾಗೂ ಹೊರ ಜಿಲ್ಲೆಗಳಲ್ಲೂ ಕಾರ್ಯಕ್ರಮಗಳನ್ನು ನೀಡಿದ್ದಾರೆ.

ಹೊನ್ನಮ್ಮ ಅವರ ಕಲಾ ಸೇವೆಯನ್ನು ಗುರುತಿಸಿ ಜಿಲ್ಲಾಡಳಿತ ದಸರಾ ಮಹೋತ್ಸವದಲ್ಲಿ ಸನ್ಮಾನಿಸಿದೆ. ಜಿಲ್ಲಾ ಕಸಾಪ ಸೇರಿದಂತೆ ವಿವಿಧ ಸಂಘ ಸಂಸ್ಥೆಗಳು ಗೌರವಿಸಿವೆ. 

ಅಕಾಡೆಮಿ ಪ್ರಶಸ್ತಿಗೆ ಆಯ್ಕೆಯಾದ ನಂತರ ‘ಪ್ರಜಾವಾಣಿ’ಯೊಂದಿಗೆ ಮಾತನಾಡಿದ ಹೊನ್ನಮ್ಮ ಅವರು, ‘50 ವರ್ಷಗಳಿಂದ ಸೋಬಾನೆ ಪದಗಳನ್ನು ಹಾಡುತ್ತಾ ಬಂದಿದ್ದೇನೆ. ನನ್ನ ಹಿರೀಕರೆಲ್ಲ ತೀರಿ ಹೋಗಿದ್ದಾರೆ. ಈಗ ನಾನೇ ಹಿರೀಕಳು. 10 ಜನರ ತಂಡ ಕಟ್ಟಿ ಪ್ರದರ್ಶನ ನೀಡುತ್ತಿದ್ದೇನೆ. ಮಕ್ಕಳಿಗೆ ಹಾಗೂ ಆಸಕ್ತಿ ಇರುವವರಿಗೆ ಹೇಳಿಕೊಡುತ್ತಿದ್ದೇನೆ. ಸರ್ಕಾರ ನನ್ನ ಸಾಧನೆಯನ್ನು ಗುರುತಿಸಿ ಪ್ರಶಸ್ತಿಗೆ ಆಯ್ಕೆ ಮಾಡಿರುವುದಕ್ಕೆ ಸಂತಸವಾಗಿದೆ’ ಎಂದರು. 

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.