ಹೂವು, ತರಕಾರಿ ಧಾರಣೆ ಏರಿಳಿತ

ಚಾಮರಾಜನಗರ: ಎರಡು ವಾರಗಳಿಂದೀಚೆಗೆ ತರಕಾರಿ, ಹೂವುಗಳ ಧಾರಣೆಯಲ್ಲಿ ಕಂಡು ಬಂದಿದ್ದ ಏರಿಳಿತ ಈ ವಾರವೂ ಮುಂದುವರೆದಿದೆ. ಕೆಲವು ಹೂವು, ತರಕಾರಿಗಳ ಬೆಲೆಯಲ್ಲಿ ಕೊಂಚ ಏರಿಕೆಯಾದರೆ, ಇನ್ನೂ ಕೆಲವು ಸ್ವಲ್ಪ ಅಗ್ಗವಾಗಿವೆ. 

ಹೂವುಗಳ ಪೈಕಿ ಒಂದು ಕೆ.ಜಿ. ಚೆಂಡು ಹೂವು, ಸೇವಂತಿಗೆ ತಲಾ ₹10, ಸುಗಂಧರಾಜ ₹40, ಕಾಕಡ ₹100ರಷ್ಟು ಇಳಿಕೆ ಕಂಡಿದೆ. ಕನಕಾಂಬರ ₹100 ಏರಿಕೆಯಾಗಿದೆ.

’ಮೂರು ವಾರಗಳಿಂದ ಹೂವುಗಳ ಬೆಲೆಯಲ್ಲಿ ವ್ಯತ್ಯಾಸ ಕಂಡು ಬರುತ್ತಿದೆ. ಸೋಮವಾರ, ಶುಕ್ರವಾರದ ಪೂಜಾ ಕೈಂಕರ್ಯಗಳಿಗೆ ಮಾತ್ರ ಜನರು ಹೂವು ಖರೀದಿಗೆ ಮುಂದಾಗುತ್ತಿದ್ದಾರೆ. ಮುಂದಿನ ವಾರ ಮುಡುಕುತೊರೆ ಜಾತ್ರೆ ಇದೆ. ಈ ಸಂದರ್ಭದಲ್ಲಿ ಬೆಲೆ ಸ್ವಲ್ಪ ಹೆಚ್ಚಾಗಬಹುದು’ ಎಂದು ಬಿಡಿ ಹೂವುಗಳ ವ್ಯಾಪಾರಿ ಮಹೇಶ್‌ ‘ಪ್ರಜಾವಾಣಿ’ಗೆ ತಿಳಿಸಿದರು. 

ತರಕಾರಿಗಳ ಪೈಕಿ, ಒಂದು ಕೆ.ಜಿ. ಅವರೆ, ಬೀನ್ಸ್‌, ಮರಗೆಣಸು, ಹಸಿ ಬಟಾಣಿಗಳ ಬೆಲೆ ₹10 ಹೆಚ್ಚಳವಾಗಿದೆ. ಟೊಮೆಟೊ ₹2, ಕ್ಯಾರೆಟ್‌, ಚಪ್ಪರದ ಬದನೆಕಾಯಿ ₹5 ಏರಿಕೆ ಕಂಡಿದೆ.

ಈರುಳ್ಳಿ ಮತ್ತೆ ಇಳಿಕೆ: ಈರುಳ್ಳಿ ಬೆಲೆಯಲ್ಲಿ ಈ ವಾರ ಮತ್ತೆ ₹10 ಇಳಿಕೆಯಾಗಿದೆ. ಕಳೆದ ವಾರ ಹಾಪ್‌ಕಾಮ್ಸ್‌ನಲ್ಲಿ ಒಂದು ಕೆ.ಜಿ. ಈರುಳ್ಳಿಗೆ ₹50ರ ಧಾರಣೆಯಿತ್ತು. ಸೋಮವಾರ ₹40 ಇತ್ತು. ಶುಂಠಿ ಬೆಲೆ ₹20 ಕಡಿಮೆಯಾಗಿದೆ. ಉಳಿದ ತರಕಾರಿಗಳ ಬೆಲೆಯಲ್ಲಿ ವ್ಯತ್ಯಾಸವಾಗಿಲ್ಲ. 

‘ತರಕಾರಿಗಳಿಗೆ ಈಗ ಬೇಡಿಕೆ ಇದೆ. ನಾವು ಎಪಿಎಂಸಿ ಮಾರುಕಟ್ಟೆಯಲ್ಲಿ ತರಕಾರಿ ಖರೀದಿ ಮಾಡುವುದರಿಂದ ಅಲ್ಲಿನ ದರದಲ್ಲೇ ವ್ಯಾಪಾರ ಮಾಡುತ್ತೇವೆ’ ಎಂದು ಹಾಪ್‌ಕಾಮ್ಸ್‌ ವ್ಯಾಪಾರಿ ಮಧು ಹೇಳಿದರು. 

ಕಲ್ಲಂಗಡಿ, ಸಪೋಟಾ ಏರಿಕೆ: ಬಿಸಿಲ ಝಳ ಹೆಚ್ಚುತ್ತಿದ್ದಂತೆಯೇ ಕೆಲವು ಹಣ್ಣುಗಳ ಬೆಲೆ ಹೆಚ್ಚಲು ಆರಂಭಿಸಿವೆ. ಕಲ್ಲಂಗಡಿ, ಪರಂಗಿ ಹಣ್ಣುಗಳ (ಪಪ್ಪಾಯ) ಒಂದು ಕೆ.ಜಿ. ಬೆಲೆ ₹5ರಷ್ಟು ಹೆಚ್ಚಾಗಿದ್ದರೆ, ಸಪೋಟಾ ₹10 ಏರಿಕೆಯಾಗಿದೆ. ಪಚ್ಚಬಾಳೆ ₹5 ಕಡಿಮೆಯಾಗಿದೆ.

ಮೊಟ್ಟೆ ಅಗ್ಗ, ಚಿಕನ್‌ ತುಟ್ಟಿ

ಮಾಂಸ ಮಾರುಕಟ್ಟೆಯಲ್ಲಿ ಮೊಟ್ಟೆ ಬೆಲೆ ಇಳಿಕೆಯಾಗಿದೆ. ಕಳೆದೆರಡು ವಾರದಿಂದ ಮೊಟ್ಟೆ ದರ ಇಳಿಯುತ್ತಿದೆ. ಹೋದ ವಾರ ₹400 ಇದ್ದಂತಹ 100 ಮೊಟ್ಟೆಯ ಬೆಲೆ ಈ ವಾರ ₹394 ಇದೆ. 

ಮೈಸೂರು ಮಾರುಕಟ್ಟೆಗೆ ಅನುಗುಣವಾಗಿ ಬೆಲೆ ನಿರ್ಧಾರವಾಗುತ್ತದೆ. ಎರಡು ಅಥವಾ ಮೂರು ದಿನಗಳಿಗೊಮ್ಮೆ ಬೇಡಿಕೆ ನೋಡಿಕೊಂಡು ಬೆಲೆ ನಿಗದಿ ಮಾಡಲಾಗುತ್ತದೆ ಎನ್ನುತ್ತಾರೆ ಮೊಟ್ಟೆ ವ್ಯಾಪಾರಿಗಳು.

ಒಂದು ಕೆ.ಜಿ. ಚಿಕನ್‌ ಈ ವಾರ ₹10 ಹೆಚ್ಚಳವಾಗಿದೆ. ಉಳಿದ ಎಲ್ಲ ಮಾಂಸಗಳ ದರ ಯಥಾಸ್ಥಿತಿ ಮುಂದುವರೆದಿದೆ.