ಶುಕ್ರವಾರ, ಜುಲೈ 30, 2021
21 °C
ಬಿಆರ್‌ಟಿ ಹುಲಿ ಸಂರಕ್ಷಿತ ಪ್ರದೇಶ: ಹೊಸ ಬೇಲಿ ನಿರ್ಮಾಣಕ್ಕೆ ಕಾಡಂಚಿನ ಕೃಷಿಕರ ಆಗ್ರಹ

ಹಾಳಾದ ಸೌರ ಬೇಲಿ, ಹೆಚ್ಚಿದ ಪ್ರಾಣಿಗಳ ಹಾವಳಿ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಯಳಂದೂರು: ತಾಲ್ಲೂಕಿನ ಅರಣ್ಯದ ಅಂಚಿನಲ್ಲಿ ಕಾಡಾನೆ ಮತ್ತಿತರ ವನ್ಯ ಜೀವಿಗಳನ್ನು ನಿಯಂತ್ರಿಸಲು ಅಳವಡಿಲಾಗಿದ್ದ ಸೌರಬೇಲಿ ಅಲ್ಲಲ್ಲಿ ಕಿತ್ತು ಬಂದಿದ್ದು, ಸ್ಥಳೀಯ ಕೃಷಿಕರಿಗೆ ತಲೆನೋವಾಗಿ ಪರಿಣಮಿಸಿದೆ.

ಹಲವು ವರ್ಷಗಳಿಂದ ಹಿಂದೆ ಅರಣ್ಯ ಇಲಾಖೆ ಕಾಡಂಚಿನ ಪ್ರದೇಶದ‌ಲ್ಲಿ ಸೌರಬೇಲಿ ನಿರ್ಮಿಸಿದೆ. ಈ ಬೇಲಿ ಕಿತ್ತು ಬಂದಿದ್ದು, ಕೆಲವೆಡೆ ತುಂಡಾಗಿ ಉರುಳಿ ಬಿದ್ದಿದೆ. ಈ ಮಾರ್ಗದಲ್ಲಿ ನುಸುಳಿ ಬರುವ ಕರಡಿ, ಕಾಡು ಹಂದಿ, ಆನೆಗಳಿಂದಾಗಿ ಮುಂಗಾರು ಹಂಗಾಮಿನಲ್ಲಿ ಬೆಳೆದ ಬೆಳೆಗಳನ್ನು ಉಳಿಸಿಕೊಳ್ಳುವುದು ಹಿಡುವಳಿದಾರರಿಗೆ ಕಷ್ಟವಾಗಿದೆ.

‘ಲಕ್ಷಾಂತರ ರೂಪಾಯಿ ವೆಚ್ಚದಲ್ಲಿ ನಿರ್ಮಿಸಿದ್ದ ಸೌರಬೇಲಿ ಹಾಳಾಗಿದೆ. ಇವುಗಳನ್ನು ದುರಸ್ತಿ ಪಡಿಸಬೇಕು. ಅರಣ್ಯ ಪ್ರದೇಶಕ್ಕೆ ಹೋಗಲು ಅಲ್ಲಲ್ಲಿ ನಿರ್ಮಿಸಿರುವ ಕಬ್ಬಿಣದ ಗೇಟ್‌ನ್ನು ಕಾಡಾನೆಗಳು ಮುರಿಯುತ್ತಿವೆ. ನಂತರ ‍ಪ್ರಾಣಿಗಳು ತೋಟಗಳಿಗೆ ಲಗ್ಗೆ ಇಡುತ್ತವೆ. ಇದರಿಂದ ಬೆಳೆ ಉಳಿಸಿಕೊಳ್ಳುವುದು ಕಷ್ಟವಾಗುತ್ತದೆ’ ಎಂದು ಅರಣ್ಯದ ಅಂಚಿನ ಕೃಷಿಕರಾದ ನಂಜೇಗೌಡ ಮತ್ತು ಶಿವಣ್ಣ ಹೇಳುತ್ತಾರೆ.

‘ಸೌರಬೇಲಿ ಮುರಿದು ಬಿದ್ದಿರುವುದರಿಂದ ಬೇಟೆಗಾರರು ಹಾಗೂ ಮರಗಳ್ಳರು ಸುಲಭವಾಗಿ ಅರಣ್ಯ ಪ್ರವೇಶ ಪಡೆಯಬಹುದು. ಈ ಮೊದಲು ಅರಣ್ಯ ಇಲಾಖೆ ಅಧಿಕಾರಿಗಳ ಕಣ್ಣು ತಪ್ಪಿಸಿ ಕಳ್ಳಕಾಕರು ಅಡ್ಡದಾರಿ ಮೂಲಕ ಕಾನನದಲ್ಲಿ ನುಗ್ಗುತ್ತಿದ್ದರು. ಈಗ ಸುಲಭವಾಗಿ ಕಾಡು ಪ್ರವೇಶಿಸಿ ಬೇಟೆಯಾಡಲು ಅವಕಾಶ ಸಿಕ್ಕಿದಂತೆ ಆಗುತ್ತದೆ. ಹಾಗಾಗಿ, ಈ ಮಾರ್ಗದ ಸೋಲಾರ್ ಬೇಲಿ ದುರಸ್ತಿ ಮಾಡಬೇಕು’ ಎಂದು ‌ಕೃಷಿಕರು ಆಗ್ರಹಿಸಿದ್ದಾರೆ. 

‘ಆಮೆಕೆರೆ ಡ್ಯಾಂನಿಂದ ಹೊಸೂರು, ಆಮೆಕೆರೆ, ಗೌಡಹಳ್ಳಿ ಭಾಗದ ಕೃಷಿಕರ ಜಮೀನಿಗೆ ಆನೆ, ಕಡವೆ, ಚಿರತೆ, ಮುಳ್ಳುಹಂದಿಗಳು ಲಗ್ಗೆ ಇಡುತ್ತವೆ. ರಾತ್ರಿ 8 ಗಂಟೆಗೆ ಇಳಿಯುವ ವನ್ಯ ಜೀವಿಗಳು ಫಸಲನ್ನು ಮುಗಿಸಿಯೇ ತೆರಳುತ್ತವೆ. ಹಾಗಾಗಿ, ಸಂಜೆ 4 ಗಂಟೆಗೆ ರೈತರು ಬುತ್ತಿ ಕಟ್ಟಿಕೊಂಡು ಹೊಲ, ಗದ್ದೆ ಕಾಯಬೇಕಾದ ಸ್ಥಿತಿ ಇದೆ’ ಎಂದು ಮದ್ದೂರಿನ
ನಾಗಣ್ಣ, ಮಲಾರಪಾಳ್ಯ ಜಡೇಸ್ವಾಮಿ ಅವರು ‘ಪ್ರಜಾವಾಣಿ’ಗೆ ತಿಳಿಸಿದರು. 

ಮಳೆಯನ್ನೇ ನಂಬಿಕೊಂಡ ರೈತರು ಖುಷ್ಕಿ ಭೂಮಿಗಳಲ್ಲಿ ವಾಣಿಜ್ಯ ಬೆಳೆಗಳಿಗೆ ಒತ್ತು ನೀಡುತ್ತಾರೆ. ಇದರಿಂದ ವರ್ಷದ ಮನೆಯ ಖರ್ಚು ವೆಚ್ಚಗಳನ್ನು ಸರಿದೂಗಿಸಲು ಸಾಧ್ಯವಾಗುತ್ತದೆ. ಮನೆ ಬಳಕೆಗೆ ರಾಗಿ, ತರಕಾರಿ, ಬಾಳೆ ಬೆಳೆಯುತ್ತಾರೆ. ಆದರೆ, ಪ್ರಾಣಿಗಳು ಲಗ್ಗೆ ಇಟ್ಟರೆ ಹಾಕಿದ ಬಂಡವಾಳವೂ ವಾಪಸ್ ಬರುವುದಿಲ್ಲ ಎಂಬುದು ರೈತರ ಚಿಂತೆ. 

‘ಜಮೀನುಗಳ ಬಳಿ ಮಳೆ, ಬಿಸಿಲು ಎನ್ನದೆ ಮನೆ ಮಂದಿ ಕಾದದ್ದೇ ಬಂತು. ಫಸಲು ಮಾತ್ರ ಮನೆ ಸೇರಲಿಲ್ಲ. ಸೋಲಾರ್‌ ಬೇಲಿ ಕಿತ್ತು ಹೋದ ಪ್ರದೇಶದಲ್ಲಿ ಅಲ್ಪ ಜಾಗ ಸಿಕ್ಕರೂ ಸಾಕು ಆನೆ, ಕರಡಿ, ಚಿರತೆಗಳು ಆಹಾರ ಅರಿಸಿ ಬರುತ್ತವೆ’ ಎಂದು ಪಟ್ಟಣದ ಸುರೇಶ್ ಹೇಳಿದರು.  

10 ವರ್ಷಗಳಷ್ಟು ಹಳೆಯದು

ಈ ಬಗ್ಗೆ ‘ಪ್ರಜಾವಾಣಿ’ಗೆ ಪ್ರತಿಕ್ರಿಯಿಸಿದ ವಲಯ ಅರಣ್ಯಾಧಿಕಾರಿ (ಆರ್‌ಎಫ್‌ಒ) ಮಹದೇವಯ್ಯ ಅವರು, ‘ಗೌಡಹಳ್ಳಿ ಗುಡ್ಡ ಮತ್ತಿತರ ಕಡೆ ಅಳವಡಿಸಿರುವ ತಂತಿಯ ಕಬ್ಬಿಣ ಪಿಲ್ಲರ್‌ಗೆ‌ 10 ವರ್ಷ ಆಗಿದೆ. ಹಾಗಾಗಿ, ದೃಢತೆಯನ್ನು ಕಳೆದುಕೊಂಡಿವೆ. ಪ್ರತಿ ವರ್ಷ ಬಿಸಿಲು, ಮಳೆ, ಗಾಳಿಗೆ ತರೆದುಕೊಳ್ಳುವ ಕಾರಣ ತಂತಿಗಳ ಧಾರಣಾ ಶಕ್ತಿಯೂ ಕಡಿಮೆಯಾಗುತ್ತದೆ. ಈ ಮಾರ್ಗದಲ್ಲಿ ಸೌರಬೇಲಿ ಅಳವಡಿಕೆಗೆ ಇಲಾಖೆ ಯೋಜನೆ ರೂಪಿಸುತ್ತಿದೆ’ ಎಂದು ಹೇಳಿದರು.

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.