ಎಸ್ಸೆಸ್ಸೆಲ್ಸಿಯಲ್ಲಿ ಚಾಮರಾಜನಗರ ಜಿಲ್ಲೆಗೆ ಶೇ 87.10 ಫಲಿತಾಂಶ

ಚಾಮರಾಜನಗರ: ಕೋವಿಡ್‌ ಕಾರಣದಿಂದ ವಿಳಂಬವಾಗಿ ನಡೆದಿದ್ದ 2019–20ನೇ ಸಾಲಿನ ಎಸ್ಸೆಸ್ಸೆಲ್ಸಿ ಪರೀಕ್ಷೆಯಲ್ಲಿ  ಜಿಲ್ಲೆಯು ಶೇ 87.10ರಷ್ಟು ಫಲಿತಾಂಶ ದಾಖಲಿಸಿದೆ. 

ಜಿಲ್ಲೆಯಲ್ಲಿ ಒಟ್ಟು 10,465 ವಿದ್ಯಾರ್ಥಿಗಳು (5,159 ಬಾಲಕರು, 5,306 ಬಾಲಕಿಯರು) ಪರೀಕ್ಷೆಗೆ ಹಾಜರಾಗಿದ್ದರು. ಈ ಪೈಕಿ, 9,115 ಮಂದಿ ಉತ್ತೀರ್ಣರಾಗಿದ್ದಾರೆ.

ಬಾಲಕಿಯರ ಮೇಲುಗೈ: ಎಂದಿನಂತೆ ಈ ವರ್ಷವೂ ಬಾಲಕಿಯರೇ ಮೇಲುಗೈ ಸಾಧಿಸಿದ್ದಾರೆ. ಪರೀಕ್ಷೆ ಬರೆದಿದ್ದ 5,306 ಮಂದಿಯ ಪೈಕಿ 4,758 ವಿದ್ಯಾರ್ಥಿನಿಯರು (ಶೇ 89.67ರಷ್ಟು) ತೇರ್ಗಡೆಯಾಗಿದ್ದಾರೆ. ಪರೀಕ್ಷೆಗೆ ಹಾಜರಾದ 5,159 ಬಾಲಕರಲ್ಲಿ 4,357 ಮಂದಿ (ಶೇ 84.45ರಷ್ಟು) ಉತ್ತೀರ್ಣರಾಗಿದ್ದಾರೆ. 

ಹನೂರು ತಾಲ್ಲೂಕು ಪ್ರಥಮ: ಶೇ 97.14ರಷ್ಟು ಫಲಿತಾಂಶ ದಾಖಲಿಸಿರುವ ಹನೂರು ತಾಲ್ಲೂಕು ಜಿಲ್ಲೆಯಲ್ಲಿ ಮೊದಲ ಸ್ಥಾನದಲ್ಲಿದೆ. ಕೊಳ್ಳೇಗಾಲ ತಾಲ್ಲೂಕು ಎರಡನೇ ಸ್ಥಾನದಲ್ಲಿದ್ದು, ಶೇ 96.01ರಷ್ಟು ಫಲಿತಾಂಶ ದಾಖಲಿಸಿದೆ. ಯಳಂದೂರು ತಾಲ್ಲೂಕಿನ ಶಾಲೆಗಳು ಶೇ 86ರಷ್ಟು ಫಲಿತಾಂಶ ದಾಖಲಿಸಿವೆ. ಈ ಮೂರೂ ತಾಲ್ಲೂಕುಗಳು ‘ಎ’ ಶ್ರೇಣಿ ಪಡೆದಿವೆ.

ಚಾಮರಾಜನಗರ ಮತ್ತು ಗುಂಡ್ಲುಪೇಟೆ ತಾಲ್ಲೂಕುಗಳು ‘ಬಿ’ ಶ್ರೇಣಿ ಪಡೆದಿವೆ. ಚಾಮರಾಜನಗರ ತಾಲ್ಲೂಕು ಶೇ 83.80 ಮತ್ತು ಗುಂಡ್ಲುಪೇಟೆ ತಾಲ್ಲೂಕಿನಲ್ಲಿ ಶೇ 74.50ರಷ್ಟು ಫಲಿತಾಂಶ ದಾಖಲಾಗಿದೆ.