ಚಿಕ್ಕಬಳ್ಳಾಪುರದತ್ತ ಸುಳಿಯದ ಬಿರುಸು ಮಳೆ

ಚಿಕ್ಕಬಳ್ಳಾಪುರ: ರಾಜ್ಯದ ಬಹುತೇಕ ಜಿಲ್ಲೆಗಳಲ್ಲಿ ಮಳೆ ಅಬ್ಬರಿಸಿ ಬೊಬ್ಬಿರಿಯುತ್ತಿದೆ. ಬೆಳೆಗಳು ನಾಶವಾಗಿವೆ. ಇಲ್ಲಿಯವರೆಗೆ ಗರಿಷ್ಠ ಮಳೆಯಾದ ಜಿಲ್ಲೆಗಳ ಪಟ್ಟಿಯಲ್ಲಿ ನೆರೆಯ ಕೋಲಾರವು ಎರಡನೇ ಸ್ಥಾನದಲ್ಲಿ ಇದೆ.  

ನೆರೆಯ ಜಿಲ್ಲೆಗಳಾದ ತುಮಕೂರು, ಬೆಂಗಳೂರು ಮತ್ತು ಬೆಂಗಳೂರು ಗ್ರಾಮಾಂತರ  ಜಿಲ್ಲೆಯಲ್ಲಿಯೂ ಅತ್ಯುತ್ತಮವಾಗಿ ಮಳೆ ಆಗಿದೆ. ಆದರೆ ಇಲ್ಲಿಯವರೆಗೆ ಸುರಿದಿರುವ ಮಳೆ ಚಿಕ್ಕಬಳ್ಳಾಪುರ ಜಿಲ್ಲೆಯ ದಾಹವನ್ನು ತಣಿಸಿಲ್ಲ.  

ತೀವ್ರ ಬಿಸಿಲು ಮತ್ತು ಬರದಿಂದ ಕಂಗೆಟ್ಟಿರುವ ಜಿಲ್ಲೆಯ ರೈತರು, ಜನರು ಹಾಗೂ ಭೂಮಿಗೆ ಇಲ್ಲಿಯವರೆಗೆ ಸುರಿದಿರುವ ಮಳೆಗಳು ದೊಡ್ಡ ಮಟ್ಟದಲ್ಲಿ ತಂಪು ತಂದಿಲ್ಲ.  

2024ರ ಜ.1ರಿಂದ ಮೇ 17ರವರೆಗೆ ಜಿಲ್ಲೆಯಲ್ಲಿ ಬಿದ್ದ ಮಳೆಯ ಪ್ರಮಾಣವನ್ನು ಅಲೋಕಿಸಿದರೆ ಚಿಕ್ಕಬಳ್ಳಾಪುರದಲ್ಲಿ ಮಳೆಯ ಕೊರತೆ ಎದ್ದು ಕಾಣುತ್ತದೆ. ಈ ಅವಧಿಯಲ್ಲಿ 77.1 ಮಿ.ಮೀ ವಾಡಿಕೆ ಮಳೆ ಇತ್ತು. ಆದರೆ ಇಲ್ಲಿಯವರೆಗೆ 52.6 ಮಿ.ಮೀ ಮಳೆ ಸುರಿದಿದೆ. -31.78 ಮಿ.ಮೀ ಮಳೆ ಕೊರತೆ ಇದೆ.