ಚಿಕ್ಕಮಗಳೂರು | ಏಳು ದಿನ ಮಳೆ ಅಬ್ಬರ: ಹಾನಿ ಅಪಾರ

ವಿಪರೀತ ಮಳೆಗೆ ಜಿಲ್ಲೆಯಲ್ಲಿ 188 ಕಿಲೋ ಮೀಟರ್ ರಸ್ತೆ ಹಾಳಾಗಿದೆ. ಅದರಲ್ಲಿ 8 ಕಿಲೋ ಮೀಟರ್ ಲೋಕೋಪಯೋಗಿ ಇಲಾಖೆ ರಸ್ತೆಯಾಗಿದ್ದರೆ 180 ಕಿಲೋ ಮೀಟರ್‌ನಷ್ಟು ಜಿಲ್ಲಾ ಪಂಚಾಯಿತಿ ರಸ್ತೆಗಳು ಹಾಳಾಗಿವೆ. ಶೃಂಗೇರಿ ತಾಲ್ಲೂಕಿನಲ್ಲಿ 90 ಕಿಲೋ ಮೀಟರ್ ಕೊಪ್ಪ ತಾಲ್ಲೂಕಿನಲ್ಲಿ 79 ಕಿಲೋ ಮೀಟರ್ ರಸ್ತೆ ಹಾನಿಗೀಡಾಗಿದೆ. ಮೂರು ನೀರಿನ ಟ್ಯಾಂಕ್‌ಗಳು 9 ಶಾಲಾ ಕಟ್ಟಡಗಳು 8 ಸರ್ಕಾರಿ ಕಟ್ಟಡಗಳಿಗೆ ಹಾನಿಯಾಗಿದೆ. ರಸ್ತೆ ಹಾಳಾಗಿರುವುದರಿಂದ ₹44 ಕೋಟಿ ನಷ್ಟವಾಗಿದೆ ಎಂದು ಅಧಿಕಾರಿಗಳು ಅಂದಾಜಿಸಿದ್ದಾರೆ.

ಭಾರಿ ಮಳೆಯಲ್ಲಿ ಹಳ್ಳ–ಕೊಳ್ಳಗಳು ನದಿಗಳು ಉಕ್ಕಿ ಹರಿದಿದ್ದರಿಂದ 52 ಸೇತುವೆಗಳಿಗೆ ಹಾನಿಯಾಗಿದೆ. ಲೋಕೋಪಯೋಗಿ ಇಲಾಖೆ 36 ಮತ್ತು ಪಂಚಾಯತ್ ರಾಜ್ ಎಂಜಿನಿಯರಿಂಗ್ ವಿಭಾಗದ 16 ಸೇತುವೆಗಳು ಮುರಿದಿದ್ದು ಮೂಡಿಗೆರೆ ತಾಲ್ಲೂಕಿನಲ್ಲೇ ಅತೀ ಹೆಚ್ಚು 19 ಸೇತುವೆಗಳು ಹಾಳಾಗಿವೆ. ಸೇತುವೆ ಹಾನಿಯಿಂದ ₹32.43 ಕೋಟಿಯಷ್ಟು ನಷ್ಟವಾಗಿದೆ ಎಂದು ಅಧಿಕಾರಿಗಳು ಅಂದಾಜಿಸಿದ್ದಾರೆ.

ಮಳೆಯ ಆರ್ಭಟಕ್ಕೆ 3538 ವಿದ್ಯುತ್ ಕಂಬಗಳಿಗೆ ಹಾನಿಯಾಗಿದ್ದು 70.76 ಕಿಲೋ ಮೀಟರ್‌ನಷ್ಟು ವಿದ್ಯುತ್ ತಂತಿ ಹಾಳಾಗಿದೆ. ಹಲವೆಡೆ ಮರಗಳು ವಿದ್ಯುತ್ ಕಂಬಗಳ ಮೇಲೆ ಬಿದ್ದಿದ್ದರೆ ಕೆಲವೆಡೆ ಜೋರು ಗಾಳಿಗೆ ವಿದ್ಯುತ್ ಕಂಬಗಳೇ ಕುಸಿದಿವೆ. ಇದರಿಂದಾಗಿ ವಿದ್ಯುತ್ ತಂತಿಗಳು ತುಂಡಾಗಿವೆ. ₹5.5 ಕೋಟಿ ಮೌಲ್ಯದ ವಿದ್ಯುತ್ ಕಂಬ ಮತ್ತು ₹50 ಲಕ್ಷ ಮೌಲ್ಯದ ವಿದ್ಯುತ್ ತಂತಿ ಹಾಳಾಗಿದೆ ಎಂದು ಅಧಿಕಾರಿಗಳು ಅಂದಾಜಿಸಿದ್ದಾರೆ. ಹಗಲು–ರಾತ್ರಿ ಲೆಕ್ಕಿಸದೆ ಮಳೆಯ ನಡುವೆಯೂ ದುರಸ್ತಿ ಕಾರ್ಯವನ್ನು ಮೆಸ್ಕಾಂ ಸಿಬ್ಬಂದಿ ನಡೆಸುತ್ತಿದ್ದಾರೆ.