ಕಡೂರು: ಬಗೆಹರಿಯದ ವಾಹನ ನಿಲುಗಡೆ ಸಮಸ್ಯೆ; ಸುಗಮ ಸಂಚಾರಕ್ಕೆ ಪೊಲೀಸರ ಶ್ರಮ

ಪಟ್ಟಣದ ಪ್ರವಾಸಿ ಮಂದಿರದ ರಸ್ತೆಯಲ್ಲಿ ಬರುವ ವಾಹನಗಳು ಅಂಬೇಡ್ಕರ್ ಪ್ರತಿಮೆ ಬಳಿ ಎಡ ತಿರುವು ತೆಗೆದುಕೊಂಡು, ಆಸ್ಪತ್ರೆ ಮುಂಭಾಗದಲ್ಲಿ ಯು ಟರ್ನ್‌ ತೆಗೆದುಕೊಂಡು ಬರಬೇಕಿದೆ. ಇದಕ್ಕಾಗಿ ಸೂಚನಾ ಫಲಕವನ್ನೂ ಹಾಕಲಾಗಿದೆ. ಆದರೆ, ಇದನ್ನು ವಾಹನ ಸವಾರರು ಲೆಕ್ಕಿಸುವುದಿಲ್ಲ. ಇದರಿಂದ ಹೆದ್ದಾರಿಯಲ್ಲಿ ನಿತ್ಯ ದಟ್ಟಣೆ ಉಂಟಾಗುತ್ತಿದೆ.

ತಾಲ್ಲೂಕು ಕಚೇರಿ ಎದುರು ರಸ್ತೆಯ ಎರಡೂ ಬದಿಯಲ್ಲಿ ದ್ವಿಚಕ್ರ ವಾಹನಗಳನ್ನು ಅಡ್ಡಾದಿಡ್ಡಿಯಾಗಿ ನಿಲ್ಲಿಸಲಾಗುತ್ತದೆ. ರಸ್ತೆ ಒಂದು ಬದಿ ಮಾತ್ರ (ಪ್ರತಿ ದಿನ ಬದಲಾಗುತ್ತದೆ) ವಾಹನ ನಿಲ್ಲಿಸುವ ಸೂಚನೆ ಇದ್ದರೂ, ಅದನ್ನು ಯಾರೂ ಪಾಲಿಸುತ್ತಿಲ್ಲ.  ಕೆ.ಎಲ್.ವಿ.ವೃತ್ತದಿಂದ ವಿಜಯಲಕ್ಷ್ಮಿ ಟಾಕೀಸ್ ತನಕ ’ವಾಹನ ನಿಲುಗಡೆ ನಿಷೇಧಿತ ವಲಯ’ವಾಗಿ ಗುರುತಿಸಿ ಆರು ತಿಂಗಳು ಕಳೆದಿವೆ. ಆದರೆ, ಈ ಜಾಗದಲ್ಲೇ ಗರಿಷ್ಠ ಸಂಖ್ಯೆಯಲ್ಲಿ ವಾಹನಗಳನ್ನು ನಿಲ್ಲಿಸಲಾಗಿರುತ್ತದೆ. 

ಪುರಸಭೆ ಕಚೇರಿಯಿಂದ ಬಸ್ ನಿಲ್ದಾಣದವರೆಗೆ ಜೋಡಿ ರಸ್ತೆಯ ಒಂದು ಬದಿಯಲ್ಲಿ ದಿನವಿಡೀ ತಳ್ಳುಗಾಡಿಗಳನ್ನು ನಿಲ್ಲಿಸಲಾಗುತ್ತದೆ. ಈ‌ ರಸ್ತೆಯಲ್ಲಿ ಪುರಸಭೆ, ಸಾರಿಗೆ ಸಂಸ್ಥೆ ಮಳಿಗೆಗಳಿವೆ. ಈ ಮಳಿಗೆಗಳ ಮುಂದೆ ವಾಹನ ನಿಲುಗಡೆ ಜಾಗದಲ್ಲಿ ಈ ತಳ್ಳುಗಾಡಿಗಳು ನಿಂತಿರುತ್ತವೆ. ಇದರಿಂದ ಇಲ್ಲಿ ಬೇರೆ ವಾಹನಗಳನ್ನು ನಿಲುಗಡೆ ಮಾಡಲು ತೊಂದರೆಯಾಗಿದೆ.

ಪಟ್ಟಣದ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು ಮುಂಭಾಗದಲ್ಲಿರುವ ’ವಾಹನ ನಿಲುಗಡೆ ನಿಷೇಧ’ ಫಲಕದ ಎದುರೇ ವಾಹನಗಳು ಸಾಲುಗಟ್ಟಿ ನಿಲ್ಲುತ್ತವೆ. ಮೆಸ್ಕಾಂ ಕಚೇರಿ ಮುಂದೆ ಪ್ರತಿ ದಿನ ಕ್ರೇನ್‌ಗಳು ರಸ್ತೆ ಬದಿ ನಿಂತಿರುತ್ತವೆ.

ಪಟ್ಟಣದ ಪ್ರಮುಖ ರಸ್ತೆಯೊಂದರಲ್ಲಿ ಸರ್ಕಾರದ  ಮಳಿಗೆಗಳನ್ನು ₹15 ರಿಂದ ₹20 ಸಾವಿರದವರೆಗೆ  ಬಾಡಿಗೆಗೆ ನೀಡಲಾಗಿದೆ. ಈ ಮಳಿಗೆಗಳ ಮುಂದೆ ತಳ್ಳುಗಾಡಿಗಳಲ್ಲಿ ವ್ಯಾಪಾರ ಮಾಡುವವರು ದಿನಕ್ಕೆ ₹300ರಂತೆ ಮಳಿಗೆಯವರಿಗೆ ಬಾಡಿಗೆ ಪಾವತಿಸುವುದು ರಹಸ್ಯವಾಗಿ ಉಳಿದಿಲ್ಲ. ಕೆಲವು ಮಳಿಗೆ ಮುಂದೆ ಎರಡೆರಡು ತಳ್ಳು ಗಾಡಿಗಳು ನಿಂತಿರುತ್ತವೆ. ಈ ತಳ್ಳುಗಾಡಿಗಳಲ್ಲಿ ವ್ಯಾಪಾರ ಮಾಡುವರು ಉಳಿಸಿ ಹೋಗುವ ಕಸವನ್ನು ಪುರಸಭೆ ಸಿಬ್ಬಂದಿ ಸ್ವಚ್ಛಗೊಳಿಸುತ್ತಾರೆ. ತಳ್ಳುಗಾಡಿಗಳಿಂದ ಆಹಾರ ಸೇವಿಸಲು ಬರುವವರು ತಮ್ಮ ವಾಹನಗಳನ್ನು ರಸ್ತೆಯಲ್ಲೇ  ನಿಲ್ಲಿಸುವುದರಿಂದ ಸಂಚಾರ ದುಸ್ಥರವಾಗಿದೆ.