ಚಿತ್ರದುರ್ಗ: ಜಿಲ್ಲೆಯಲ್ಲಿ ಐದು ವರ್ಷದ ಒಳಗಿನ 1.5 ಲಕ್ಷ ಮಕ್ಕಳಿದ್ದು, ಜ.31ರಿಂದ ಫೆ.3ರವರೆಗೆ ಎಲ್ಲರಿಗೂ ಪಲ್ಸ್‌ ಪೊಲಿಯೊ ಲಸಿಕೆ ನೀಡಲಾಗುವುದು ಎಂದು ಜಿಲ್ಲಾಧಿಕಾರಿ ಕವಿತಾ ಎಸ್.ಮನ್ನಿಕೇರಿ ತಿಳಿಸಿದರು.
ಜಿಲ್ಲಾಧಿಕಾರಿ ಕಚೇರಿಯಲ್ಲಿ ಸೋಮವಾರ ನಡೆದ ಜಿಲ್ಲಾಮಟ್ಟದ ಚಾಲನಾ ಸಮಿತಿ ಸಭೆಯ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.
‘ಜಿಲ್ಲೆಯ ಗ್ರಾಮೀಣ ಪ್ರದೇಶದಲ್ಲಿ 1,17,515 ಹಾಗೂ ನಗರ ಪ್ರದೇಶದಲ್ಲಿ 34,337 ಮಕ್ಕಳಿದ್ದಾರೆ. ಇದಕ್ಕಾಗಿ 2,318 ಲಸಿಕಾ ಕಾರ್ಯಕರ್ತರು ಹಾಗೂ 240 ಮೇಲ್ವಿಚಾರಕರನ್ನು ನಿಯೋಜಿಸಲಾಗಿದೆ. 1,159 ತಂಡಗಳು ಹಾಗೂ 1,084 ಲಸಿಕಾ ಕೇಂದ್ರಗಳನ್ನು ಸ್ಥಾಪಿಸಲಾಗಿದೆ’ ಎಂದರು.
ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣಾಧಿಕಾರಿ ಡಾ.ಸಿ.ಎಲ್‌.ಫಾಲಾಕ್ಷ ಮಾತನಾಡಿ, ‘ಮೊದಲ ದಿನ ಬೂತ್ ಮಟ್ಟದ ಲಸಿಕಾ ಕೇಂದ್ರಗಳಲ್ಲಿಯೇ ಮಕ್ಕಳಿಗೆ ಪೊಲಿಯೊ ಲಸಿಕೆ ಹಾಕಲಾಗುವುದು. ಫೆ.1 ,2 ಹಾಗೂ 3ರಂದು ಉಳಿದ ಎಲ್ಲ ಮಕ್ಕಳ ಮನೆಗೆ ಭೇಟಿ ನೀಡಿ ಲಸಿಕೆ ನೀಡಲಾಗುವುದು’ ಎಂದು ಹೇಳಿದರು.
***
ಕೋವಿಡ್‌ ಲಸಿಕೆಗೆ ಜಿಲ್ಲೆಯಲ್ಲಿ 13,104 ಜನರು ನೋಂದಣಿಯಾಗಿದ್ದಾರೆ. ಈ ಪೈಕಿ 7,949 ಫಲಾನುಭವಿಗಳು ಲಸಿಕೆ ಪಡೆದಿದ್ದಾರೆ. 5,155 ಜನರಿಗೆ ಲಸಿಕೆ ನೀಡುವುದು ಬಾಕಿ ಇದೆ. –ಡಾ.ಕುಮಾರಸ್ವಾಮಿ,ಆರ್‌ಸಿಎಚ್‌ ಅಧಿಕಾರಿ
