ಚಳ್ಳಕೆರೆ: ಅಘೋಷಿತ ಲಾಕ್‍ಡೌನ್‌: ಕಲ್ಲಂಗಡಿ ಬೆಳೆಗಾರ ಕಂಗಾಲು

ತಾಲ್ಲೂಕಿನ ಸೂರನಹಳ್ಳಿ ಗ್ರಾಮದ ರೈತ ನರಸಿಂಹಪ್ಪ, ಪಾರಂಪರಿಕ ಹಾಗೂ ಕೊಳವೆಬಾವಿಯಲ್ಲಿ ಲಭ್ಯವಾದ ನೀರಿಗೆ ಡ್ರಿಪ್ ಅಳವಡಿಸಿಕೊಂಡು ಮಲ್ಚಿಂಗ್ ಪೇಪರ್ ವಿಧಾನದ ಮೂಲಕ 4 ಎಕರೆ ಕೆಂಪುಮಣ್ಣಿನ ಪ್ರದೇಶಕ್ಕೆ 50 ಲೋಡ್ ಕೊಟ್ಟಿಗೆ ಗೊಬ್ಬರ ಹಾಕಿ ಕಲ್ಲಂಗಡಿಯನ್ನು ಉತ್ತಮ ಇಳುವರಿಯಲ್ಲಿ ಬೆಳೆದಿದ್ದರು.

ಕಲ್ಲಂಗಡಿ ದುಂಡಾದ ಗಾತ್ರ ಹೊಂದಿದ್ದು, ಪ್ರತಿ ಹಣ್ಣು ಕನಿಷ್ಠ 3 ಕೆ.ಜಿ.ಯಿಂದ 12–13 ಕೆ.ಜಿ. ವರೆಗೂ ತೂಕ ಬಂದಿದೆ. ಬೆಳೆ ಚೆನ್ನಾಗಿ ಬಂದಿದ್ದರಿಂದ ತುಮಕೂರು ಮತ್ತು ಸ್ಥಳೀಯ ವ್ಯಾಪಾರಸ್ಥರು ಬೆಳೆಗಾರರ ಹೊಲಕ್ಕೆ ಹೋಗಿ ಕೆ.ಜಿ.ಗೆ ₹ 8ರಿಂದ ₹ 9ರಂತೆ ಎರಡು ಬಾರಿ ಹಣ್ಣನ್ನು ಖರೀದಿ ಮಾಡಿದ್ದರು. ಬೆಳೆಯಿಂದ ₹ 2 ಲಕ್ಷ ಆದಾಯ ಪಡೆದಿದ್ದರು. ಲಾಕ್‍ಡೌನ್ ಪರಿಣಾಮ ಖರೀದಿದಾರರು ಕರೆ ಸ್ವೀಕರಿಸುತ್ತಿಲ್ಲ.

‘ಕಟಾವಿಗೆ ಬಂದಿರುವ 30 ಟನ್ ಕಲ್ಲಂಗಡಿ ಹಣ್ಣು ಬಳ್ಳಿಯಲ್ಲೇ ಇದೆ. ಎರಡು ಟನ್ ಕಿತ್ತು ಹೊಲದಲ್ಲಿ ರಾಶಿ ಹಾಕಲಾಗಿದೆ. ಬೇಸಾಯ, ಗೊಬ್ಬರ, ಕೂಲಿ, ಡ್ರಿಪ್ ಹಾಗೂ ಮಲ್ಚಿಂಗ್ ಸೇರಿ ₹ 6 ಲಕ್ಷ ಬೆಳೆಗೆ ಖರ್ಚು ಮಾಡಿದ್ದೇನೆ. ಇದರಲ್ಲಿ ₹ 2 ಲಕ್ಷ ಮಾತ್ರವೇ ಬಂದಿದೆ. ಮುಂದಿನ ದಾರಿ ತೋಚದಾಗಿದೆ’ ಎಂದು ಬೆಳೆಗಾರ ನರಸಿಂಹಪ್ಪ ಅಳಲು ತೋಡಿಕೊಂಡರು.

‘ಲಾಕ್‍ಡೌನ್‍ನಿಂದ ಬೆಳೆನಷ್ಟ ಅನುಭವಿಸಿದ ರೈತರಿಗೆ ವಿಶೇಷ ಪ್ಯಾಕೇಜ್‌ಅನ್ನು ಸರ್ಕಾರ ಕೂಡಲೇ ಜಾರಿಗೆ ತರಬೇಕು’ ಎಂದು ರೈತ ಮುಖಂಡ ಬೇಡರೆಡ್ಡಿಹಳ್ಳಿ ವೀರಣ್ಣ ಒತ್ತಾಯಿಸಿದರು.

ಮಾರಾಟ ಮಾಡಲು ಮನವಿ: ‘ಹುಲಿಕುಂಟೆ, ರಾಮಜೋಗಿಹಳ್ಳಿ, ಬುಕ್ಕಂಬೂದಿ, ಪುರ್ಲೆಹಳ್ಳಿ, ಸಾಣಿಕೆರೆ, ಜಾಜೂರು, ತಳಕು ಮುಂತಾದ ಗ್ರಾಮದಲ್ಲಿ ಕಲ್ಲಂಗಡಿ 160 ಹಾಗೂ ಕರಬೂಜ 80 ಹೆಕ್ಟೇರ್ ಸೇರಿ ತಾಲ್ಲೂಕಿನಲ್ಲಿ ಒಟ್ಟು 240 ಹೆಕ್ಟೇರ್ ಪ್ರದೇಶದಲ್ಲಿ ಹಣ್ಣುಗಳನ್ನು ಉತ್ತಮವಾಗಿ ಬೆಳೆಯಲಾಗಿದೆ. ಈಗ ಕೊರೊನಾ ಎರಡನೇ ಅಲೆ ವ್ಯಾಪಿಸಿದೆ. ಲಾಕ್‍ಡೌನ್ ಮಾದರಿಯ ನಿರ್ಬಂಧ 3-4 ತಿಂಗಳು ಮುಂದುವರಿಯುವ ಸಾಧ್ಯತೆ ಇದೆ. ಹೆಚ್ಚಿನ ಪ್ರಮಾಣದಲ್ಲಿ ಮಳೆ ಬಿದ್ದರೆ ತೊಂದರೆಯಾಗುತ್ತದೆ. ಹಾಗಾಗಿ ಫಲಕ್ಕೆ ಬಂದ ಬೆಳೆಯನ್ನು ಕೂಡಲೇ ಕಟಾವ್ ಮಾಡಿ ಸ್ಥಳೀಯವಾಗಿ ಮಾರಾಟ ಮಾಡಬೇಕು’ ಎಂದು ತೋಟಗಾರಿಕಾ ಹಿರಿಯ ಸಹಾಯಕ ನಿರ್ದೇಶಕ ಡಾ. ವಿರೂಪಾಕ್ಷಪ್ಪ ತಿಳಿಸಿದ್ದಾರೆ.