ಲಾಕ್‌ಡೌನ್‌ ನಂತರ ಚಿರತೆ ಓಡಾಟ ಹೆಚ್ಚಳ

ಪ್ರಮುಖವಾಗಿ ಮಂಗಳೂರು ಅರಣ್ಯ ವಲಯದಲ್ಲಿ ಇದೀಗ ಚಿರತೆಗಳು ಕಾಣಿಸಿಕೊಂಡಿರುವ ಪ್ರಕರಣಗಳು ಹೆಚ್ಚಾಗುತ್ತಿವೆ. ಯಡಪದವು, ಕುಪ್ಪೆಪದವು, ಮಿಜಾರು, ಗಂಜಿಮಠ ಹಾಗೂ ಮಂಗಳೂರು ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣಗಳ ಸುತ್ತ ಒಟ್ಟು 8 ಚಿರತೆಗಳ ಓಡಾಡುತ್ತಿವೆ ಎನ್ನುವ ಶಂಕೆ ಅರಣ್ಯ ಇಲಾಖೆಯದ್ದು.

ಲಾಕ್‌ಡೌನ್‌ ಸಮಯದಲ್ಲಿ ರಸ್ತೆಗಳು ಖಾಲಿ ಇರುತ್ತಿದ್ದವು. ಜನವಸತಿ ಪ್ರದೇಶಗಳಲ್ಲಿ ನಾಯಿ, ಇತರ ಪ್ರಾಣಿಗಳು ಸುಲಭವಾಗಿ ಸಿಗುತ್ತಿದ್ದುದರಿಂದ ಆಹಾರ ಹುಡುಕಿಕೊಂಡು ಜನವಸತಿ ಪ್ರದೇಶಗಳತ್ತ ಚಿರತೆಗಳು ನಿರ್ಭಯದಿಂದ ಬರುತ್ತಿದ್ದವು. ಈಗಲೂ ಅದನ್ನೇ ಮುಂದುವರಿಸಿರುವ ಸಾಧ್ಯತೆ ಇದೆ ಎಂದು ಮಂಗಳೂರು ವಲಯ ಅರಣ್ಯಾಧಿಕಾರಿ ಪ್ರಶಾಂತ್‌ ಪೈ ತಿಳಿಸಿದ್ದಾರೆ.

ಕೋವಿಡ್–19ಗಿಂತ ಮೊದಲು ಮಂಗಳೂರು ವಲಯದಲ್ಲಿ ಎರಡು ಚಿರತೆಗಳು ಮಾತ್ರ ಕಾಣಿಸಿಕೊಂಡಿದ್ದವು. ಆದರೆ, ಇದೀಗ 8 ಚಿರತೆಗಳು ಓಡಾಡುತ್ತಿರುವ ಶಂಕೆ ಇದೆ. 15 ದಿನಗಳಲ್ಲಿ ಕುಪ್ಪೆಪದವು ಹಾಗೂ ಮಿಜಾರು ಪ್ರದೇಶದಲ್ಲಿ ನಿತ್ಯ ನಾಯಿಗಳು ಸತ್ತಿರುವ ಪ್ರಕರಣ ವರದಿಯಾಗುತ್ತಿವೆ. ಇದು ಚಿರತೆಗಳ ಓಡಾಟಕ್ಕೆ ಪುಷ್ಟಿ ನೀಡುತ್ತಿದೆ.

ತ್ಯಾಜ್ಯವೂ ಕಾರಣ: ರಸ್ತೆ ಬದಿಯಲ್ಲಿ ತ್ಯಾಜ್ಯ ಸುರಿಯುತ್ತಿರುವುದು ಹೆಚ್ಚಾಗಿದೆ. ಇದರಿಂದ ಬೀದಿ ನಾಯಿಗಳು ಹಾಗೂ ಕಾಡು ಹಂದಿಗಳ ಸಂಖ್ಯೆಯೂ ವೃದ್ಧಿಸಿದೆ. ಹಾಗಾಗಿ ನಾಯಿ, ಹಂದಿಗಳನ್ನು ಬೇಟೆಯಾಡಲು ಚಿರತೆಗಳು ಬರುತ್ತಿವೆ.

‘ಅರಣ್ಯ ಇಲಾಖೆ ಚಿರತೆಗಳ ಬಗ್ಗೆ ಗಂಭೀರವಾಗಿ ಕ್ರಮ ಕೈಗೊಂಡಿದ್ದು, ಹಲವೆಡೆ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದಾಗ ಚಿರತೆಗಳ ಓಡಾಟ ಕಂಡು ಬಂದಿದೆ. ಎಲ್ಲೆಲ್ಲಿ ಚಿರತೆಗಳು ಓಡಾಡುತ್ತವೆಯೋ ಅಂತಹ ಕಡೆಗಳಲ್ಲಿ ಬೋನುಗಳನ್ನು ಇಡಲಾಗಿದೆ. ತಿಂಗಳ ಹಿಂದೆ ತೋಡಾರು ಬಳಿ ಚಿರತೆಯೊಂದನ್ನು ಹಿಡಿದು, ಕಾಡಿಗೆ ಬಿಡಲಾಗಿತ್ತು’ ಎಂದು ಪ್ರಶಾಂತ್‌ ಪೈ ತಿಳಿಸಿದ್ದಾರೆ.

ವಿಮಾನ ನಿಲ್ದಾಣದಲ್ಲಿ ಹೆಚ್ಚುವರಿ ಬೋನು: ಬುಧವಾರ ಮಂಗಳೂರು ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ಅಧಿಕಾರಿಗಳೊಂದಿಗೆ ಅರಣ್ಯ ಇಲಾಖೆಯ ಅಧಿಕಾರಿಗಳು ಸಭೆ ನಡೆಸಿದ್ದಾರೆ. ಈಗಾಗಲೇ ಐದು ಬೋನುಗಳನ್ನು ಇಡಲಾಗಿದ್ದು, ಹೆಚ್ಚುವರಿಯಾಗಿ ಇನ್ನೂ ಐದು ಬೋನುಗಳನ್ನು ಇಡಲು ನಿರ್ಧರಿಸಲಾಗಿದೆ.

ಈಚೆಗೆ ಕುಂಪಲದಲ್ಲೂ ಚಿರತೆ ಕಾಣಿಸಿಕೊಂಡಿರುವುದಾಗಿ ಸ್ಥಳೀಯರು ತಿಳಿಸಿದ್ದಾರೆ. ಜನರ ದೂರಿನಂತೆ ಅರಣ್ಯ ಇಲಾಖೆ ಅಧಿಕಾರಿಗಳು ಬೋನು ಇಟ್ಟಿದ್ದಾರೆ. ಆದರೆ, ಚಿರತೆಯ ಸುಳಿವು ಪತ್ತೆ ಆಗಿಲ್ಲ.