ಮಂಗಳೂರು: ನಗರದ ಬಳ್ಳಾಲಬಾಗ್‌ನಲ್ಲಿ ರಸ್ತೆ ವಿಭಜಕವನ್ನು ಹಾರಿ ಇನ್ನೊಂದು ಬದಿಗೆ ಬಂದ ಬಿಎಂಡಬ್ಲ್ಯು ಕಾರು, ಎದುರಿನಿಂದ ಬರುತ್ತಿದ್ದ ಕಾರುಗಳು ಹಾಗೂ ದ್ವಿಚಕ್ರ ವಾಹನಗಳಿಗೆ ಡಿಕ್ಕಿ ಹೊಡೆದಿದೆ.
ಘಟನೆಯಲ್ಲಿ ಮಹಿಳೆಯೊಬ್ಬರಿಗೆ ಗಂಭೀರ ಗಾಯಗಳಾಗಿವೆ. ಬಿಎಂಡಬ್ಲ್ಯು ಕಾರಿನ ಚಾಲಕ ಮತ್ತಿನಲ್ಲಿದ್ದು, ಅತಿ ವೇಗವಾಗಿ ಚಲಾಯಿಸಿಕೊಂಡು ಬರುತ್ತಿದ್ದ. ಕಾರು ನಿಯಂತ್ರಣಕ್ಕೆ ಬರದೇ, ವಿಭಜಕದ ಮೇಲೇರಿ, ಇನ್ನೊಂದು ಬದಿಯಲ್ಲಿ ಬರುತ್ತಿದ್ದ ಕಾರುಗಳಿಗೆ ಡಿಕ್ಕಿ ಹೊಡೆದಿದೆ.
ಶನಿವಾರ ಮಧ್ಯಾಹ್ನ ಈ ರಸ್ತೆಯಲ್ಲಿ ವಾಹನಗಳ ದಟ್ಟಣೆ ಹೆಚ್ಚಾಗಿತ್ತು. ಅಪಘಾತದಲ್ಲಿ ಹಲವು ವಾಹನಗಳಿಗೆ ಹಾನಿಯಾಗಿದ್ದು, ಸ್ಥಳದಲ್ಲಿದ್ದ ಜನರು ಬಿಎಂಡಬ್ಲ್ಯು ಕಾರಿನ ಚಾಲಕನನ್ನು ಥಳಿಸಿದರು.
ಸಂಚಾರ ಪೊಲೀಸರು ಬಿಎಂಡಬ್ಲ್ಯು ಕಾರಿನ ಚಾಲಕನನ್ನು ವಶಕ್ಕೆ ಪಡೆದಿದ್ದು, ವಿಚಾರಣೆ ನಡೆಸುತ್ತಿದ್ದಾರೆ. ಅಪಘಾತದ ದೃಶ್ಯಗಳು ಸಿಸಿಟಿವಿ ಕ್ಯಾಮೆರಾದಲ್ಲಿ ದಾಖಲಾಗಿವೆ.
