ದಾವಣಗೆರೆ: ಅಡಿಕೆ ದರ ಕೊಂಚ ಏರಿಕೆಯಾಗಿದ್ದು, ಬೆಳೆಗಾರರಲ್ಲಿ ಮಂದಹಾಸ ಮೂಡಿದೆ. ಸದ್ಯ ಕೆಂಪಡಿಕೆ ದರ ಕ್ವಿಂಟಲ್‌ಗೆ ₹49,000ಕ್ಕೆ ಏರಿಕೆ ಕಂಡಿದೆ. ಎರಡು ತಿಂಗಳಲ್ಲಿ ಒಂದು ಕ್ವಿಂಟಲ್‌ಗೆ ₹1,500ದಷ್ಟು ಹೆಚ್ಚಾಗಿದೆ.
ಜನವರಿ, ಫೆಬ್ರುವರಿಯಲ್ಲಿ ಅಡಿಕೆ ದರ ₹47,000ದಿಂದ ₹48,000 ಇತ್ತು. ಏಪ್ರಿಲ್‌, ಮೇ ತಿಂಗಳಲ್ಲಿ ಅಡಿಕೆ ದರ ಏರಿಕೆಯಾಗುವುದು ಸಾಮಾನ್ಯ.
ಕಳೆದ ವರ್ಷದ ಸೆಪ್ಟೆಂಬರ್‌ ಹೊತ್ತಿಗೆ ಕ್ವಿಂಟಲ್‌ಗೆ ₹58,000ಕ್ಕೆ ಏರಿಕೆಯಾಗಿದ್ದ ಅಡಿಕೆ ದರ ಡಿಸೆಂಬರ್‌ ಹೊತ್ತಿಗೆ ಒಮ್ಮೆಲೇ ₹19,000ರಷ್ಟು ಕುಸಿತ ಕಂಡು ₹39,000ಕ್ಕೆ ಬಂದಿತ್ತು.
‘ಸೆಪ್ಟೆಂಬರ್‌ವರೆಗೂ ದರದಲ್ಲಿ ಏರಿಳಿತ ಇರುತ್ತದೆ. ದರ ₹49,000ರ ಆಸುಪಾಸಿನಲ್ಲೇ ಇರುವ ಸಾಧ್ಯತೆ ಇದೆ. ಶಿವಮೊಗ್ಗ, ಚಿತ್ರದುರ್ಗ, ದಾವಣಗೆರೆ ಭಾಗದಲ್ಲಿ ಕೆಂಪಡಿಕೆ ದರ ಇದೇ ರೀತಿಯಲ್ಲಿ ಏರಿಕೆ ಕಾಣುವ ನಿರೀಕ್ಷೆ ಇದೆ’ ಎಂದು ತೋಟ ಉತ್ಪನ್ನಗಳ ಮಾರಾಟ ಸಹಕಾರ ಸಂಘದ (ತುಮ್ಕೋಸ್‌) ಅಧ್ಯಕ್ಷ ಆರ್‌.ಎಂ. ರವಿ ಹೇಳಿದರು.
