ತೊಗರಿ ಖರೀದಿಗೆ ಆಗ್ರಹಿಸಿ ರೈತರಿಂದ ಅನಿರ್ದಿಷ್ಟಾವಧಿ ಧರಣಿ

ಪಟ್ಟಣದ ಬಸವೇಶ್ವರ ವೃತ್ತದಲ್ಲಿ ಜಮಾಯಿಸಿದ ರೈತರು ಸರ್ಕಾರದ ವಿರುದ್ಧ ಘೋಷಣೆ ಕೂಗುತ್ತ ಮೆರವಣಿಗೆ ಮೂಲಕ ಮಿನಿ ವಿಧಾನಸೌಧಕ್ಕೆ ತೆರಳಿ ಧರಣಿ ಕುಳಿತರು.
ಮುಖಂಡ ಸಂಗನಗೌಡ ಚಿಕ್ಕೊಂಡ, ಪುರಸಭೆ ಸದಸ್ಯ ನೀಲಪ್ಪ ನಾಯಕ ಮಾತನಾಡಿ, ‘ಬೆಂಬಲ ಬೆಲೆ ತೊಗರಿ ಖರೀದಿಯನ್ನು ಸ್ಥಗಿತಗೊಳಿಸಿರುವುರಿಂದ ರೈತರಿಗೆ ಅನ್ಯಾಯವಾಗಿದೆ. ಸಾಕಷ್ಟು ಸಂಖ್ಯೆಯ ರೈತರು ತೊಗರಿ ಖರೀದಿಗಾಗಿ ಹೆಸರು ನೋಂದಾಯಿಸಿದ್ದಾರೆ. ಬೆಂಬಲ ಬೆಲೆ ಖರೀದಿ ಕೇಂದ್ರದಲ್ಲಿ ತೊಗರಿ ಮಾರಾಟ ಮಾಡಿದರೆ ಒಂದಷ್ಟು ಲಾಭವಾಗುತ್ತದೆ ಎಂಬ ಆಶಾಭಾವನೆಯಲ್ಲಿದ್ದ ರೈತರಿಗೆ ಇದರಿಂದ ನಿರಾಸೆಯಾಗಿದೆ’ ಎಂದು ಹೇಳಿದರು.

‘ಸರ್ಕಾರ ರೈತರು ಎದುರಿಸುತ್ತಿರುವ ಕಷ್ಟವನ್ನು ಅರಿತುಕೊಂಡು ಶೀಘ್ರ ತೊಗರಿ ಖರೀದಿ ಪುನರ್‌ ಆರಂಭಿಸಬೇಕು. ನಮ್ಮ ಬೇಡಿಕೆ ಈಡೇರುವವರೆಗೆ ಧರಣಿ ಮುಂದುವರೆಯುತ್ತದೆ’ ಎಂದರು.

ಧರಣಿಯಲ್ಲಿ ಬಸಪ್ಪ ಚೌಧರಿ, ಮಹಾಂತೇಶ ಬೆಲ್ಲದ, ಈರಪ್ಪ ಪಾಂಡು, ಈರನಗೌಡ ಪಾಟೀಲ, ಪರಸು ಗಬ್ಬೂರ, ಉಮಲು ಈಸೂರ, ಸಂಗಪ್ಪ ಚೌರಿ, ಭೂತಾಳಿ ಡೋಣೂರ, ರವಿ ಬೆಲ್ಲದ, ಆರ್‌.ಎಚ್‌.ಮಠಪತಿ, ಸಂಜೀವ ಪವಾರ, ಸಾಬಣ್ಣ ಕುಂಬಾರ, ಮಾರುತಿ ನಿಕ್ಕಂ, ಮಹಾಂತೇಶ ಪೂಜಾರಿ, ಮುದಕಪ್ಪ ಕುಳಗೇರಿ, ವೀರೇಶ ಹಿರೇಮಠ, ರಾಮಣ್ಣ ನಾಯ್ಕೋಡಿ, ಮಲ್ಲು ಅವಟಿ, ಪ್ರವೀಣ ಪವಾರ, ಪಾವಡೆಪ್ಪ ನಾಯ್ಕೋಡಿ, ನಿಂಗು ಕುಳಗೇರಿ, ಯಾಸೀನ ಹವಾಲ್ದಾರ ಇತರರು ಭಾಗವಹಿಸಿದ್ದರು.