ಮೆಟ್ರಿಕ್ ಪೂರ್ವ ಬಾಲಕರ ವಿದ್ಯಾರ್ಥಿ ನಿಲಯ | ಸಮಸ್ಯೆ ಹಲವು: ಪರಿಹಾರ ಶೂನ್ಯ

ಇದು ಕುಂದಗೋಳದಲ್ಲಿನ ಬಾಡಿಗೆ ಕಟ್ಟಡದಲ್ಲಿರುವ ಹಿಂದುಳಿದ ವರ್ಗಗಳ ಕಲ್ಯಾಣ ಇಲಾಖೆಯ ದೇವರಾಜ ಅರಸು ಮೆಟ್ರಿಕ್ ಪೂರ್ವ ಬಾಲಕರ ವಿದ್ಯಾರ್ಥಿ ನಿಲಯದ ಸ್ಥಿತಿ.

ಈ ವಸತಿ ನಿಲಯಕ್ಕೆ ಸ್ವಂತ ಕಟ್ಟಡವಿಲ್ಲ. ಸುಮಾರು 10 ವರ್ಷಗಳಿಂದ ಬಾಡಿಗೆ ಕಟ್ಟಡದಲ್ಲಿಯೇ ನಡೆಯುತ್ತಿದೆ. ವಸತಿ ನಿಲಯದ ಬಾಡಿಗೆ ತಿಂಗಳಿಗೆ ₹9,800. 5ನೇ ತರಗತಿಯಿಂದ 10ನೇ ತರಗತಿಯ ಒಟ್ಟು 45 ವಿದ್ಯಾರ್ಥಿಗಳು ಮೂರು ಕೊಠಡಿಗಳಲ್ಲಿದ್ದಾರೆ.

ಕೊಠಡಿಗಳು ನೋಡಲು ಪುಟ್ಟ ಗೋದಾಮಿನಂತಿವೆ. ಈ ಬಾಡಿಗೆ ಕಟ್ಟಡದಲ್ಲಿ ವಿದ್ಯಾರ್ಥಿಗಳು ಇರಲು ಮೂರು ಕೊಠಡಿಗಳು, ಒಂದು ಊಟದ ಹಾಲ್, ಪುಟ್ಟ ಅಡುಗೆ ಕೋಣೆ, ರೇಷನ್ ಇಡಲು ಒಂದು, ವಾರ್ಡನ್ ಇರಲು ಒಂದು ಪುಟ್ಟ ಕೊಠಡಿಗಳಿವೆ.

ಮಕ್ಕಳ ಭದ್ರತೆಗೆ, ಅಪರಿಚಿತರ ಚಲನವಲನ ಗಮನಿಸಲು ಅಳವಡಿಸಿರುವ ಸಿಸಿ ಟಿವಿ ಕ್ಯಾಮೆರಾ ಕೂಡ  ಕಾರ್ಯನಿರ್ವಹಿಸುತ್ತಿಲ್ಲ. ಕಿಟಕಿಗೆ ಜೋಡಿಸಿದ್ದ ಸೊಳ್ಳೆ ತಡೆಯುವ ಪರದೆಯು ಹರಿದಿದೆ. ಕಿಟಕಿಯ ಮೇಲಿನ ತಗಡು ಜೋತು ಬಿದ್ದು ಮಕ್ಕಳಿಗೆ ಚುಚ್ಚುವ ಸಂಭವವಿದೆ. ಅಡುಗೆ ಕೋಣೆಯಲ್ಲಿರುವ ಫ್ರಿಡ್ಜ್ ಬಳಕೆಯಾಗಿ ಬಹಳ ದಿನಗಳಾಗಿದ್ದು ಅದು ‘ಹಲ್ಲಿ’ಯ ವಾಸಸ್ಥಾನವಾಗಿದೆ. ಊಟ ಮಾಡುವ ಹಾಲ್‌ನ ಮೇಲ್ಛಾವಣಿಯ ತಗಡು ಬಿರುಕು ಬಿಟ್ಟಿದೆ. ವಸತಿ ನಿಲಯದ ಮುಂದೆ ಒಂದು ಗುಂಡಿಯಿದ್ದು ಅಕ್ಕ ಪಕ್ಕದ ಮನೆಯವರು ಮತ್ತು ವಿದ್ಯಾರ್ಥಿಗಳೂ ಎಸೆದ ಕಸದಿಂದ, ಮಳೆ ನೀರಿನಿಂದ ತುಂಬಿದೆ.

ವಿದ್ಯಾರ್ಥಿಗಳ ವಸ್ತುಗಳನ್ನು ಇಟ್ಟುಕೊಳ್ಳುವ ಟ್ರಂಕ್‌ಗಳಲ್ಲಿ ಅನುಪಯುಕ್ತ ವಸ್ತುಗಳನ್ನು ಇಡಲು ಬಳಸಲಾಗುತ್ತಿದೆ.  ಕೆಲವೊಂದಕ್ಕೆ ಬೀಗ ಹಾಕುವ ವ್ಯವಸ್ಥೆಯೇ ಇಲ್ಲ. ವಿದ್ಯಾರ್ಥಿಗಳು ಬಳಸುವ ಬೆಡ್ ಮತ್ತು ಚಾದರು, ಸೊಳ್ಳೆ ಪರದೆ ಹಳೆಯದಾಗಿದ್ದು ಗಲೀಜಾಗಿವೆ. ವಿದ್ಯಾರ್ಥಿಗಳ ಕೊಠಡಿಯಲ್ಲಿ ತ್ಯಾಜ್ಯ ಸಂಗ್ರಹದ ಡಬ್ಬಿಗಳಿಲ್ಲ. ಪುಸ್ತಕ, ಬ್ಯಾಗ್ ಇಡಲು ರ‍್ಯಾಕ್ ವ್ಯವಸ್ಥೆಯಿಲ್ಲ. ಕುರ್ಚಿ, ಟೇಬಲ್‌ಗಳಂತೂ ಇಲ್ಲಿ ಕಾಣುವುದಿಲ್ಲ. ಗ್ಯಾಸ್ ಸಿಲಿಂಡರ್‌ಗಳನ್ನು ವಸತಿ ನಿಲಯದ ರೂಮಿನೊಳಗಡೆ ಇಡಲಾಗಿದೆ. ನಾಲ್ಕನೇ ಶನಿವಾರ ಮಕ್ಕಳಿಗೆ ಊಟಕ್ಕೆ ಗೋಧಿ ಹುಗ್ಗಿ ನೀಡಲಾಗುವುದು ಎಂದು ಮೆನು ಚಾರ್ಟಲ್ಲಿ ಮಾಹಿತಿ ಇದ್ದರೂ ಊಟಕ್ಕೆ ಅದನ್ನು ನೀಡಲಾಗುತ್ತಿಲ್ಲ.

‘ರಾತ್ರಿ ಸೊಳ್ಳೆಗಳ ಕಾಟ ಜಾಸ್ತಿ, ಸೊಳ್ಳೆ ಬತ್ತಿಯ ವಾಸನೆಯಿಂದ ಕಿರಿಕಿರಿಯಾಗುತ್ತಿದೆ. ಮಳೆ ಬಂದರೆ ಊಟದ ಹಾಲ್ ನೀರಿನಿಂದ ತುಂಬುತ್ತದೆ. ಕೆಲವೊಮ್ಮೆ ಬಾಗಿಲು ಕಿಂಡಿಯಲ್ಲಿ ಮಳೆ ನೀರು ನುಗ್ಗಿ ರೂಮಿನೊಳಗೆ ಬಂದಿದೆ. ಸ್ನಾನಕ್ಕೆ ಬಿಸಿ ನೀರಿನ ವ್ಯವಸ್ಥೆಯಿಲ್ಲ. ಮುಖ್ಯ ರಸ್ತೆಯಿಂದ ಹಾಸ್ಟೇಲ್‌ಗೆ ಬರಲು ಮಣ್ಣಿನ ದಾರಿಯಿದ್ದು ಈ ದಾರಿಯಲ್ಲಿ ಮಳೆಗಾಲದ ಸಂಚರಿಸುವುದು ಕಷ್ಟ’ ಎಂಬುದು ವಿದ್ಯಾರ್ಥಿಗಳ ಅಳಲು.