ಹುಬ್ಬಳ್ಳಿ: ನಿಯಂತ್ರಣಕ್ಕೆ ಬಾರದ ಸೊಳ್ಳೆಗಳ ಕಾಟ

ಜನವಸತಿಗಳಲ್ಲಿ ಸ್ವಚ್ಛತೆ ಕಾಪಾಡಿಕೊಂಡರೂ ಸೊಳ್ಳೆಗಳ ನಿಯಂತ್ರಣ ಅಸಾಧ್ಯ ಎನ್ನುವಂತಾಗಿದೆ. ಮನೆ ಪಕ್ಕದಲ್ಲಿ ತೆರೆದ ಚರಂಡಿ ಇದ್ದಿರುವ ಕಡೆಗಳಲ್ಲಿ ಹಗಲಿರುಳು ಬಾಗಿಲು, ಕಿಟಕಿ ಭದ್ರ ಮಾಡಿಕೊಂಡಿರಬೇಕಾದ ಅನಿವಾರ್ಯತೆ ಇದೆ.

ರಾಜಕಾಲುವೆಗೆ ಹೊಂದಿಕೊಂಡಿರುವ ಬಡಾವಣೆಗಳಲ್ಲಿ, ಬಡವರು ಹೆಚ್ಚಿನ ಸಂಖ್ಯೆಯಲ್ಲಿ ವಾಸಿಸುವ ಕೊಳೆಗೇರಿಗಳಲ್ಲಿ ಸೊಳ್ಳೆಗಳ ಉಪಟಳದಿಂದ ಜನರು ನೆಮ್ಮದಿಯಿಂದ ನಿದ್ರೆ ಮಾಡುವುದಕ್ಕೆ ಸಾಧ್ಯವಾಗುತ್ತಿಲ್ಲ.

'ಬೇಸಿಗೆಯಲ್ಲಿ ಸೊಳ್ಳೆಗಳು ಕಡಿಮೆ ಆಗಬಹುದು ಅಂದುಕೊಂಡಿದ್ದೇವು. ಆದರೆ ಸೊಳ್ಳೆಗಳು ಹೆಚ್ಚಾಗುತ್ತಿವೆ. ಏನೂ ಮಾಡಬೇಕು ತಿಳಿಯದಾಗಿದೆ. ಆರೋಗ್ಯ ಇಲಾಖೆಯವರು ಮತ್ತು ಮಹಾನಗರ ಪಾಲಿಕೆಯವರು ಸೊಳ್ಳೆ ಹಾವಳಿ ನಿಯಂತ್ರಣಕ್ಕೆ ಈಗ ಏನಾದರೂ ಮಾಡಬಹುದು ಎನ್ನುವ ನಿರೀಕ್ಷೆ ಇತ್ತು.‌ ಇದುವರೆಗೂ ಯಾವ ಕ್ರಮ ಕೈಗೊಂಡಿದ್ದು ಅಥವಾ‌ ಸೊಳ್ಳೆಗಳ ವಿಷಯವಾಗಿ ಹುಬ್ಬಳ್ಳಿಯ ಜನರಿಗೆ ಸಲಹೆ/ಸೂಚನೆ ಕೊಡುವ ಕೆಲಸ ಮಾಡಿಲ್ಲ' ಎಂದು ಹುಬ್ಬಳ್ಳಿ ಚೈತನ್ಯ ನಗರದ ನಿವಾಸಿ ಅಶೋಕ ಪಾಟೀಲ ಅಸಮಾಧಾನ ವ್ಯಕ್ತಪಡಿಸಿದರು.

ಹೆಚ್ಚುವರಿ ವೆಚ್ಚ:

ಸೊಳ್ಳೆ ಹಾವಳಿಯಿಂದ ಪಾರಾಗಲು ಜನರು ಹೆಚ್ಚುವರಿ ಹಣ ಖರ್ಚು ಮಾಡುವ ಅನಿವಾರ್ಯತೆ ಇದೆ. ಸೊಳ್ಳೆ ಕಾಯಿಲ್, ಸೊಳ್ಳೆ ಬತ್ತಿ, ಸೊಳ್ಳೆ ಹೊಡೆಯುವ ಬ್ಯಾಟ್, ಸೊಳ್ಳೆ ಪರಧೆ ಸೇರಿದಂತೆ ಸೊಳ್ಳೆ ನಿಯಂತ್ರಣಕ್ಕೆ ಇನ್ನೂ ಹಲವು ಪರಿಕರಗಳು ಈಗ ಹೆಚ್ಚು ಮಾರಾಟ ಆಗುತ್ತಿವೆ.

ಮನೆ ಬಳಕೆಗೆ ಸಂತೆ ಮಾಡುವ ವಸ್ತುಗಳಲ್ಲಿ ಇವು ಸೇರಿಕೊಂಡಿವೆ. ಸೊಳ್ಳೆ ಓಡಿಸಲು ಕಾಯಂ ಪರಿಹಾರ ಎನ್ನುವುದು ಇಲ್ಲದಾಗಿದೆ.  ಸೊಳ್ಳೆಗಳ ಹಾವಳಿ ತಪ್ಪಿಸಲು ಬಡ ಹಾಗೂ ಮಧ್ಯಮವರ್ಗದ ಜನರು ಮೇಲಿಂದ ಮೇಲೆ ಖರ್ಚು ಮಾಡುವುದು ಸಾಧ್ಯವಾಗುವುದಿಲ್ಲ. ಹೀಗಾಗಿ ನೆಮ್ಮದಿಯಿಂದ ನಿದ್ರೆ ಮಾಡಲಾಗದೆ ಅನಾರೋಗ್ಯ ಸಮಸ್ಯೆಗೂ ಈಡಾಗುತ್ತಿದ್ದಾರೆ.

ಪೂರಕ ವರದಿಗಳು:

ಧನ್ಯಪ್ರಸಾದ ಬಿ.ಜೆ.,

ಬಸನಗೌಡ ಪಾಟೀಲ

ಕ್ರಮವಹಿಸದ ಮಹಾನಗರ ಪಾಲಿಕೆ

ಸೊಳ್ಳೆ ಹಾವಳಿ ವಿಪರೀತ ಆಗಿದ್ದರೂ ಹುಬ್ಬಳ್ಳಿ- ಧಾರವಾಡ ಮಹಾನಗರ ಪಾಲಿಕೆ ಎಚ್ಚೆತ್ತುಕೊಂಡಿಲ್ಲ. ಸಾಮಾನ್ಯ ದಿನಗಳಲ್ಲಿ ಅನುಸರಿಸುವ ಕ್ರಮಗಳನ್ನೇ ಮುಂದುವರಿಸಿದ್ದಾರೆ. ಕೊಳೆಗೇರಿಗಳಲ್ಲಿರುವ ಚರಂಡಿಗಳಿಗೆ ಮಾತ್ರ ಆಗಾಗ ಫಾಗಿಂಗ್ ಮಾಡುತ್ತಿದ್ದಾರೆ. ಆದರೆ ಸಮಗ್ರವಾಗಿ ಸೊಳ್ಳೆಗಳ ನಿಯಂತ್ರಣಕ್ಕೆ ಕ್ರಮ ವಹಿಸುತ್ತಿಲ್ಲ.

ಹುಬ್ಬಳ್ಳಿ ಸೇರಿದಂತೆ ವಿವಿಧೆಡೆ ಸೊಳ್ಳೆಗಳ ಹಾವಳಿ ನಿಯಂತ್ರಣಕ್ಕೆ ವಹಿಸಬೇಕಾದ ಕ್ರಮಗಳ ಕುರಿತು ಸಂಬಂಧಿಸಿದ ಅಧಿಕರಿಗಳು ಸಮನ್ವಯತೆಯಿಂದ ಕೆಲಸ ಮಾಡುತ್ತಿಲ್ಲ. ಮಹಾನಗರ ಪಾಲಿಕೆಯಲ್ಲಿ ಎಷ್ಟು ಫಾಗಿಂಗ್‌ ಯಂತ್ರಗಳಿವೆ? ಎಷ್ಟು ದಿನಕ್ಕೊಮ್ಮೆ ಫಾಗಿಂಗ್‌ ಮಾಡಲಾಗುತ್ತಿದೆ? ಎಷ್ಟು ಸಿಬ್ಬಂದಿ ನಿಯೋಜಿಸಲಾಗಿದೆ ಎಂಬುದರ ಬಗ್ಗೆ ಯಾವ ಅಧಿಕಾರಿಗೂ ಗೊತ್ತಿಲ್ಲ.

’ಫಾಗಿಂಗ್‌ ಯಂತ್ರಗಳನ್ನು ಖರೀದಿಸಿ, ರಾಸಾಯನಿಕ ಸಿಂ‍ಪರಣೆಗೆ ಕ್ರಮ ಕೈಗೊಳ್ಳುವುದಕ್ಕೆ ಪಾಲಿಕೆ ವ್ಯಾಪ್ತಿಯ ವಲಯ ಕಚೇರಿಗಳಿಗೆ ಸೂಚನೆ ನೀಡಲಾಗಿದೆ. ಪ್ರತಿದಿನವೂ ಫಾಗಿಂಗ್‌ ಮಾಡುವ ಚಿತ್ರಗಳನ್ನು ಕಳಿಸುತ್ತಿದ್ದಾರೆ‘ ಎನ್ನುವುದು ಪಾಲಿಕೆ ಆಯುಕ್ತರ ಕಚೇರಿಯ ಸಿಬ್ಬಂದಿ ವಿವರಣೆ. ಕೊಳೆಗೇರಿಗಳಲ್ಲಿ ಈ ಬಗ್ಗೆ ವಿಚಾರಿಸಿದಾಗ ಫಾಗಿಂಗ್‌ ಮಾಡಿಲ್ಲ ಎನ್ನುವ ಪ್ರತಿಕ್ರಿಯೆ ಇದೆ.

ಲಾರ್ವಾ ಸರ್ವೇಗೆ ಸಿಮೀತ

ಜಿಲ್ಲಾ ಸರ್ವಲನ್ಸ್‌ ಇಲಾಖೆ (ಡಿಎಸ್‌ಒ) ಸೊಳ್ಳೆಗಳ ಹಾವಳಿ ಬಗ್ಗೆ ಅಧ್ಯಯನ ನಡೆಸಿ, ವಹಿಸಬೇಕಾದ ಕ್ರಮಗಳ ಕುರಿತು ಜಿಲ್ಲಾ ಆರೋಗ್ಯಾಧಿಕಾರಿ ಮೂಲಕ ನಗರ ಸ್ಥಳೀಯ ಸಂಸ್ಥೆಗಳಿಗೆ ಸೂಚನೆ ನೀಡಬೇಕಿತ್ತು. ಆದರೆ, ಮಳೆಗಾಲ ಮುಗಿದ ಬಳಿಕ ಕಳೆದ ವರ್ಷ ಅಕ್ಟೋಬರ್‌ನಲ್ಲಿ ಕೈಗೊಂಡಿದ್ದ ಲಾರ್ವಾ ಸಮೀಕ್ಷೆ ಮತ್ತು ಮೀನು ಬಿಡುವ ಕಾರ್ಯಕ್ರಮದ ವರದಿಯನ್ನೇ ಈಗಲೂ ಹೇಳುತ್ತಿದ್ದಾರೆ. ಈಗ ಹೆಚ್ಚಾಗಿರುವ ಸೊಳ್ಳೆಗಳ ಹಾವಳಿ ಬಗ್ಗೆ ಆರೋಗ್ಯ ಇಲಾಖೆ ಕೂಡಾ ಕ್ರಮಕ್ಕೆ ಮುಂದಾಗುತ್ತಿಲ್ಲ.

6 ತಿಂಗಳಿಗೊಮ್ಮೆ ಫಾಗಿಂಗ್‌!

ಕುಂದಗೋಳ: ’ಆರು ತಿಂಗಳ ಹಿಂದೆ ಫಾಗಿಂಗ್ ಮಾಡಿದ್ದು ಕಳೆದ ವಾರದಲ್ಲೋಮ್ಮೆ ಫಾಗಿಂಗ್ ಮಾಡಿದ್ದೇವೆ. ಫಾಗಿಂಗ್ ಮಷೀನ್ ರಿಪೇರಿ ಇದ್ದು ಸರ್ಕಾರಿ ಆಸ್ಪತ್ರೆಯ ಫಾಗಿಂಗ್ ಮಷೀನ್ ಬಳಸಿಕೊಂಡಿದ್ದೇವೆ. ಪಟ್ಟಣದಲ್ಲಿ 19 ವಾರ್ಡ್ ಇದ್ದು ಸ್ವಚ್ಛತಾ ಸಿಬ್ಬಂದಿಯ ಕೊರತೆಯಿದೆ. ವಾರಕ್ಕೊಮ್ಮೆ ಚರಂಡಿ ಕ್ಲಿನ್ ಮಾಡಿ ಮೇಲಾಥಿನ್ ಪೌಡರ್ ಸಿಂಪಡಣೆ ಮಾಡುತ್ತೇವೆ. ಜನರು ಸ್ವಚ್ಛತೆ ಕಾಪಾಡುವಲ್ಲಿ ಸಹಕರಿಸುತ್ತಿಲ್ಲ. ಅದರಿಂದ ಅಲ್ಲಲ್ಲಿ ಸೊಳ್ಳೆಯ ಸಂಖ್ಯೆ ಜಾಸ್ತಿ ಆಗಿರಬಹುದು’ ಎಂದು ಕುಂದಗೋಳ ಪಟ್ಟಣ ಪಂಚಾಯಿತಿ ಕಿರಿಯ ಆರೋಗ್ಯ ನಿರೀಕ್ಷಕಿ ಜಾನಕಿ ಮ.ಬಳ್ಳಾರಿ ತಿಳಿಸಿದರು.

‘ಸೊಳ್ಳೆ ಪರದೆ ಬಳಸಿ’

ಧಾರವಾಡ: ನಗರದ ನೆಹರುನಗರ, ಕೋಳಿಕೆರೆ ಪ್ರದೇಶ, ಜನ್ನತ್‌ ನಗರ ಸಹಿತ ಸೊಳ್ಳೆಗಳ ಹಾವಳಿ ಸಮಸ್ಯೆ ಇದೆ. ಸೊಳ್ಳೆ ಸಮಸ್ಯೆ ನಿಯಂತ್ರಣ ನಿಟ್ಟಿನಲ್ಲಿ ಪಾಲಿಕೆ ಗಮನ ಹರಿಸಿದೆ. ಕೆಲವೆಡೆ ಫಾಗಿಂಗ್‌ ಮಾಡಿಸಲಾಗಿದೆ. ಮಲಗುವಾಗ ಸೊಳ್ಳೆ ಪರದೆ ಬಳಸುವಂತೆ, ಮನೆ ಸುತ್ತಲಿನ ಪ್ರದೇಶದಲ್ಲಿ ನೈರ್ಮಲ್ಯ ಕಾಪಾಡುವಂತೆ ಜಾಗೃತಿ ಮೂಡಿಸಲಾಗತ್ತಿದೆ. ‘ಲಕ್ಷ್ಮಿಸಿಂಗನಕಕೆರೆ, ಸರಸ್ವತಿಪುರಂ, ನೆಹರುಗನರ ಮೊದಲಾದ ಕಡೆಗಳಲ್ಲಿ ಫಾಗಿಂಗ್‌ ಮಾಡಿಸಲಾಗಿದೆ. ಪವನಗಿರಿ, ಜಯನಗರ ಕೆರೆ ಭಾಗದಲ್ಲಿ ಸಿ.ಸಿ ಟಿವಿ ಕ್ಯಾಮೆರಾ ಅಳವಡಿಸಲಾಗಿದೆ. ರಸ್ತೆ ಬದಿಯಲ್ಲಿ ಕಸ ಎಸೆಯುವವರಿಗೆ ದಂಡ ವಿಧಿಸಲಾಗುತ್ತದೆ. ಧಾರವಾಡದಲ್ಲಿ 80 ಕಡೆಗಳಲ್ಲಿ ಸಿ.ಸಿ ಟಿವಿ ಕ್ಯಾಮೆರಾ ಅಳವಡಿಕೆ ನಿಟ್ಟಿನಲ್ಲಿ ಪ್ರಸ್ತಾವ ಸಲ್ಲಿಸಲಾಗಿದೆ. ಸ್ವಚ್ಛತೆಗೆ ಒತ್ತು ನೀಡಲಾಗಿದೆ’ ಎಂದು ಪಾಲಿಕೆ ಪರಿಸರ ಎಂಜಿನಿಯರ್‌ ಫರೀದಾ ನದಾಫ್‌ ‘ಪ್ರಜಾವಾಣಿ’ಗೆ ತಿಳಿಸಿದರು.