ಹುಬ್ಬಳ್ಳಿ: ಇಲ್ಲಿನ ಕಾರವಾರ ರಸ್ತೆಯ ಹಳೇ ಸಿಎಆರ್‌ ಮೈದಾನದ ಬಳಿ ಇರುವ ನೂತನ ಪೊಲೀಸ್‌ ವಸತಿಗೃಹದ ಎರಡು ಮನೆಗಳ ಬಾಗಿಲು ಮುರಿದ ಕಳ್ಳರು ₹ 5.15 ಲಕ್ಷ ಮೌಲ್ಯದ ಚಿನ್ನಾಭರಣ ಹಾಗೂ ನಗದನ್ನು ಭಾನುವಾರ ರಾತ್ರಿ ಕಳ್ಳತನ ಮಾಡಿದ್ದಾರೆ.
ಬ್ಲಾಕ್‌ ನಂ 7ರ 73ನೇ ಸಂಖ್ಯೆಯ ಮನೆಯಲ್ಲಿ ಎಆರ್‌ಎಸ್‌ಐ ಆಗಿರುವ ಮಹಾಂತೇಶ ಹೊಸಮನಿ ಎಂಬುವವರ ಮನೆಗೆ ನುಗ್ಗಿದ ಕಳ್ಳರು ₹ 2,77 ಲಕ್ಷ ಮೊತ್ತದ 113 ಗ್ರಾಂ ಚಿನ್ನಾಭರಣ, ₹ 13,700 ಕಿಮ್ಮತ್ತಿನ 540 ಗ್ರಾಂ ಬೆಳ್ಳಿಯ ಆಭರಣ ಹಾಗೂ ₹ 84 ಸಾವಿರ ನಗದು ಸೇರಿದಂತೆ ₹ 3,74,700 ಮೌಲ್ಯದ ವಸ್ತು ಹಾಗೂ ನಗದು ಕದ್ದುಕೊಂಡು ಪರಾರಿಯಾಗಿದ್ದಾರೆ.
6ನೇ ಬ್ಲಾಕ್‌ನ 69ನೇ ಸಂಖ್ಯೆಯ ಮನೆಯಲ್ಲಿ ಪೊಲೀಸ್‌ ಸಿಬ್ಬಂದಿ ಮಲ್ಲಿಕಾರ್ಜುನ ಕುಡುವಕ್ಕಲ ಎಂಬುವವರಿಗೆ ಸೇರಿದ 42 ಗ್ರಾಂ ತೂಕದ, ₹ 1,26 ಲಕ್ಷ ಮೌಲ್ಯದ ಚಿನ್ನಾಭರಣ, 360 ಗ್ರಾಂ ತೂಕದ ₹ 14,400 ಮೌಲ್ಯದ ಬೆಳ್ಳಿ ಆಭರಣ ಸೇರಿದಂತೆ ₹ 1,40,400 ಮೌಲ್ಯದ ವಸ್ತುಗಳನ್ನು ದೋಚಿಕೊಂಡು ಹೋಗಿದ್ದಾರೆ.
