ಕಾರ್ತಿಕ್‌ ಆರ್ಯನ್‌ ಕನಸು ನನಸಾಯಿತು!

ಕರೀನಾ, ಚಿತ್ರರಂಗದಿಂದ ಸಣ್ಣ ಬ್ರೇಕ್‌ ತೆಗೆದುಕೊಂಡರೂ ಕಾರ್ತಿಕ್‌, ಕರೀನಾಳನ್ನು ಆರಾಧಿಸುತ್ತಲೇ ಇದ್ದನಂತೆ. ತಾವಿಬ್ಬರೂ ಮದುಮಕ್ಕಳಾಗಿ ಮಿಂಚುತ್ತಿರುವಂತೆ ಕನಸು ಕಾಣುತ್ತಲೇ ಇರುತ್ತಾನಂತೆ. ಹೀಗೆ ಭಾವಪ್ರಪಂಚದಲ್ಲಿ ತೇಲಾಡುತ್ತಿರುವಾಗಲೇ ಕಾರ್ತಿಕ್‌ಗೆ ಸೆಲೆಬ್ರಿಟಿ ವಸ್ತ್ರ ವಿನ್ಯಾಸಕ ಮನೀಷ್‌ ಮಲ್ಹೋತ್ರಾ ಸಿಂಗಾಪುರಕ್ಕೆ ಕರೆದೊಯ್ದಿದ್ದರು.

ಸಿಂಗಾಪುರದಲ್ಲಿ ನಡೆದ ಕಾರ್ಯಕ್ರಮವೊಂದಲ್ಲಿ ಮದುಮಗನಂತೆ ಉಡುಗೆ ತೊಡುಗೆ ಧರಿಸಿ ಕರೀನಾ ಕೈಹಿಡಿದು ನಡೆಯುವ ಅದೃಷ್ಟ ಕಾರ್ತಿಕ್‌ಗೆ ಸಿಕ್ಕಿತು. ತನ್ನ ಕನಸಿನ ಬಗ್ಗೆ ಎಲ್ಲರೆದುರು ಬಾಯಿಬಿಟ್ಟಾಗ ನೆರೆದಿದ್ದವರು ಮಾತ್ರವಲ್ಲ, ಕರೀನಾ ಕೂಡಾ ಆಶ್ಚರ್ಯದಿಂದ ಮೂಕರಾದರಂತೆ. ‘ಕರೀನಾ ಬಗ್ಗೆ ನನಗೆ ಬಹಳ ದಿನಗಳಿಂದ ಕ್ರಶ್‌ ಇತ್ತು. ಮದುವೆಯಂತೂ ಆಗಲು ಅವಕಾಶ ಸಿಗಲಿಲ್ಲ. ಹೀಗೆ ರ‍್ಯಾಂಪ್‌ ಮೇಲಾದರೂ ಕೈಹಿಡಿದು ನಡೆಯುವ ಅವಕಾಶ ಸಿಕ್ಕಿದ್ದಕ್ಕೆ ತುಂಬಾ ಖುಷಿಯಾಗುತ್ತಿದೆ’ ಎಂದು ಕಾರ್ತಿಕ್‌ ಮನದಾಳದ ಮಾತನ್ನು ಹೇಳಿಕೊಂಡು ಹಗುರಾದರಂತೆ.

ಕಾರ್ತಿಕ್‌ ಅಭಿನಯದ ‘ಸೋನು ಕೆ ತೀತಿ ಸ್ವೀಟಿ’ ಸಿನಿಮಾ, ‘ಪದ್ಮಾವತ್‌’ ನಂತರ ಅತ್ಯಧಿಕ ಗಳಿಕೆ ಮಾಡಿದ ಚಿತ್ರ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಹಾಗಾಗಿ ಕಾರ್ತಿಕ್‌ ಆರ್ಯನ್‌ ತಾರಾ ವರ್ಚಸ್ಸು ಈಗ ಹೆಚ್ಚಿದೆ.